Tơ̆ ‘măng apinh jet, bơngai tang măt Phan Thị Hà Phước, Kơdră Hơbih bơ̆ jang Mŭk dram-Kon jên jang Jơnŭm vei lăng kon pơlei dêh char Đắk Lắk akhan, lơ trong tơlĕch jang mŭk dram nhen tơmam dram kmăi kmŏk pơm tơlĕch, tĕch mơdro tơ̆ teh đak đe, tơmang pơhiơ̆ păng hơnih mơdro sa ‘nao pơjing jei tŏk lơ pơtêng hăm dôm khei ou lơ̆m sơnăm sơ̆, mă lei hơnih mơdro sa sơlăh pơdơ̆h jang oei tŏk lơ đĕch. Tơl nơ̆r apĭnh jet đơ̆ng bơngai tang măt găh dôm tơdrong jang đei ƀơm lơ tơdrong tơnap tap păng trong vă hơmet pơ ‘lơ̆ng tơdrong jang tơmơ̆t jên jang, mơdro sa, pơvih pơvăn ăn tơdrong tŏk mŭk dram 2 kơsô̆, ƀok Cao Đình Huy, Kơdră chĕp pơgơ̆r Hơnih bơ̆jang Jên hu dêh char Đắk Lắk tơbăt, 6 khei blŭng sơnăm lơ̆m dêh char đei hloh 1.200 hơnih mơdro sa pơdơ̆h kơ jang, găh lơ hơnih mơdro sa iĕ păng pah ai lơ̆m tơdrong jang mơdro sa, tơ iung pơjing ming man, tĕch mơdro teh, gre chơ tơmoi, tơmam dram, hnam ăn đe tep pơdơ̆h păng hơnih et sa. Vă hơmet pơ ‘lơ̆ng tơnap tap ou, ƀok Cao Đình Huy tơbăt:“ Hơnih bơ̆jang jên hu dêh char pơkăp lơ̆m khei năr kơnh ‘noh hơnơ̆ng dăr lăng hơlen tơdrong jang kơ hơnih mơdro sa lơ̆m dêh char vă tơtom pơchoh trong ăn Hơnih bơ̆jang dêh char rim trong jang hơmet pơ ‘lơ̆ng tơnap tap ăn khul hơnih mơdro sa; pơm tơjur hơnih mơdro sa pơdơ̆h kơ jang, pơm hơtŏk hơnih mơdro sa vih hơlơ̆k jang dơ̆ng păng pơm hơtŏk ‘lơ̆ng hơnih mơdro sa pơjing ‘nao. Ưh khan lăp tơgop pơih să tơdrong jang pơm tơlĕch, pơjing dơ̆ng tơdrong jang păng pơm hơtŏk thuê̆ kon jên bơ̆ jang teh đak, mă oei pơjing dơ̆ng jơhngơ̆m pran tŏk kơtang ăn tơdrong jang mŭk dram kơ dêh char”.

Mĭnh lơ̆m dôm tơdrong găn ga tơ̆ Đắk Lắk ‘noh hơnih mơdro sa tim mă đei rơvơn lơ̆m tŏk iŏk kon jên jang. Ƀok Nguyễn Kim Cương, Kơdră chĕp pơgơ̆r Hơnih Mong jên Teh đak hơnih sơdrai Tơring 11 tơbăt, truh vă đĭ khei 6, tơdrong ăn tŏk iŏk lơ̆m dêh char Đắk Lắk  ‘nao lăp đei dang 281.700 ti hlak jên, tŏk hloh 21.000 ti hlak jên pơtêng hăm blŭng sơnăm. Mă lei, tơdrong ăn tŏk iŏk hăm hơnih mơdro sa iĕ păng păh ai ‘nao lăp tơmơ̆t dang 13% akŏp kon jên ăn tŏk iŏk. Kiơ̆ kơ ƀok, tơdrong hơnih mơdro sa tơnap mă tŏk iŏk đei kon jên jang đei tơdrong tơm pơm ăn đơ̆ng tơdrong hơlen hơdăh kon jên jang păng tơdrong chĕp pơgơ̆r.“Thei pơm hơdăh hloi găh kon jên jang kơ hơnih mơdro sa hăm kon jên hu kơ ŭnh hnam, kơ dih tơ-‘ngla hơnih mơdro sa vă tơƀôh hơdăh tơdrong jang kơ bơ̆n đei chih tôm tong lơ̆m hla boar adoi nhen tơbăt hơdăh găh thuê̆ roi năr roi pơkoel pơm mă hơdăh, mă tơpăt hloh dơ̆ng. ‘Nou jing dôm tơdrong kăl hloh mă nhôn ‘meh vă tơbăt ăn rim hơnih mơdro sa iĕ păng păh ai mưh vang iung jang lơ̆m tơdrong jang pơm tơlĕch tĕch mơdro tơmam drăm adoi nhen găh tơdrong chă tŏk iŏk jên đơ̆ng rim hơnih mong jên”.

Tơdăh kon jên jang ‘noh jing tơdrong tơm hloh vă vei kơjăp bơ̆jang lei hơnih tĕch răt jĭ tơdrong kăl vă hơnih mơdro sa jang sa iŏk đei jơnei kơjăp. Kơ yuơ lơ loh, tơ̆ ‘măng apĭnh jet, tơdrong pơtrŭt mơdro sa, pơih să hơnih mơdro sa. Găh tơdrong ou, yă Nguyễn Thị Thu An, Kơdră chĕp pơgơ̆r Hơnih vei lăng Mơdro sa dêh char Đắk Lắk tơbăt, 6 khei blŭng sơnăm, hơnih hlôi ktơgŭm djru dang 150 ‘măng hơnih mơdro sa, hơp tak xah vang iung jang pơtrŭt mơdro sa, tơgoăt tĕch răt lơ̆m teh đak păng hăm teh đak đe, adoi pơtrŭt kơtang mơdro sa kiơ̆ điên tư păng tơplih kơsô̆. Khei ‘năr ou kơnh, tơdrong pơgơ̆r pơtrŭt mơdro sa gô hơnơ̆ng đei tơplih ‘nao kiơ̆ trong ‘meh vă yan ou đơ̆ng hơnih mơdro sa, mă kăl tơ̆ rim hơnih tĕch răt teh đak đe.“Găh tĕch mơdro tơ̆ teh đak đe, nhôn gô hơlen kiơ̆ tơdrong ‘meh vă đơ̆ng hơnih mơdro sa. ‘Noh jĭ Hơnih mơdro sa ‘meh vă yă kiơ tơ̆ teh đak ‘noh, tơgŭm djru tơmam drăm yă kiơ, tơgoăt dih băl lơ liơ păng nhôn gô pơjing trong jang trŏ lăp rim tơdrong ‘meh vă ‘noh atŭm hăm hơnih mơdro sa”.

‘Măng apĭnh jet tơƀôh hơdăh tơdrong hơdrin iung jang kơtang đơ̆ng dêh char Đắk Lắk lơ̆m dôm tơdrong oei tim mă ‘lơ̆ng lơ̆m tơmơ̆t jên jang, mơdro sa. Dôm trong tơlĕch jang đei tơlĕch ăn jei lăng truh pơm pơ ‘lơ̆ng tơdrong jang, hơmet ming pơ ‘lơ̆ng tơpôl hơnih mơdro sa, pơjing hơyak kăl vă Đắk Lắk jang kiơ̆ trong tơlĕch jang tŏk mŭk drăm 2 kơsô̆ lơ̆m khei năr ou kơnh.