Tŏk bŏk khei 7, hnam ‘nao đơ̆ng yă Nguyễn Thị Nhường, tơ̆ phường Ea Kao hlôi tơtom pơm đang, ƀlep lơ̆m năr tơbăt 79 sơnăm năr Linh jĭ rơka Linh lôch tang ăn teh đak. Đei lơ̆m hơkâu ƀơm kơchơ̆t pơnhŭl pơgang điôxin đơ̆ng ƀă sư hlôi vang iung tơblăh sơ̆, tơdrong hơrih sa yă Nhường mơmat tat, lăp hơ pơi ‘meh đei đăi hnam oei kơjăp ‘lơ̆ng.

“Đei Đảng, Teh đak kŭm hăm dôm anih jang kơpal, anih jang khŭl grŭp tơgŭm ŭnh hnam man hnam ‘nao, unh hnam chhôk hơiă dêh. Hơpơi ‘meh băt dôm yơ sơnăm dang ei jing tơpă bơih. ‘Nâu jĭ tơdrong ‘lơ̆ng vă ŭnh hnam hơdrin, hơrih ‘lơ̆ng păng hơiă hloh”.

Tơdrong chơt hơiă ‘noh sa roi ‘lơ̆ng hloh ƀơ̆t dôm bơngai kơtă tơgop jơhngơ̆m pơm hnam oei ăn kơ yă ‘noh tă kơ dôm bơngai lĭnh Ƀok Hồ. Dôm năr âu ki, 10 kang ƀô̆, khŭl lĭnh Tiểu đoàn Đặc công 20, Lữ đoàn Đặc công bộ 198, Binh chủng Đặc công đei măt hơnơ̆ng tơ̆ hơnih man hnam. Đơ̆ng chơ bơ̆n chuơh, xi măng, sir mŏng truh tơgŭm ming man, khŭl lĭnh đặc công hlôi tơgŭm yă Nhường tơtĕnh man đang păng tơjur lơ jên jang. Thiếu tá Nguyễn Văn Duẩn, Chính trị viên phŏ Tiểu đoàn Đặc công 20 tơroi:

“Đơ̆ng rŏng iŏk hơnăp jang, nhôn hlôi vei kơjăp đĭ đăng ‘nhŏng oh băt hơdăh khŏm jang đang trŏ trong tơlĕch jang, tơgŭm duch ma đei hnam kơjăp, ‘lơ̆ng. Đơ̆ng rŏng kơ pơm đang, anih jang hơmet rơgoh pơđĭ hơnih vă ŭnh hnam mơ̆t oei hiôk hloh”.

Tơdăh hăm yă Nhường ‘noh tơdrong chơt hơiă găh mĭnh hnam ‘nao, ‘noh hăm yă Phạm Thị Ngân oei tơ̆ phường Tân An, lăp kăl kơ lăm hơnih ưh pă hngăt mưh rim ‘măng ‘mi jruh đĭ jơhngơ̆m hiôk bơih. Klo yă hlôi vang tơblăh vang, 2 ‘nu kon drŏ nglo tă kơ pŭ ƀơm ưh kơ ‘lơ̆ng yua đơ̆ng pơgang pơnhŭl điôxin. Mĭnh ‘nu đĭ lôch bơih, bơngai oei uơ oei dơ̆ng ‘noh hloh 40 sơnăm mă lei ưh kơ gơh chă yơ yak vih vơ̆t kơdih, rim tơdrong oei sa pơmơ̆ng pơđĭ lơ̆m mĕ ƀă kră.

Lăm hơnih bơngai kon hơrih sa lơ sơnăm âu ki đei hngăt, kơpal pơbŭng hư đĭ, tơ năr rơna phơ̆k. Đơ̆ng rŏng vă jê̆ 1 khei, hăm tơdrong mơ̆t jang đơ̆ng khŭl lĭnh kon pơlei, linh vei sơđơ̆ng tơ̆ tơring, Khŭl vei lăng kon pơlei jang chŭn păng Khŭl hơdruh tơdăm, hnam hlôi đei pơm hơmet pơđĭ đơ̆ng tang găn hrơm pơbŭng, pơm hơdrông hnam, tơsơng tơnăr truh hơmet ming cham hnam. Yă Phạm Thị Ngân hrĭ jơhngơ̆m tơroi:

 “Đei kơtơ̆ng păih khŭl lĭnh pơm hơmet ming hnam oei tơgŭm ‘noh tôch ưh kơ ê, yua kơ unh hnam đei trong vă jang athei kon ‘noh mơng bơngai jang, mă lei ŏng inh năm jang hơtăih tam mă gơh brŏk, pŭn dêh đei teh đak tơgŭm, chhôk hơiă dêh”.

