Hnam trưng mẫu giáo Gia Bắc, xăh Sơn Điền, dêh char Lâm Đồng đei 7 lăm hŏk, hăm 230 'nu hŏk tro đơ̆ng 25 khei truh 6 sơnăm păng 98% 'nŏh jĭ kon hơ 'lơ̆p bơngai kon kông K'Ho Nộp. Đơ̆ng rŏng 2 giĕng mât hŏk, tơdrong vei lăng, hơmet tơmam sŏng xa ‘năr dơ̆ng ăn hŏk tro hlôi đei hnam trưng bơ̆ jang trŏ tơdrong hơgăt. Khul thây kô vei lăng Hnam trưng mẫu giáo Gia Bắc kŭm pơjing lơ tơdrong pơvei vă chơ chuĕn tơmam pai xa rim năr đơ̆ng Di Linh năm tơ̆ hnam trưng, vă gơ̆h đei tơmam 'lơ̆ng mă đơ̆ng trong yak hơtăih truh 35km.

Kô Nguyễn Thị Tuyết Lan, Hiê̆u trơng Hnam trưng mâu giáp Gia Bắc, ăn tơbăt, kŭm hăm tơmam drăm, lăm hŏk kơjăp 'lơ̆ng, tơmam hŏk pơhrăm đei răt hơmet tôm, dôm 'măng sŏng sa 'năr dơ̆ng đei tôm tơmam 'lơ̆ng 'noh jĭ nơ̆r pơkăp đơ̆ng hnam trưng vă đĭ đăng mĕ ƀă hŏk tro hơđơ̆ng jơhngâm gơ̆ih kon ăn hnam trương: "Hơmet 'lơ̆ng hlŏh dôm 'măng sŏng xa ăn đe kon mon, nhôn pơgơ̆r sŏng xa thoi tơ̆ unh hnam dăh mă dôm 'măng xa buffet. Mĕ ƀă ƀôh kon sŏng xa đei por 'nhot tŏ, đei đe kô vei lăng 'lơ̆ng păng đe kon mon đei ngôi pơchơt, pơtâp pơhrăm, tih vơ̆ ‘lơ̆ng găh 5 tơdrong kiơ̆ dôm môn hŏk 'nŏh mĕ ƀă tôch hơđơ̆ng jơhngâm."

Tơ̆ hnam trưng hŏk jăl mônh - jăl ƀar Gia Bắc, 656 'nu hŏk tro đơ̆ng rŏng kơ jơ hŏk tơ̆ lăm oei truh hăm lơ tơdrong pơhrăm tơ̆ 'ngoăih, hơtŏk đon hlôh vao kiơ̆ đơ̆ng anih mong đŏk hla ar tơ̆ hnam trưng hăm kơhrĕng kơsơ̆p hla ar tôch đei yoa. Kơlih thoi noh mă đơ̆ng 'nao lăp hloh 2 giĕng blŭng kơ sơnăm hŏk 'nao đĕch, tơdrong hŏk pơhrăm đơ̆ng đe oh đĭ sơđơ̆ng ‘lơ̆ng, hăm kơsô̆ hŏk tro năm hŏk tôm ngăl.

Oh Ka Mộng Diệu, hŏk tro lăm 5C, Hnam trưng jăl mônh - jăl ƀar Gia Bắc, xăh Sơn Điền, tơroi: "Ĭnh ƀôh truh tơ̆ hnam trưng tôch kơ chơt yua đei hŏk hăm đe buăl. Tơmam hŏk pơhrăm ĭnh đei tôm. Tơ̆ lăm thây kô tơgŭm ăn ĭnh tôch lơ mưh hŏk pơhrăm. Ĭnh ‘mĕh hŏk hloh jĭ môn Toán păng pơhrăm hơri. Kơdih kâu ĭnh adrin vă sơnăm hŏk 'nâu jing hŏk tro rơgei, đei xa pri."

Sơnăm hŏk 2026- 2027 xăh Sơn Điền đei 2 hnam trưng mầm non, 1 hnam trưng jăl mônh păng 2 hnam trưng jăl ƀar, akŏm đĭ đăng 1.722 'nu hŏk tro, kơsô̆ hŏk tro bơngai kon kông đei hloh 94%. Kŭm hăm dôm tơdrong tơgŭm đơ̆ng Đảng, Teh đak, tơgŭm ưh đei iŏk jên hŏk, tơgŭm jên sŏng xa, đe oh hŏk tro tơ̆ xăh Sơn Điền oei iŏk đei tơdrong pơngơ̆t đơ̆ng khŭl kơdră tơring, khŭl grŭp tơpôl păng lơ bơngai đei jơhngơ̆m ‘lơ̆ng lơ̆m kŭm nhen tơ̆ 'ngoăih dêh char Lâm Đồng. Mă đơ̆ng tơring mơmat tat dêh hlŏh ră mă lei đĭ đăng anih pơtho pơhrăm tơ̆ Sơn Điền đei man kơjăp 'lơ̆ng ngăl. Đe oh hŏk tro truh tơ̆ hnam trưng hăm hơbăn ao rơgŏh 'lơ̆ng, ƀĕnh jơhngơ̆m đon hiôk chơt.

