Hnam 'nao să hloh 50 met vuông kơ unh hnam pơmai Dương Thị Thành, xah Ia Phí, dêh char Gia Lai tŏk bŏk man jê̆ keh đang. Ƀă pơmai sơ̆ vang akŏm iung tơblah ayăt ƀơm pơgang pơnhŭl huă hŏk, oei kơdih po pơmai noh ƀơm pơgang pơnhŭl da cam pơrăm pơm vĕ kơting kơdŭ rŏng. Lơ̆m prăt 20 sơnăm kơ ou, 3 mĕ kon hơrih lơ̆m hnam hyah hyok. Truh dang ei, gơnơm đei Teh đak atŭm hăm 'năr jang kơ đe kang ƀô̆ linh Đăi đô̆i 17, Trung đoan 48, Sư đoan 320, Kuân đoan 34, man đei hnam kơjăp 'lơ̆ng trŏ hăm tơdrong hơpơi 'meh. Pơmai Dương Thị Thành ƀrơ̆k kơ jơhngơ̆m tơroi: "Ƀô đô̆i man hnam ăn kơ kon pơlei tơnap tap nhen unh hnam inh ou, hăm tơdrong hơpơi đei minh bơbŭng hnam tơnŏ ning nai kơnh. Unh hnam inh sô̆ chơt, bơnê kơ Đảng uy păng jơnŭm pơgơ̆r tơring hlôi tơgŭm pơm hnam oei ăn mĕ kon inh vă inh păng đe kon đei tơdrong hơrih sơđơ̆ng ƀiơ̆"

Tơ̆ xah Ia Ly, unh hnam ƀok Nguyễn Văn Tân adoi oei hăt hot tŏk oei tơ̆ hnam 'nao. Jĭ bơngai vang iung tơblah sơ̆ ƀơm pơgang pơnhŭl huă hŏk, đe kon kơ ƀok adoi ƀơm răm ưh kĕ pơm jang. Hnam so man đơ̆ng 30 sơnăm hơdrol ki dang ei hlôi hư răm mă lei lơ sơnăm kơ ou unh hnam ưh kơ mah jên vă chă ming hơmet. Dang ei, hăm tơdrong tơgŭm đơ̆ng Teh đak, ƀô đô̆i, 'nhŏng oh păng kon pơlei kueng ƀôt, hnam 'nao tŏk bŏk đei man tenh kuăng keh đang hơdrol kơ pơyan 'mi. Ƀok Nguyễn Văn Tân ƀrơ̆k kơ đon ăn tơbăt: "Hnam so inh ou đei pơm đơ̆ng sơnăm 1996 noh hlôi hư răm. Adoi pŭn ai đei Đảng, Teh đak păng khŭl linh tơgŭm man ăn unh hnam minh pôm hnam 'nao kơjăp 'lơ̆ng hloh. Bơnê kơ Đảng, jơnŭm pơgơ̆r tơring păng khŭl linh hlôi tơgŭm unh hnam inh đei hnam oei tang găn 'mi kial, vă băt hơdah ưh đei bơngai ayơ ƀơm prơih lê̆ tơ̆ rŏng"

Đơ̆ng rŏng kơ tơdrong sô̆ hơ-iă kơ dôm unh hnam 'noh khei năr pơm jang hrat hrĭn kơ đe kang ƀô̆, khŭl linh. Đơ̆ng pơih lê̆ hnam so, sir teh man drơh hnam, chơ tơmam ming man, tuh ƀê tŏng... tôm adoi đei đe linh kơtă pơm jang, tơgop tơjur ƀiơ̆ jên hơpah bơngai jang ăn dôm unh hnam. Thiếu tá Phạm Văn Tạo, Kơdră Đăi đô̆i 17 ăn tơbăt: "Pơm kiơ̆ tơchơ̆t sut lê̆ hnam pơgia, hnam hyah hyok ăn bơngai vang tơblah sơ̆ mă đei kon ƀơm pơgang pơnhŭl huă hŏk, Trung đoàn 48 asong ăn rim tŏ hnam đei 7 kang ƀô̆ linh kơtang vang ming man. Nhôn pơkăp khŏm mă keh đang hrôih hloh khei năr tơchơ̆t tơlĕch, hơmet rim tơdrong tơnap tap vă keh đang 'lơ̆ng sơnong jang đei pơjao"