Kiơ̆ kơ ƀok Nguyễn Công Thảo, Phŏ Kơdră Anih vei lăng kon pơlei phường Tân An, tơring dang ei đei vă jê̆ 480 ‘nu bơngai đei kŏng. ‘Măng ‘năr 27/7 sơnăm ‘nâu, kŭm hăm dôm tơdrong jang “Băt bơnê”, phường hlôi dăr hơlen păng tơlĕch ăn tơgŭm pơm hơmet ming hnam oei ăn kơ dôm bơngai đei tôm tơdrong hiôk. Hơdrô̆ hăm ŭnh hnam yă Ngân, tơring hơnơ̆ng krao hơvơn dôm bơngai đei jơhngơ̆m đon ‘mêm mơnat tơgŭm hơnơ̆ng.

“Anih vei lăng kon pơlei phường hlôi đei dăr hơlen chih akŏm roi tơbăt păng đei dêh char, Trung ương kĭ ăn pơm hơmet ming ăn kơ 2 ‘nu, mĭnh ‘nu 30 triệu vă pơm hơmet ming dơ̆ng 2 tŏ hnam vă vei sơđơ̆ng oei sa ăn 2 ŭnh hnam, tơdrong hơrih sa kơ đe sư sơđơ̆ng hiôk ƀiơ̆, ‘lơ̆ng ƀiơ̆. ‘Ngoăih kơ ‘noh, Anih jang Đảng, Anih vei lăng kon pơlei phường năm ngôi tơ̆ dôm bơngai đei teh đak tơgŭm, ‘ngoăih jên đơ̆ng Trung ương hăm dêh char tơlĕch ăn ‘noh phường kŭm iŏk jên jang asong tơmam mĭnh ŭnh hnam 200 rơbâu hlak jên."

Lơ̆m dêh char Đắk Lắk dang ei đei 42 ŭnh hnam ‘noh kon rơneh kơ bơngai vang iung tơblăh sơ̆ đei ƀơm ưh kơ ‘lơ̆ng đơ̆ng pơgang pơnhŭl điôxin đei tơgŭm hnam oei, ‘noh 22 tŏ hnam man ‘nao păng 20 tŏ hnam đei pơm hơmet ming. Vă jang đang hơdrol kơ ‘năr 27/7, rim anih jang khŭl linh hlôi hrơ̆ch iung jang đơ̆ng hơtuch khei 5. Kiơ̆ kơ ƀok Đào Mỹ, Phŏ Kơdră Anih vei lăng kon pơlei dêh char Đắk Lắk, tơdrong jang đang tơdrong jang hơdrol kơ ‘năr 27/7 ưh khan lăp vei sơđơ̆ng jang hrĕnh trong tơlĕch ăn mă oei jing tơmam ƀlŏk bơnê ‘lơ̆ng ‘măn ăn kơ dôm ŭnh hnam kon rơneh kơ bơngai vang iung tơblăh đei ƀơm ưh kơ ‘lơ̆ng pơgang pơnhŭl điôxin.

“Nhôn hơdrin jang đang tơdrong man dôm hnam âu păng ‘nâu kŭm jing vă pơlung dă ƀiơ̆ kơ ơh sơ ‘ngon hiong răm đơ̆ng bơngai ŭnh hnam kơ đe sư păng tơƀôh jơhngơ̆m đon Đảng hăm teh đak ling lang bơngơ̆t vei lăng ăn dôm bơngai đei kŏng hăm teh đak.”

Rim tŏ hnam pơm đang hơdrol kơ ‘năr 27/7 ưh khan lăp tơgŭm dôm ŭnh hnam đei hơnih oei kơjăp ƀiơ̆, mă oei jing tơƀôh hơdăh ăn tơdrong ƀlŏk bơnê đei tơƀôh hăm dôm tơdrong jang hơdăh ‘lơ̆ng. Ƀơ̆t dôm pơbŭng hnam đei pơm, dôm tơdrong hiong răm ơh sơ ‘ngon yua đơ̆ng tơblăh vang kŭm đei pơm pơhiôk jơhngơ̆m ƀiơ̆, vă kơ dôm ŭnh hnam đei ơh sơ ‘ngon đơ̆ng tơblăh vang đei dơ̆ng đon lui păng tưk tơiung hơnơ̆ng yak tŏk lơ̆m tơdrong hơrih sa.