Tơ̆ Hop akŏm tih, Kơdră chĕp pơgơ̆r Khul bơngai ‘lŏ kră Việt Nam Nguyễn Thanh Bình pơma hơdăh, đơ̆ng tơdrong joăt joe “Yom bơngai kră, lăng kăl hơrih sot”, tơdrong joăt “Nhă đak chăm kơ tu” truh tơdrong “sơnăm ‘lŏ kră, đon hlă roi kơtang”, bơngai ‘lŏ kră Việt Nam ling lang hơtŏk kơtang jơhngơ̆m đon kech mang, jơhngơ̆m đon ‘mêm kơ eng teh đak, hơnăp jang kơtang păng hơpơi ‘meh vă vang tơgop; tơgop jơhngơ̆m đon hơgei, tơdrong hlôh vao, tơdrong lui yom păng tơnăp lơ̆m tơdrong tơ iung pơjing păng vei lăng Teh đak.

Lăng dơ̆ng jăl jang ou ki, rim Khul bơngai ‘lŏ kră hlôi tơplih ‘nao trong jang, lăng kơtang tơ̆ tơring păng iŏk đei jơnei lơ̆m rim tơdrong. Bơ̆ jang tơ iung pơjing hơnih jang Khul hơnơ̆ng đei lăng ba; tơdrong jang vei lăng năng tông păng atŏk kơtang hơnăp jang kơ bơngai ‘lŏ kră đei lơ trong tơplih hơ iă.

Lơ trong jang hơ iă đei vei kơjăp, lang să nhen Khul rim jơhnơr tơgum djru dih băl; rim khul oei sa ‘lơ̆ng, joh ayŏ kơdŏ soang, tơplŏng kơdou pơhrăm akou jăn, vei lăng năng tông jơhngơ̆m pran jăng, vei lăng cham char păng tơgum djru hơrih sa. Tơdrong jang “Sơnăm ‘lŏ kră - Yă ‘lơ̆ng” hơnơ̆ng lang să, hăm kơtriu ‘nu bơngai ‘lŏ kră vang tơ iung pơjing Đảng, tơ iung pơjing khul jang chinh trĭ, xek tơlang tơ̆ tơring, pơtrŭt hŏk pơhrăm, pơtrŭt hơgei, vei lăng sơđơ̆ng, tơ iung pơjing tơring tơrang ‘nao, hơnih kơdrơ̆m gơh hơgei.

Lơ bơngai ‘lŏ kră hơdrin jang sa, pơm tơlĕch, tĕch mơdro; đei ƀôh dôm bơngai hơgei lơ̆m jang sa, atŏk tơ iung choh jang sa rơgoh ‘lơ̆ng. Dôm tơdrong tơgop đơ̆ng bơngai kră lơ̆m ŭnh hnam păng tơpôl roi năr roi đei ƀôh hơdăh hôn bơnê.

Lơ̆m khei ‘năr teh đak yak mơ̆t lơ̆m chăl atŏk tơ iung ‘nao păng măt bơngai ‘lŏ kră roi năr roi lơ, Kơdră chĕp pơgơ̆r Khul bơngai ‘lŏ kră Việt Nam pơma hơdăh, mĭnh lơ̆m dôm tơdrong tơm kăl hloh vă tĕch jang ‘noh atŏk tơ iung “mŭk drăm bơngai kră”, atŭm hăm tơdrong ‘meh vă roi lơ đơ̆ng bơngai kră găh tơdrong jang pơgang, vei lăng năng tông đunh đai, hnam oei, tơdrong oei sa joh ayŏ, tơmang pơhiơ̆, pơtho pơhrăm, kmăi kmŏk păng dôm tơdrong pơvih pơvăn trŏ lăp; tơplih kơtang đơ̆ng đon tơchĕng “vei lăng jơhngơm jăn” jing vei lăng năng tông, adoi atŏk kơtang hơnăp jang kơ bơngai ‘lŏ kră:“ ‘Noh jĭ mĭnh trong yak gĭt kăl hloh lơ̆m trong bơ̆ jang teh đak vă trŏ lăp hăm tơdrong măt bơngai ‘lŏ kră roi lơ; pơjing rơvơn hloh vă bơngai 'lŏ kră hơnơ̆ng đei plang ăn ‘lơ̆ng hơ iă. Atŭm hăm ‘noh, kăl tơ iung pơjing khul kang ƀô̆ Khul tơpă tơnăp, hơbĕch hơbal, đĭ jơhngơ̆m plang ăn, hơnăp jang kơtang, đei jơhngơm đon gơh hơgei; atŏk kơtang tơplih kơsô̆, tơplih rơgoh ‘lơ̆ng; atŏk kơtang iung jang hơdoi hăm rim kâp, rim hơnih jang vă jang kiơ̆ ‘lơ̆ng hloh dơ̆ng vei lăng năng tông păng iung jang ‘lơ̆ng hơnăp jang bơngai ‘lŏ kră lơ̆m chăl hle.”

