Lơ̆m ‘măng bơ̆ jang tơm đơ̆ng ‘năr 23 truh 26/7, Công an dêh char Lâm Đồng pơgơ̆r iŏk 1.521 kơmẫu ADN đơ̆ng kơtum kơtŏng, ‘nhŏng oh đe linh lôch tang ăn teh đak kiơ̆ pang găh mĕ. Tơdrong iŏk kơmẫu đei tơlĕch jang hrơ̆ch tơ̆ 16 anih lơ̆m dêh char păng 3 grŭp chă năm truh tơ̆ Hnam đe Mĕ Việt Nam nuih mơng, kơtum kơtŏng ‘nhŏng oh đe linh lôch tang ăn teh đak đĭ kră, pă jăng bơih mă ưh ‘nŏh pă kĕ yak vih vât bơih.

Đei măt đơ̆ng hrôih vă iŏk kơmẫu, yă Phùng Thị Huệ, kơtum linh lôch tang ăn teh đak Nguyễn Văn Thái, tơƀôh đon hơpơi ‘mĕh jăh chă đei hơnăn ăn ƀok vă unh hnam păng kon sâu pơm anih soi, soh nhang ƀlŏk hơdơ̆r: "Đon hơpơi ‘mĕh tih hlŏh đơ̆ng unh hnam ‘nŏh jăh chă đei trŏ hơnăn ƀok. Dang ei, pơsat hlôi đei kôch ƀŭ hơmet bơih mă tam mă đei hơnăn. Nhôn pôm hơpơi ‘mĕh mưh kon sâu truh sŏh nhang ‘nŏh băt trŏ anih, trŏ bơngai vă gơ̆h ƀlŏk hơdơ̆r".

Tơdrong chă iŏk kơmẫu ADN ưh lăp vă pơyoa ăn tơdrong chih răk, hơlen năng chih tơbăt hơnăn linh lôch tang ăn teh đak đĕch mă oei tơƀôh đon tơnăp, jơhngâm đon ‘mêm kơ eng hăm dôm bơngai hlôi lôch tang yoa tơdrong rơngei, hiôk hian kơ teh đak. Thượng tá Võ Xuân Bình, Phŏ Kơdră Anih Kanh sat vei lăng tơdrong sơđơ̆ng tơpôl, Công an dêh char Lâm Đồng ăn tơbăt, Khul linh công an krao akŏm tôch ai bơngai jang, tơmam drăm, kơmăy kơmŏk vă pơjing tơdrong ‘lơ̆ng hlŏh ăn kơtum kơtŏng ‘nhŏng oh linh lôch tang ăn teh đak truh iŏk kơmẫu vă set hơlen ADN: "Công an dêh char pơjing 16 anih chă iŏk kơmẫu ADN lơ̆m dêh char păng 3 grŭp jang chă năm truh tơ̆ rim hnam đe Mĕ Việt Nam nuih mơng, kơtum kơtŏng ‘nhŏng oh linh lôch tang ăn teh đak đĭ kră pă jăng bơih, yak vih vât pơmat tat. Nhôn adrin khŏm jang đang tơdrong jang trŏ năr hơgăt, pơm ‘lơ̆ng păng chih hơmet rim kơsô̆".

Rim kơmẫu ADN đei iŏk gô pơih đei dơ̆ng tơdrong ‘lơ̆ng vă gơ̆h chih hơdăh hơnăn ăn 1 ‘nu linh lôch tang ăn teh đak tam mă băt hơnăn, vang tơgop bơ̆ jang ‘lơ̆ng Tơdrong jang pơjing Anih mong gen linh lôch tang ăn teh đak păng pơm lăp hăm tơdrong hơpơi ‘mĕh đơ̆ng lơ unh hnam đơ̆ng rŏng dôm jĭt sơnăm gô chang kơtum kơtŏng ‘nhŏng oh vih dơ̆ng hăm pơlei pơla, chă đei dơ̆ng hơnăn kơdih./.