Dôm năr âu, rim tơdrong jang ƀlŏk bơnê pơgơ̆r jơ̆p lơ̆m dêh char Đắk Lắk. Tơ̆ 12 hơnih iŏk kơmâu tơmam ADN đơ̆ng unh hnam linh lôch tang ăn teh đak yua đơ̆ng Kŏng an dêh char Đắk Lắk tơlĕch jang, tơdrong jang iŏk kơmâu đei bơ̆jang hăt hot, ‘lơ̆ng. Đại tá Võ Hùng Tường, Kơdră Anih Kanh sat Vei lăng bơ̆jang găh tơdrong sơđơ̆ng tơpôl, Kŏng an dêh char Đắk Lắk tơbăt, ‘ngoăih 12 hơnih iŏk dơnơ̆ng, anih jang oei hơmet ăn 12 grŭp bơ̆jang truh tơ̆ hnam dôm bơngai unh hnam linh lôch tang ăn teh đak sơnăm đĭ kră, jơhngơ̆m ưh pă jăng, ưh kơ gơh năm vih vơ̆t vă tơgŭm iŏk kơmâu.

“Nhôn tơlĕch jang hơnơ̆ng lơ̆m 4 năr, đơ̆ng ‘năr 23/7 truh 26/7. Hơdrô̆ năr mă blŭng tơlĕch jang, hăm tơdrong hơdrin bơ̆jang đơ̆ng rim khŭl lĭnh, nhôn hlôi iŏk đei 928 kơmâu, lơ̆m noh đei 15 ‘nu đei pơm tơ̆ hnam. Kơsô̆ blŭng a ‘noh 2.886 ‘nu păng oei hloh 2 năr dơ̆ng, kơsô̆ uơ oei dơ̆ng nhôn gô hơnơ̆ng akŏm jang đang iŏk kơmâu vă vei sơđơ̆ng 100% trong tơlĕch jang.”

 Kŭm hăm tơdrong jang iŏk kơmâu tơmam ADN pơgơ̆r hăt hot, tơdrong man hnam tơgŭm kon pơjing đe ƀô̆ đô̆i đei ƀơm pơnhŭl đơ̆ng pơgang điôxin kŭm đei tơlĕch jang kơtang lơ̆m khei 7 ‘nâu. ‘Măng âu, dêh char Đắk Lắk tơlĕch jang man ‘nao 22 tŏ hnam păng pơm hơmet ming 20 tŏ hnam pơjao kơ dôm ŭnh hnam. Tơdrong man ‘nao, pơm hơmet ming tơchĕng hơdrol jang đang hloi lơ̆m ‘năr 27/7 âu. Tơ̆ phường Ea Kao, tơring iŏk ‘mam ‘nao 2 tŏ hnam păng tơgŭm hơmet ming 1 pôm hnam. Thiếu tá Đỗ Anh Dũng, Chính trị viên phŏ Anih pơgơ̆r Khŭl linh phường Ea Kao, tơbăt, hăm tơdrong mơ̆t jang kơtang đơ̆ng pơđĭ khŭl jang chĭnh trĭ, tơdrong jang hlôi jang đang ‘lơ̆ng.

“Kiơ̆ lơ̆m trong jang ‘noh jĭ anih jang kơttă man, pơm hơmet ming hnam ăn kơ dôm bơngai kon pơjing vang iung tơblăh vang sơ̆ đei ƀơm pơgang pơnhŭl điôxin, Anih pơgơ̆r khŭl linh phường hlôi pơjing trong tơlĕch jang vang jang tơgŭm ăn Anih vei lăng kon pơlei phường tơlĕch jang bơ̆jang kiơ̆. Nhôn hơnơ̆ng jang hơdai hăm unh hnam, bơngai man ăn kơ dôm ŭnh hnam”.

Tơbăt 79 sơnăm năr linh jĭ rơka linh lôch tang ăn teh đak sơnăm ‘nâu, Anih vei lăng kon pơlei dêh char Đắk Lắk hlôi hơmet ăn 21,5 ti hlak jên đơ̆ng jên jang teh đak, pơjing 15 khŭl bơ̆jang pơgơ̆r năm ngôi apĭnh jet gia pơma dơnuh, pơlung păng pơjao tơmam truh 36.000 unh hnam teh đak tơgŭm. ‘Ngoăih kơ ‘noh, Đắk Lắk kŭm bơ̆jang kiơ̆ tơdrong pơjao tơmam đơ̆ng Kơdră teh đak truh 27.200 ‘nu bơngai teh đak tơgŭm lơ̆m dêh char, hăm akŏm jên jang 8,23 ti hlak jên. Ƀok Phan Đại Thắng, Phŏ Kơdră Anih jang Nội vụ dêh char Đắk Lắk tơbăt, pơđĭ dôm tơpu tơmam hlôi đei gơih truh Anih vei lăng kon pơlei 102 xăh, phường vă pơjao truh tơpang ti dôm unh hnam teh đak tơgŭm. ‘Ngoăih kơ ‘nŏh, Anih jang oei jang hơdoi hăm dôm khul linh đei ƀơm truh, hrơ̆ch tơlĕch jang lơ tơdrong tơgŭm, tơƀôh jơhngơ̆m đon ‘mêm băt ƀlep ƀât ‘năr 27/7.

“Dôm anih chĕp kơ̆l đảng, khul kơdră tơring tơ̆ dêh char Đắk Lắk vă pơgơ̆r soh nhang, ƀlŏk hơdơ̆r kơ đe linh lôch tang ăn teh đak tơ̆ dôm pơsat linh; hơmet ming pơ ‘lơ̆ng dôm anih chih Chư Teh đak chih kŏng tơ̆ jơ̆p tơring lơ̆m dêh char. Găh tơdrong jang 500 măng năr, sir chă, dônh akŏm, set hơlen, chih hơdăh hơnăn đe linh lôch tang ăn teh đak, Anih jang Nội vụ jang hơdai kơjăp hăm Anih chĕp kơ̆l pơgơ̆r khul linh dêh char păng dôm tơring pơgơ̆r chih hơlen, dônh akŏm kŭm nhen sir chă kơting linh lôch tang ăn teh đak.”