Dang ei jơ̆p teh đak đei jê̆ 25 triu 'nu hơ-ioh. Tôm đe hơ-ioh noh hơla 6 sơnăm păng đe hơ-ioh oei xa tơgŭm rim khei đơ̆ng tơpôl đei teh đak đŏng ăn jên ƀao hiêm khăm hơmet jĭ; tơdrong tơchơ̆t ƀet pơgang bơ̆ng jĭ pơih să kơ teh đak đei yua hăm tôm pơgang vaccine kăl, ƀet bơ̆ng jĭ ăn tôm đe hơ-ioh hơla 1 sơnăm đei jơnei 97%; đe hơ-ioh 5 sơnăm hŏk lăm mou yăo. Teh đak ưh iŏk jên hŏk hăm đe hơ-ioh hŏk jăl mâm non, hŏk tro jăl phôh thŏng, bơngai hŏk tơdrong pơtho pơhrăm phôh thŏng kơ teh đak păng tơgŭm jên hŏk hăm đe hơ-ioh hŏk jăl mâm non, hŏk tro jăl phôh thŏng, bơngai hŏk kiơ̆ tơdrong pơtho pơhrăm jăl phôh thŏng tơ̆ hnam trưng tơ-'ngla pơm tơm.

Đe hơ-ioh đei tơdrong hơrih tơnap tap xa tơdrong tơgŭm trŏ ƀlep hăm tơdrong kăl kơ hơtŏk mŭk drăm – tơpôl kơ tơring. Tơdrong jang vei lăng đe hơ-ioh đei 3 jăl noh: tang găn, tơgŭm, tơkan hlôi păng tŏk bŏk đei pơm jang tơnăp. Ah hop akŏm, rim dêh char, pơlei tơm adoi pơma đam gah dôm tơdrong jang đei jơnei lơ̆m vei lăng đe hơ-ioh tơ̆ tơring; adoi nhen tơlĕch trong jang vă vei lăng đe hơ-ioh tôm tơdrong hloh. Pơtôch hop akŏm, Phŏ Thủ tướng Phạm Thị Thanh Trà hlôi tơƀôh hơdah dôm tơdrong oei đei, tơdrong teh tôn păng pơrăm đe hơ-ioh adoi oei ƀôh lơ; tơdrong chă yua mạng tơpôl vă pơhlŭ pơhlôm đe hơ-ioh roi năr roi krưp... Phŏ Thủ tướng akhan: pơtoi keh đang tơchơ̆t tơgŭm vă tôm tong gah sơnong kơ đe hơ-ioh, kơchăng tang găn dôm tơdrong răm truh hăm đe hơ-ioh.