‘Năr 20/7, tơ̆ phường Tuy Hòa, Anih jang MTTQ Việt Nam dêh char Đắk Lắk hlôi pơgơ̆r pơtôch tơdrong jang man 475 tŏ hnam Tơgoăt tơgoăl đơ̆ng jên tơgŭm 38 ti hlak jên kơ pơlei tơm Đồng Nai, dôm anih mơdro sa păng Ƀô̆ đô̆i vei lăng tơring sơlam. ‘Măng âu, dêh char Đắk Lắk hlôi tơlĕch jang tơdrong jang tơgŭm man dơ̆ng 300 tŏ hnam Tơgoăt tơgoăl ăn kơ unh hnam dơnuh hin, vă jê̆ dơnuh hin. Kon jên đei iŏk đơ̆ng tơdrong tơgŭm đơ̆ng Tổng Bí thư, Kơdră teh đak Tô Lâm pơjao asong ăn Anih mong jên “Yua kơ bơngai dơnuh hin” dêh char. Mĭnh pôm hnam gô iŏk kơsô̆ jên tơgŭm 80 triệu hlak jên. Vă tơjur ƀiơ̆ pŭ trăp ăn rim ŭnh hnam tơring gô kơchăng hơvơn dơ̆ng jên tơgŭm đơ̆ng ‘nhŏng oh, anih mơdro sa păng tơpôl. Tơdrong jang đei tơdrong ‘lơ̆ng ‘mêm mơnat gĭt kăl, pơm hơnih gơnang kơjăp tơgŭm dôm ŭnh hnam mơmat tat oei 1 dơnơ̆ng jang sa 1 ƀôt, tơgop tŭn hrĕnh tơdrong hơgăt sut hnam pơgia, hnam hiah hiok lơ̆m dêh char.