Kiơ̆ Hla bơar chih tơbăt bơ̆ jang pơvih pơvăn ăn kon pơlei, Khul kơdră Hơnih bơ̆ jang Pơvih pơvăn ăn Kon pơlei păng Dăr lăng athei Khul kơdră chĕp pơgơ̆r Teh đak akŏm chĕp pơgơ̆r pơrô̆ jang lơ tơdrong jang kăl nhen tĕnh koăng dăr lăng, pơm hơdăh tơdrong điêm pơlong môn Toán đei ƀôh hlĭch tơ̆ Tuyên Quang; atŏk kơtang iung tơjră hăm tơdrong pơm tơlĕch, tĕch mơdro tơmam drăm ya, tơmam sa ya, pơgang ya; atŏk kơtang tang găn hơlou, iung tơjră tang găn pơrang pơlŏ lĕch đe; xek tơlang pơm glăi lơ̆m bơ̆ jang Pơm tơlĕch kơsơ̆p hla bơar; sơđơ̆ng ‘lơ̆ng tang găn ŭnh sa, pĭt unh sa, gre kơdou trong đak păng xek tơlang keh đang rim tơdrong tơkêng dih băl lơ bơngai, đunh đai sơnăm.

Rŏ năng vă chă pơma, dôm nơ̆r athei iŏk đơ̆ng dômtơdrong đei ƀơm kơtă truh tơdrong đei iŏk yoa sa hơpăh păng tơdrong hơrih sa kơ kon pơlei. Lơ̆m ou, tơdrong tơmam ya, ‘nhĕm ‘nhot ya păng pơgang ya tŏk bŏk pơm ăn lơ tơdrong tơtăm kơ yuơ ưh khan lăp pơm kơnê̆ truh jơhngơ̆m jăn mă oei pơm ăn roi năr roi pă gan lui ngeh đơ̆ng bơngai răt yoa, pơm pơrăm truh hơnih mơdro sa jang sa tơpăt ‘lơ̆ng. Mă kăl, tơdrong vei lăng kơjă tĕch răt jei đei lơ  bơngai tang măt pơma truh. Kơdră chĕp pơgơ̆r Hơnih bơ̆ jang vei lăng Khoa hŏk, Kmăi kmŏk păng Cham char Nguyễn Thanh Hải akhan, kăl tơroi tơbăt mă hơdăh hloh dơ̆ng dôm tơdrong mă bơngai tăh hla tơtok găh kơjă tơmam drăm tĕch mơdro lơ̆m khei năr ou ki. "Bơngai tăh hla jei đei tơroi tơbăt lơ lou. Mưh kơjă đak xăng đak dou lơ̆m apŭng plĕnh teh tŏk, kơjă rim tơmam drăm tĕch mơdro jei tŏk druh kiơ̆ păng tôch tĕnh koăng dơ̆ng ... Mă lei mưh kơjă đak xăng đak dou tơjur ‘noh kơjă tĕch mơdro tơmam drăm tă ưh kơ tơjur dăh mă đei tơjur ră mă lei hiơ̆ hyĭn. Tơdrong tơm pơm ăn đơ̆ng yơ? Vei lăng găh kơjă, bơ̆ jang teh đak vei lăng tơdrong ou ‘noh lơ liơ păng hơnăp chiu pŭ lơ liơ?"

‘Nou jĭ tơdrong tơpă mă lơ kon pơlei ƀôh hơdăh lơ̆m tơdrong hơrih sa kơ ‘năr. Kơjă đak xăng đak dou hmă hmă đei lăng hơlen kiơ̆ đơ̆ng lơ̆m lơ hơnih jang, chơ pơdŭ. Mă lei, mưh kơjă đak xăng đak dou tơjur, lơ tơmam drăm kăl oei vei kơjăp kơjă măt, pơm ăn tơdrong răt sa kơ kon pơlei tim mă đei hơmet pơ ‘lơ̆ng tơgăl. Tơdrong mă ou tơlĕch ăn nơ̆r athei hăm rim hơnih bơ̆ jang vei lăng lơ̆m tơdrong atŏk kơtang dăr lăng hơlen tơdrong tĕch mơdro, tang găn gơ̆t pơ ‘ngơ̆m tơmam drăm, sơđơ̆ng ăn pơjei dih băl hơ iă tơpăt lơ̆m tơdrong tơlĕch kơjă.

Mĭnh tơdrong pơm ăn lơ bơngai lăng truh ‘noh tơdrong hlĭch găh điêm pơlong môn Toán tơ̆ ‘Măng pơlong lĕch ‘măng khoă jăl pêng sơnăm 2026 tơ̆ Tuyên Quang. Lơ̆m jơ ‘năr ‘măng pơlong tôch git kăl hăm kơ triu ‘nu hŏk tro păng ŭnh hnam, dôm tơdrong hlich jei kăl dăr lăng hơlen tơpăt, hơdăh vă sơđơ̆ng ăn tơdrong tơpăt hơdăh. Kơ iĕng Thủ tướng Teh đak Nguyễn Văn Thắng tơbăt biết: "Hăm dôm tơdrong mă kon pơlei lăng kơjăp nhen tơdrong pơgơ̆r ‘măng pơlong lĕch ‘măng khoă jăl pêng sơnăm 2026, đei ƀơm truh điêm pơlong môn Toán tơ̆ Tuyên Quang, Khul kơdră chĕp pơgơ̆r teh đak hlôi pơrô̆ athei Hơnih tơm vei lăng Hnam trương pơtho pơhrăm atŭm hăm rim hơnih bơ̆ jang ƀơm truh tĕnh koăng năm dăr lăng, hơlen hơdăh, tôm tong. Tơdăh ƀôh pơm glăi kăl sek tơlang kơhret kiơ̆ ƀlep tơdrong tơchơ̆t kơ Khôi luơ̆t, sơđơ̆ng  ăn tơdrong hơtŏ hơnơ̆ng dih băl hăm hŏk tro pơlong păng vei kơjăp jơhngơ̆m đon lui yom đơ̆ng kon pơlei hăm hơnih jang pơtho pơhrăm".

Nơ̆r pơrô̆ athei đơ̆ng Khul kơdră Teh đak tơƀôh hơdăh trong jang tơpăt ưh kơ veh ver, ưh kơ ôn hăm dôm tơdrong mă tơpôl lăng ba. Kơ yuơ atŭm hăm tơdrong xek tơlang ƀlep bơngai, ƀlep tơdrong glăi, tơdrong kăl hloh ‘noh hơmet pơ ‘lơ̆ng jơhngơ̆m đon lui yom đơ̆ng kon pơlei lơ̆m tơdrong tơpăt kơ khôi luơ̆t păng tơdrong hơtŏ dih băl lơ̆m pơtho pơhrăm.

Đơ̆ng dôm tơdrong đei pơma dơnuh tơ̆ ‘măng hop akom mă 4 kơ Hơnih chĕp pơgơ̆r Kuô̆k hô̆i rŏ năng đei ƀôh, bơ̆ jang pơvih pơvăn kon pơlei roi năr roi trŏ ƀlep lơ̆m tơdrong hơrih sa yan ou. Dôm nơ̆r pơma tơroi tơbăt, nơ̆r athei đơ̆ng bơngai tăh hla ưh khan lăp tơbăt ăn dôm tơdrong hơpơi ‘meh vă đơ̆ng kon pơlei mă oei jing “ ‘long pơtŏ” iŏk đei jơnei bơ̆ jang teh đak lơ̆m rim tơdrong jang.