Tơ̆ hơnăp hăm trŏ lăp măt bơngai ‘lŏ kră roi năr roi lơ, Kơdră chĕp pơgơ̆r Hơih bơ̆ jang Trung ương MTTQ Việt Nam Bùi Thị Minh Hoài pơma hơdăh, kăl tơplih ‘nao đon tơchĕng găh bơ̆ jang bơngai ‘lŏ kră, tơplih đơ̆ng lăng bơngai ‘lŏ kră jĭ dôm bơngai đei iŏk yoa sa hơpăh đơ̆ng teh đak tơgŭm ăn jing dôm bơngai vang iung jang atŏk tơ iung, pơjing rơvơn vă bơngai ‘lŏ kră hơnơ̆ng hơrih sa chơt hơ iă ‘nă hal, pran jăng grăng akou, hơrih đei iŏk yoa ăn tơpôl păng tơgop trŏ lăp hăm jơhngơ̆m kĕ jang, tơdrong ‘meh vă đơ̆ng kơdih.

Kơdră chĕp pơgơ̆r Hơih bơ̆ jang Trung ương MTTQ Việt Nam Bùi Thị Minh Hoài athei rim khul kơdră chĕp pơgơ̆r Đảng, kơdră chĕp pơgơ̆r tơring, MTTQ, rim tơpôl păng Khul bơngai ‘lŏ kră hơnơ̆ng pơm pơkeh trong bơ̆ jang, tơplih ‘nao trong jang, trong bơ̆ jang; lăng ba bơngai ‘lŏ kră hơrih sa tơnap tap, bơngai hơdro po, bơngai hơrih sa tơ̆ tơring tơnap tap, hơtăih hơtŏ, tơring kon kôngp; adoi pơjing rơvơn vă bơngai ‘lŏ kră vang tơgop nơ̆r tơ iung pơjing Đảng, tơ iung pơjing khul kơdră chĕp pơgơ̆r, pơtho tơbăt tơdrong joăt joe, sek tơlang tơring, vei lăng sơđơ̆ng dơ̆ng kơjăp păng tơ iung pơjing hơrih sa ‘lơ̆ng. Adoi tơbăt jơhngơ̆m đon lui yom rim đe ‘lŏ kră Việt Nam hơnơ̆ng jang kiơ̆ ‘lơ̆ng jơhngơ̆m đon “Sơnăm kră - yă ‘lơ̆ng”, atŭm hăm Đảng, hăm kon pơlei, hăm ƀô̆ đô̆i jang kiơ̆ tơdrong hơpơi ‘meh vă atŏk tơ iung teh đak pơdrŏng, gơh hơgei, hơnŭk hơnoa. Kơdră chĕp pơgơ̆r Hơih bơ̆ jang Trung ương MTTQ Việt Nam Bùi Thị Minh Hoài pơma hơdăh:“Jang kiơ̆ ‘lơ̆ng bơ̆ jang vei lăng năng tông păng iung jang ‘lơ̆ng hơnăp jang bơngai ‘lŏ kră; vei lăng năng tông, tơgŭm djru bơngai ‘lŏ kră hơrih sa tơnap tap, ưh kơ lê̆ bơngai ‘lŏ kră hơdrô̆ hơdrăn; hơlêm bơngai ‘lŏ kră atŏk kơtang jang kiơ̆ jơhngơ̆m đon gơh hơgei, dôm tơdrong hlôh vao, tơgop lơ̆m atŏk tơ iung mŭk drăm tơ̆ tơring păng teh đak, tơ iung pơjing khul tơgoăt tơgoăl pôm nơ̆r ƀơ̆r đon hơdrĕch hơdrung; pơm gơng tơroh kloh klĕch kơjăp ‘lơ̆ng ƀar păh Đảng, Teh đak hăm bơngai ‘lŏ kră. Khul kơdră chĕp pơgơ̆r Đảng, chĕp pơgơ̆r tơring rim kâp kăl pơjing rơvơn vă bơngai ‘lŏ kră hơnơ̆ng vang tơgop nơ̆r tơ iung pơjing Đảng, tơ iung pơjing khul kơdră chĕp pơgơ̆r, vei lăng sơđơ̆ng dơ̆ng kơjăp, tơ iung pơjing hơrih sa ‘lơ̆ng hơ iă păng hơmet pơ ‘lơ̆ng khul tơgoăt tơgoăl pôm nơ̆r ƀơ̆r đon hơdrĕch hơdrung”.