Tơ̆ tơring kon kông, teh oei, teh jang sa păng tơdrong jang oei jing dôm tơdrong đei kon pơlei, bơngai tăh hla lăng truh. Bơngai tăh hla Puih Kơk, oei lơ̆m pơlei Ia Grăng 1, tơring Ia Grai, dêh char Gia Lai, ‘meh vă Teh đak đei trong jang tơgŭm djru trŏ lăp hăm dôm ŭnh hnam tơnap tap.“Hơpơi teh đak lăng kơjăp truh teh oei păng teh jang sa kơ kon pơlei, mă kăl hăm dôm bơngai tơnap tap, pơjing tơdrong jang kơtă tơ̆ hnam, pơlei vă atŏk tơ iung mŭk drăm tơring”.

Atŭm hăm tơdrong lăng kơjăp truh tơdrong hơrih sa jang sa, bơngai tăh hla Rơ Mah Nhiên, oei lơ̆m pơlei Ia Răng 2, tơring Ia Grai, ‘meh vă đei dơ̆ng tơdrong jang kơtă, dă ƀiơ̆ đei tơdrong đe mơlôh năm jang tơ̆ hơtăih.“Tơdrong jang tơ̆ tơring ưh kơ đei, khul hơdruh tơdăm tơ̆ Gia Lai năm jang tơ̆ hơtăih tôch kơ lơ, tơdrong jang kơtă lơ̆m tơring ưh kơ đei. Hơpơi Đảng, Teh đak lăng ba truh tơdrong ‘nou vă tơgŭm ăn kon pơlei atŏk tơ iung mŭk drăm lơ̆m hơnô̆ hơnăp”.

Bơngai tăh hla Ndong Brừm, bơngai K’ho oei lơ̆m tơring Đam Rông 3, dêh char Lâm Đồng, hơpơi hơmŏ Kuô̆k hô̆i lăng ba kon jên tơmơ̆t jang atok tơ iung tơring kon kông, mă kăl găh trong hnam păng rim trong tơgum djru jang sa, hơrih sa.“Hơpơi Kuô̆k hô̆i lăng ba tơmơ̆t jên jang pơm trong nơnăm, hnam pơgang, pơtho pơhrăm păng tơgŭm djru jang sa ăn kon pơlei; klăh asong kon jên jang trŏ lăp vă rim tơring atŏk tơ iung lei lăi dih băl, tơgŭm ăn kon pơlei yak hloh dơnuh hin kơjăp ‘lơ̆ng”.

Dôm nơ̆r athei đơ̆ng tơring jei tơlĕch ăn nơ̆r athei pơm pơkeh trong tơgŭm djru groi teh, sơđơ̆ng đei iŏk yoa trŏ lăp kơ kon pơlei păng hơmet pơ ‘lơ̆ng tơhlăk tơhlĭn lơ̆m tơlĕch jang kiơ̆. Bơngai tăh hla H Nhip BKrông, hơdrung Êđê oei lơ̆m ƀuôn Cuôr, tơring Ea M’Droh, dêh char Đắk Lắk, ‘meh vă hrôih xek tơlang pơm ăn keh đang hla bơar pơm tơ-‘ngla teh.“Mĕ ƀă chă chrek ăn kơ ĭnh 4 sao teh tơjê̆ hơnih bơ̆ jang tơring vă choh jang sa, mă lei truh dang ei oei tim mă gơh pơm đei hla bơar pơm tơ-‘ngla teh. Ĭnh hơpơi đei xek tơlang keh đang vă teh ou đei hơnăn ĭnh, sơđơ̆ng jơhngơ̆m jang sa”.

Tơ̆ tơring tơter đak dơsĭ, bơngai tăh hla hơpơi rim tơdrong tơchơ̆t tơgŭm djru găh teh đak tơmơ̆t jên jang kăl lăng kơjăp dôm hơnih ming man kăl, hơmet pơ ‘lơ̆ng dôm tơdrong ưh kơ trŏ lăp gei đunh đai tai sơnăm, vei lăng năng tông kon pơlei tơ̆ hơnăp ‘mi kial pơrăm. Bơngai tăh hla Nguyễn Văn Mẹo, oei lơ̆m Koeng kơphô̆ Từ Nham, phương Sông Cầu, dêh char Đắk Lắk, athei hrôih tơmơ̆t jên jang ming man nak tang găn tih tơdrŭt hơlih.“Rim sơnăm, đak tŏk blai tôch kơtang, pơm ăn kon pơlei tơ oei pă sơ̆n dơ̆ng pă sŭk mưh truh pơyan ‘mi kial hơbŭt hơbông. Apĭnh athei Kuô̆k hô̆i, Trung ương lăng hơlen tơ iung pơjing ming man jih pơnơ̆ vă vei lăng năng tông sơđơ̆ng ăn kon pơlei”.

