Khul sir chă, kôch iŏk kơting linh lôch tang ăn teh đak găh Anih chĕp kơ̆l pơgơ̆r khul linh dêh char Khánh Hòa jang hơdoi hăm dôm khul linh păng khul kơdră  tơring pơgơ̆r sir chă tơ̆ tơring kăn kư̆ kăch mang CK35, plei Từ Thiện, xăh Phước Dinh.

Kiơ̆ đơ̆ng noh, khul jang kơpal chă ƀôh, kôch iŏk đei 5 kơ̆l linh lôch tang ăn teh đak tam mă băt hơdăh hơnăn tơ̆ tơring CK35; atŭm hăm ‘nŏh kôch iŏk dơ̆ng 4 pơsat linh tam mă băt hơnăn tơ̆ dôm anih pha ra băl tơ̆ xăh. Dôm kơmâu kơting đơ̆ng 5 kơ̆l linh âu hlôi đei iŏk vă set hơlen ADN. Đơ̆ng rŏng kơ sir chă, kôch iŏk kơting linh đei chơ ba tơ̆ Anih ƀlŏk hơdơ̆r kơ linh lôch tang ăn teh đak xăh Phước Dinh; tơring păng khul jang kơpal hơnơ̆ng bơ̆ jang chih hơmet hla ar kiơ̆ tơdrong hơgăt, atŭm hăm ‘nŏh pơih xă anih sir chă tơ̆ dôm anih đei nơ̆r tơroi găh anih ƀŭ linh lôch tang ăn teh đak.