Tơ̆ tơring sơlam xăh Buôn Đôn, Kơđông linh vei lăng tơring sơlam Bo Heng jang hơdai hăm Anih jang Kanh sat cơ động dêh char Đắk Lắk, Khul jang tơgŭm pơlei tơm Hồ Chí Minh păng Anih chă tơmang lăng Gơng hơneh Buôn Đôn pơgơ̆r tơdrong jang "Trung thu 'mêm kơ eng" tơ̆ Buôn Trí. Đe oh hơioh đei vang hơsoang yă grai, pơngôi pơchơt kră sơ̆, pơgơ̆r joh ayŏ kơdŏ soang păng iŏk 695 tơpu tơmam. Anih pơgơ̆r oei pơjao 150 tơpu tơmam ăn dôm unh hnam đei tơdrong hơrih sa pơmat tat. Tơ̆ sơlam teh xăh Ia Rvê, Kơđông linh vei lăng tơring sơlam Ia Rvê hlôi pơjao hlŏh 1.300 tơpu tơmam ăn hŏk tro đơ̆ng jăl mâm non truh jăl 2 păng đe hơioh tơ̆ tơring.

Tơ̆ tơring sơlam dơsĭ phường Xuân Đài, Kơđông linh vei lăng sơlam Xuân Đài jang hơdai hăm Khŭl jang vei lăng drŏ kăn phường pơjao 200 tơpu tơmam Trung thu. Dôm tơmam tơgŭm ăn hơioh tơring sơlam đei dơ̆ng tơdrong hiôk chơt lơ̆m năr lêh Trung thu, tơƀôh tơdrong vang yak hơdai đơ̆ng kang ƀô̆, khŭl linh Ƀô̆ đô̆i vei lăng tơring sơlam kŭm hăm kơdră đảng, khŭl kơdră tơring, rim khŭl jang păng bơngai đei jơhngơ̆m đon 'lơ̆ng hăm dôm ŭnh hnam oei mơ mat tat.