VOV4.Bahnar - Khei ‘năr âu ki đei nơ̆r tơ roi găh tơ drong 17ha bri ‘long, tơ̆ tơ ƀôt 726, găh xăh sơ lam Ia Dal, apŭng Ia H’Drai, dêh char Kon Tum đei kon pơ lei kŏh phă vă iŏk tĕh choh jang xa păng ‘nao đei set hơ len tơ jê̆ âu. Tơ drong kăl pơ ma ‘nŏh mưh sek tơ lang ‘nŏh đei ƀôh lơ tơ drong ưh kơ ê, nhen hơ găt tĕh đei kŏh phă ưh kơ sĭ bri ‘long, kŭm ưh đei chih hơ dăh anih vei lăng tĕh âu. Tơ̆ lơ hơ găt tĕh xă 17 ha âu, kon pơ lei pơ tăm ƀum păng ‘long điêu. Lơ̆m nŏh, đei tơ ƀôt hlôi pơ tăm 2,3 sơ năm ‘nâu, kŭm đei tĕh ‘nao kŏh phă, ‘nao pơ tăm.

‘Long bri đei kŏh phă vă iŏk tĕh choh jang xa

Tơ drong 17ha bri tơ̆ xăh Ia Dal, apŭng Ia H’Drai, dêh char Kon Tum đei kŏh phă vă iŏk tĕh choh jang xa hlôi đei ƀok Bí thư đảng dêh char Kon Tum Dương Văn Trang athei pơm hơ dăh đơ̆ng blŭng khei 6. Mă lei vă jê̆ 1 khei hlŏh bơih, nơ̆r tơ roi đơ̆ng dôm anih ƀơm truh oei tam mă rơ đăh kiơ. Tơ drong đei tơ pă tơ̆ âu ưh gơ̆h ôn ‘nŏh lơ tơm ‘long bri đei kŏh phă, sŏh pơm mir păng tơ drong đei đunh bơih mă lei ưh đei tang găn, sek tơ lang tơ tom.

Dơ̆ng: Tơ blơ̆