Ƀok Vũ Đức Nhuần, Kơdră Anih vei lăng kon pơlei xăh Sơn Điền, pơma hơdăh: "Xăh Sơn Điền jĭ xăh pơmat tat mă lei tơdrong pơtho hŏk pơhrăm athei dơ̆ng lơ̆m grŭp rơgei kơ dêh char. Mă pơmat tat dang yơ kŭm athei pơjei băl pơtho mă 'lơ̆ng, hŏk mă rơgei nhen nơ̆r Ƀok Hô. Sơnăm hŏk 'nao dôm hnam trưng hlôi hơmet tôch 'lơ̆ng, mă loi hăm đe thây kô pơtho, kŭm đei jơhngâm đon hưch hanh 'nao. Nhôn pơjao ăn Anih vei lăng mŭk drăm pơ 'nhŏ hơdrol kon jên, tơgŭm mă tơtom ăn dôm hnam trưng mưh ƀôh đei tơdrong plơ̆ng dơ̆ng.”

Kŭm hăm hơmet hrĕnh ‘lơ̆ng ăn tơdrong pơtho păng hŏk đơ̆ng rŏng 2 giĕng mât hŏk sơnăm hŏk 'nao, Khul thây kô vei lăng tơ̆ 5 hnam trưng đơ̆ng jăl mâm non truh jăl ƀar tơ̆ xăh pơmat tat dêh hloh Sơn Điền, dêh char Lâm Đồng kŭm oei adrin bơ̆ jang kiơ̆ trong tơplih hăm kơmăy sô̆, akŏm ăn tơdrong iŏk yua kơmăy mă ‘lơ̆ng, tơmât yoa kơmăy phân mêm vei lăng pơtho pơhrăm, chih răk rim kơsô̆ kăl păng dôm kơmăy kơmŏk pơyua ăn tơdrong vei lăng, pơtho hŏk.

Hăm tơdrong ưh kơ măh kơsơ̆p hla ar hŏk, mă loi hăm lăm 9, ƀok thây Nguyễn Đình Tú, Thây hiê̆u trơng hnam trưng Jăl mônh-Jăl ƀar Gia Bắc, xăh Sơn Điền, ăn tơbăt, ƀât oei gô hla ar đơ̆ng anih tĕch chơ trŭh, hnam trưng kơchăng bơ̆ jang kiơ̆ mĭnh ƀar trong jang vă pơm ‘lơ̆ng ăn tơdrong hŏk pơhrăm kơ hŏk tro: "Ƀât mă kơsơ̆p hla ar hŏk 'măng mă 1 đei chơ đơ̆ng anih tĕch, hnam trưng klăih xong kiơ̆ kơsô̆ hŏk tro tơ̆ lăm. Pơtih gia nhen, minh khô̆i đei 100 kơsơ̆p noh axong dôm ăi băl ăn hŏk tro. Mă ƀar noh ăn hŏk tro ngôi hơdai, 1 kơƀang athei đei 1 kơsơ̆p hla ar lê̆ đe oh yua. Hnam trưng pơgơ̆r dôm 'măng hŏk grŭp vă gơh iŏk yua ‘lơ̆ng kơsơ̆p hla ar hŏk."

Đơ̆ng dôm 'măng sŏng xa tơ̆ hnam hŏk đei hơmet tôm tơmam, dôm lăm hŏk roi đunh roi 'lơ̆ng, truh tơdrong adrin đơ̆ng thây kô păng tơdrong vang yak hơdoi đơ̆ng khul kơdră pơgơ̆r tơring, mĕ ƀă hŏk tro, tơpôl, đĭ đăng tŏk bŏk oei tơgop pơjing đei minh sơnăm hŏk 'nao hăm lơ tơdrong chơt hơiă tơ̆ xăh pơmat tat dêh hloh Sơn Điền, dêh char Lâm Đồng. Hăm đon pơhnŏng "xăh pơmat tat mă lei pơtho pơhrăm athei rơgei", Sơn Điền oei dar deh pơm tơdrong pơngơ̆t, tơmơ̆t jên jang jing tơdrong jơnei đei yua ‘lơ̆ng tơ̆ rim lăm hŏk, rim 'măng sŏng xa păng rim năr năm hŏk đơ̆ng hŏk tro.