Pơm kiơ̆ tơchơ̆t đơ̆ng Jơnŭm pơgơ̆r teh đak gah tơgŭm sut lê̆ hnam pơgia, hnam hyah hyok ăn kon hơ-ioh kơ bơngai vang tơblah sơ̆ mă ƀơm pơgang huă hŏk, jơ̆p dêh char Gia Lai đei 79 unh hnam đei tơgŭm man 'nao păng hơmet ming hnam oei. Rim tŏ hnam tŏk bŏk jê̆ keh đang 'noh đei dơ̆ng minh bơbŭng hnam đei pơm đơ̆ng jơhngơ̆m đon tơguăt tơgŭm khŭl linh – kon pơlei.

Ƀok Võ Lê Xuân Thiện, Kơdră Hơnih jang vei lăng kon pơlei xah Mang Yang ăn tơbăt, đơ̆ng tơdrong tơgŭm man hnam oei 'nao, rim tơring adoi sơkơ̆t hơdah ou jĭ hơyak pơtơm vă rim unh hnam teh đak tơchơ̆t tơgŭm sơđơ̆ng tơdrong hơrih, brư̆ brư̆ hơtŏk jang mŭk drăm đơ̆ng rŏng đei hơnih oei kơjăp 'lơ̆ng:  "Tơ̆ tơring Mang Yang đơ̆ng rŏng kơ hơgrop dang ei đei 169 unh hnam teh đak tơchơ̆t tơgŭm, bơngai đei kŏng. Truh dang ei lơ unh hnam hlôi đei hnam oei sơđơ̆ng. Sơnăm 2026, tơring tŏk bŏk jang atŭm man đei 2 tŏ hnam kiơ̆ tơdrong jang đơ̆ng Hơnih tơm vei lăng Khŭl linh dêh char. Đơ̆ng rŏng kơ kon pơlei đei hnam oei sơđơ̆ng, xah gô pơtoi tơgŭm jang hơtŏk mŭk drăm, hơtŏk tơdrong hơrih"

Đơ̆ng tơdrong tơgŭm 'noh, tơdrong sô̆ chơt đei hơnih oei sơđơ̆ng tŏk bŏk oei truh hăm lơ unh hnam. Tơ̆ xah Mang Yang, hnam 'nao să 65 met vuông kơ 'nhŏng Nguyễn Văn Dũng – kon kơ bơngai vang tơblah sơ̆ ƀơm pơgang pơnhŭl huă hŏk tŏk bŏk jê̆ keh đang.

 Hăm unh hnam 5 'nu kơ 'nhŏng, 'noh ưh hơdrô̆ jĭ hơnih kơ-'nơp kơ tŏ 'mi kial mă oei jing hơnih gơnơm vă klo hơkăn sơđơ̆ng pơm jang, đe kon hiôk hian hloh lơ̆m tơdrong hŏk pơhrăm: "Klo hơkăn măr nhi hmach bơnê kơ Đảng, teh đak păng jơnŭm pơgơ̆r tơring hlôi man tơgŭm hnam oei, sơđơ̆ng pơm jang păng đe kon đei hơnih oei 'lơ̆ng vă hơdrin hŏk pơhrăm, ning mônh kơnh tơdrong jang pơyua ăn teh đak păng tơpôl"

Tơdrong tơblah hlôi đĭ đunh mă lei dôm tơdrong răm adoi oei ang bang lơ̆m tơdrong hơrih kơ lơ unh hnam. Kơyuơ noh, rim tŏ hnam 'nao đei ming man ưh hơdrô̆ tơgŭm ăn kon pơlei đei hơnih oei xa sơđơ̆ng mă oei bơ̆ng pang kăp gĭt ăn tơdrong jang "Nhă đak ƀlŏk kơ tu". Tơdrong jang pôk bơnê tŏk bŏk oei ƀôh bang lơ̆m rim bơbŭng hnam, rim tơdrong hơrih đei pơtoi dơ̆ng tơdrong sô̆ păng đon lui.