Trong vă pơjing Khôi luơ̆t đei 13 Chăl, tơjur 03 Chăl pơtêng hăm Khôi luơ̆t Groi teh sơnăm 2024, mĭnh ƀar apăng tơchơ̆t găh tơdrong pơkăp tơ̆ rim chăl ou đei tơmơ̆t lơ̆m rim chăl uơ oei. Găh Apăng, trong vă pơjing Khôi luơ̆t đei 115 apăng (Khôi luơ̆t Groi teh sơnăm 2024 ‘noh 260 apăng).  Tơ̆ ‘măng Hop akŏm, rim hơnih tơm, hơnih bơ̆ jang akŏm pơma dơnuh minh ƀar tơdrong đei nơ̆r tơgop phara dih băl nhen: tơdrong gơh jang kiơ̆ găh bơ̆ jang teh đak vei lăng groi teh; Găh tơchơ̆t, kĭ pơkăp tĕch răt dih băl, tơdrong pơm tơm kơ bơngai tơ-‘ngla teh; Găh tơdrong iŏk tơvih teh kơ yuơ pơyoa ăn atŏk tơ iung tơpôl. Pơma pơtôch hop akŏm, Kơ iĕng Thủ tướng Hồ Quốc Dũng pơma hơdăh, ‘nou jĭ tơdrong vă pơjing Khôi luơ̆t đei ƀơm truh kơtang, tôm tong kơ tơdrong hơrih sa tơpôl. Kơ iĕng Thủ tướng pơjao ăn Hơnih tơm vei lăng Choh jang sa păng Cham char iung jang hơdoi hăm rim hơnih bơ̆ jang ƀơm truh hơnơ̆ng dăr lăng, chă tơchĕng hơlen, drơ̆ng nơ̆r trong vă pơjing Khôi luơ̆t, sơđơ̆ng jang kiơ̆ jơnei, pơm dă ƀiơ̆ kơtang rim tơdrong tơhlăk tơhlĭn lơ̆m hơmet ming đơ̆ng rŏng tơlĕch jang kiơ̆.