Tơdrong jang pơgơ̆r tơ̆ Hnam trưng teh đak rong jăl mônh păng jăl ƀar Ia Lốp. Lơ̆m jơva hơgơ̆r djơ djrĭng, đe oh đei lăng joh ayŏ kơdŏ soang, pơm byoh, vang akŏm dôm tơdrong ngôi pơchơt păng vang sa ƀĕng Têt Trung thu. 'Măng mă blŭng đei sơng Têt Trung thu lơ̆m hnam trưng 'nao, oh Triệu Thị Lan Anh, hŏk tro lăm 7, Hnam trưng teh đak rong jăl mônh păng jăl ƀar Ia Lốp chơt hơ iă tơroi:

“Năr 'nâu inh đei ngôi pơchơt trung thu tôch kơ chơt, inh đei hŏk lơ̆m hnam trưng 'nao, inh ƀôh tôch kơ ‘lơ̆ng, bôl boăl inh kŭm tôch kơ chhôk păng hưch hanh. Inh apĭnh pơtruh nơ̆r bơnê kơ đe ma ƀô̆ đô̆i, đe duch ma hơtăih kơ hnam păng đe mih ma duch nă vang tơgŭm, đe 'nhŏng đe mŏ đoàn viên hơ. Inh pơkăp gô hơdrin hŏk pơhrăm mă 'lơ̆ng.”

Ia Lốp jĭ xăh sơlam, tơdrong hơrih xa kơ lơ unh hnam hŏk tro oei mơmat tat. Sơnăm hŏk 'nâu, thây păng hŏk tro Hnam trưng teh đak rong jăl mônh păng jăl ƀar Ia Lốp đei dơ̆ng tơdrong chơt hơiă ƀơ̆t hnam trưng 'nao đei tơlĕch jên man, tơmơ̆t yoa. Thây Phạm Duy Tĩnh, Kơdră vei lăng hnam trưng tơbăt, ƀơ̆t trung thu sơnăm 'nâu 862 'nu hŏk tro kơ hnam trưng tă kơ đei iŏk tơmam păng sơng "gơmăng rang khei pơnil” chơt hơiă, hiôk chơt ngăl.

“'Nâu jĭ tơdrong tôch chhôk ‘nă, ưh lăp hăm thây kô pơtho đĕch mă hăm đĭ đăng đe oh hŏk tro kŭm nhen unh hnam đe oh hŏk tro tơ̆ âu. Năr 'nâu kŭm đei pơgơ̆r tơdrong jang trung thu âu 'nŏh tôch kơ ‘lơ̆ng. 20 sơnăm kơ âu ki 'nâu jĭ tơdrong jang tih hlŏh păng kŭm jing mă blŭng đơ̆ng hnam trưng xăh Ia Lốp.”

Tơ̆ tơdrong jang, Khŭl pơgơ̆r hlôi pơjao 10 tơdrong jang sa, 10 tong gre tang vang, 10 kơsuơ̆t jên hŏk ƀŏng hơdai hăm 890 tơpu tơmam asong ăn kon pơlei păng hŏk tro xăh Ia Lốp; hơdai hăm pơjao hla ar pôk pơ ư kơ đe oh đei jơnei lơ̆m tơdrong jang "Ba oh năm tơ̆ hnam trưng".

Kơdih kâu Bí thư Đảng dêh char Đắk Lắk Lương Nguyễn Minh Triết kŭm pơjao 10 kơsuơ̆t jên hŏk ƀŏng ăn hŏk tro yak hlŏh mơmat tat păng 100 triu hlak jên tơgŭm man hnam ăn mĭnh unh hnam bơngai kon kông đei tơdrong hơrih xa mơmat tat.

Đại tá Đỗ Quang Thấm, Chính ủy Anih chĕp kơ̆l pơgơ̆r Ƀô đô̆i vei lăng tơring sơlam dêh char Đắk Lắk pơma hơdăh, 'nâu jĭ tơdrong jang gĭt kăl păng 'lơ̆ng hơiă năm truh tơ̆ tơring sơlam, pơjing tơdrong hiôk chơt ăn đe oh tơ̆ tơring sơlam ƀlep ƀơ̆t Tết Trung thu.

“'Nâu jĭ minh tơdrong jang tôch đei yoa păng 'lơ̆ng hơiă tơƀôh jơhngơ̆m đon 'mêm, tơdrong pơngơ̆t tôch dêh đơ̆ng rim kơdră, rim anih jang păng đơ̆ng khŭl linh Kơđông vei lăng tơring sơlam hăm đe oh hơioh tơ̆ tơring sơlam. ‘Moi kiơ̆ tơdrong jang 'nâu 'nŏh tơgŭm ăn đe mon đei đon lui hăm tơdrong pơngơ̆t tôch dêh đơ̆ng rim kơdră, rim anih jang vă  hơdrin hŏk pơhrăm mă 'lơ̆ng hlŏh dơ̆ng vă jing dôm kon pơlei đei yoa păng kŭm hăm Ƀô đô̆i vei lăng tơring sơlam vei kơjăp tơring sơlam kơ teh đak”.