VOV4.Bahnar - Tơ drong kơ tơ̆ng ang ‘năr dơ̆ng ‘năr 11/5 đơ̆ng Anih tơm vei lăng găh tơ drong jang pơ gang tơ băt đei dơ̆ng 18 ‘nu jĭ COVID-19, lơ̆m noh đei 2 ‘nu mơ̆t đơ̆ng teh đak đe hlôi ăn oei hơ drô̆, 16 ‘nu đei lơ̆m teh đak adoi jing dôm bơ ngai lơ̆m hơ nih ăn oei hơ drô̆, hơ nih đei pơ vang găn. 2 ‘nu đei ăn oei hơ drô̆ hloi đơ̆ng rŏng kơ mơ̆t lơ̆m teh đak bơ̆n tơ̆ Đồng nai. 16 ‘nu jĭ đei lơ̆m teh đak, lơ̆m noh đei 10 ‘nu tơ̆ Bắc Giang, 2 ‘nu tơ̆ Hà Nội, 2 ‘nu tơ̆ Quảng Trị, 1 ‘nu tơ̆ Bắc Ninh păng 1 ‘nu tơ̆ Hải Dương. Jô̆ truh 12 jơ ‘năr dơ̆ng ‘năr 11/5, Việt nam đei akŏm đĭ đăng 2.071 ‘nu đei lơ̆m teh đak păng 1.436 ‘nu đơ̆ng teh đak đe. Kơ sô̆ bơ ngai jĭ ‘nao jô̆ đơ̆ng ‘năr  27/4 truh dang ei: 501 ‘nu. Kơ dră Anih tơm vei lăng găh tơ drong jang pơ gang Nguyễn Thanh Long tơ roi, lơ̆m khei ‘năr jĭ COVID-19 hrei ‘nâu, athei lăng hơ len lăng ‘noh jĭ 1 lơ̆m dôm tơ drong jang tơm, tơ tĕnh jang kiơ̆. Kơ dră tơm tơ băt, bơ̆n oei lơ̆m tơ drong krê hơ mơt păng tơ drong tơ poh jĭ đơ̆ng virus kơ tang.

Thuem: Tơ blơ̆