Hăm tơring đak dơsĭ, achon đak dơsĭ, tơchơ̆t hơtŏk mŭk drăm tơguăt hăm vei sơđơ̆ng tơpôl teh đak kŭm đei kon pơlei tah hla tơrĕk kăp gĭt. Ƀok Phạm Thanh Liêm, Kơdră Hơnih vei lăng kon pơlei tơring tơm Trường Sa, dêh char Khánh Hòa, pơtruh nơ̆r pơtoi chih keh đang tơchơ̆t jang hơtŏk mŭk drăm đak dơsĭ păng tơchơ̆t tơgŭm kăp gĭt ăn tơring achon đak dơsĭ:  “Hơpơi 'meh Kuô̆k hô̆i pơtoi chih keh đang tơchơ̆t jang vă hơtŏk mŭk drăm tơring đak dơsĭ, tơgŭm ăn kon pơlei jang ka, asong ming man hơnih jang ka. Hăm tơring tơm Trường Sa, hơpơi 'meh Kuô̆k hô̆i pơtoi tơgŭm chih keh đang tơchơ̆t tơgŭm kăp gĭt vă hơvơn bơngai jang hơgei, vă pơm jang hơtŏk mŭk drăm – tơpôl tơguăt hăm vei lăng sơđơ̆ng tơpôl teh đak”.

Kiơ̆ tơroi đơ̆ng Hơnih jang Trung ương Măt trâ̆n Tôh kuô̆k Việt Nam, hlôi đei hloh 2.800 nơ̆r tơgop pơtruh đơ̆ng kon pơlei tah hla, kon pơlei jơ̆p teh đak pơtruh ăn 'Măng hop akŏm mă 2, Kuô̆k hô̆i jăl 16. Kon pơlei tah hla păng kon pơlei jơ̆p teh đak oei pơngơ̆t kơ đon hăm tơdrong pơhlŭ pơhlôm hơlĕnh pơdăr lơ̆m mạng tơpôl, mă kăl noh tơdrong iŏk yua kơ̆l 'ngok tơchăr hơgei vă pơhlŭ kơtơ̆ng ang, chih akŏm tơdrong jang xa pơjĭp mŭk drăm; pơngơ̆t gah tơđrong rơgoh 'lơ̆ng tơmam drăm xa, tơdrong 'mê̆ 'mach cham char plenh teh; tơdrong pơm hla bơ-ar hanh chĭnh adar tơ̆ minh ƀar tơring... Bơngai jang lơ̆m Hơnih tơm Chĭnh trĭ, Kơdră Hơnih jang Trung ương Măt trâ̆n Tôh kuô̆k Việt Nam, Bùi Thị Minh Hoài pơtruh nơ̆r:“Pơtruh nơ̆r hăm Jơnŭm pơgơ̆r teh đak, rim hơnih jang kơpal kơ teh đak, rim tơring atŭm chă hơlen lăng vă dah tom ƀôh băt păng sek tơlang 'lơ̆ng dôm tơdrong pơm glăi gah tơmam drăm ya, pơm glăi gah tơchơ̆t vei rơgoh cham char; pơtruh nơ̆r hăm Kuô̆k hô̆i, Jơnŭm pơgơ̆r teh đak pơtoi pơgơ̆r chih akŏm tơchơ̆t khôi luơ̆t păng akŏm pơklaih dôm tơdrong tơnap tap, tơhlăk tơhlĭn gah teh, tơdrong hrŭ 'mong, tơgŭm hơnih oei xa 'nao, pơtơm tơdrong hơrih 'nao ăn kon pơlei mưh thu iŏk teh"

Dôm nơ̆r pơtruh đơ̆ng Tây Nguyên truh hăm rim tơring lơ̆m jơ̆p teh đak tơƀôh tơdrong hơpơi 'meh kăp gĭt đơ̆ng kon pơlei tah hla, atŭm hăm noh pơtruh nơ̆r vă Kuô̆k hô̆i pơtoi tơmơ̆ng, hơlen păng hơtŏk chă sek tơlang đei jơnei dôm tơdrong hlôi đei tơ̆ tơring, pơtrŏ hăm đon lui păng tơdrong hơpơi 'meh đơ̆ng kon pơlei.