VOV4.Bahnar - Ƀât mă lơ tơ drong jang unh điên kial tơ̆ Tây Nguyên tơ ƀâp mơ mat tat mưh hrŭ jên, chưk pơ ‘ngoăih tĕh, hăm lơ tơ drong tơ gar băl păng ưh sơ đơ̆ng, ‘nŏh tơ̆ apŭng Ea H’Leo, dêh char Dak Lak hlôi iŏk đei jơ nei hăm lơ tơ drong jang hơ drol. Kơ jă mŭk drăm đơ̆ng dôm tơ drong jang năm hơ doi hăm tơ drong đei yoa ăn tơ pôl; rơ đăh rơ đong, băt mơ̆ng nơ̆r, pơm kiơ̆ luơ̆t, ‘nŏh jĭ dôm tơ drong tơm vă bơ ngai tơ mât jên jang, khul kơ dră tơ ring păng kon pơ lei iŏk đei tơ drong drơ̆ng nơ̆r, tơ gŭm ăn tơ drong jang hơ nhăk ba tơ drong đei yoa găh mŭk drăm, tơ pôl, pơih trong vă sơng iŏk, tơ lĕch jang dôm tơ drong jang pơm unh điên hăm kial đơ̆ng rŏng dơ̆ng, tơ iung tơ drong pran tơ̆ tơ ring.

Hnam ‘nao man xă 100 m2 kơ unh hnam mŏ Phan Thị Hồng Phượng tơ̆ thôn 5, xăh Đliê Yang, apŭng Ea H’leo, hơ tăih kơ dôm jrăng unh điên kial đơ̆ng tơ drong jang pơm unh điên hăm kial Tây Nguyên lăp 2,3 hrĕng met đĕch. Hnam ‘nâu adrol sơ̆ tơ ‘ngot pơm hơ drô̆ kơ pal kông mă lei dang ei gơ nơm tơ drong jang pơm unh điên hăm kial pơm trong brih hnam kơ na jing tôch ‘lơ̆ng.

Klo kăn mŏ Phượng tơ gĕch iŏk anih ‘lơ̆ng âu vă pơm anih tĕch mơ dro, pơ tăm dơ̆ng tơm ‘long jŭm dăr pơ gar păng adrol kơ hnam vă tơ moi chă phĭn ngôi jê̆ jrăng điên kial: “Đơ̆ng năr pơm jrăng điên đang, kon pơ lei tơ̆ thôn 5 đei xa yoa lơ yoa đơ̆ng đei trong bê tông yak vih vât. Tam mă jô̆ truh tơ drong, adrol sơ̆ tơ̆ âu tôch pơ sĕl hui đei bơ ngai truh mă lei dang ei tơ moi truh ngôi tôch lơ. Đe sư chă tơ lang lăng, phĭn bơ̆n rup jê̆ jrăng điên păng phĭn ngôi cham char tơ̆ âu. Yoa thoi noh tơ drong arih xa tơ̆ âu tơ plih ‘nao bơih, gơ nơm đơ̆ng tơ drong jang pơm unh điên hăm kial âu.”

Tơ drong jang pơm unh điên đơ̆ng kial Tây Nguyên jĭ tơ drong jang tơ mât unh điên lơ̆m tơ lei unh điên tĕh đak mă blŭng tơ̆ Tây Nguyên

Tơ drong jang pơm unh điên hăm kial Tây Nguyên tơ̆ xăh Đliê Yang, apŭng Ea H’Leo, ‘nŏh jĭ tơ drong jang pơm unh điên hăm kial mă blŭng tơ̆ Dak Lak păng tơ̆ tơ ring Tây Nguyên, yoa grŭp jang HBRE tơ lĕch đơ̆ng sơ năm 2017. Ƀok Nguyễn Hoàng Hiệp – Phŏ Kơ dră vei lăng tơ drong jang ăn tơ băt, tơ drong jang đei kơ sư̆k 28,8 MW, đei 12 jrăng turbin, ƀơm truh tơ drong chưk pơ ‘ngoăih tĕh păng tơ mam drăm kơ 84 unh hnam kon pơ lei. ‘Nâu jĭ tơ drong jang đei lơ mơ mat tat. 84 unh hnam đei 84 đon tơ chĕng pha ra băl. Tơ dăh ưh đei sek tơ lang ‘lơ̆ng ‘nŏh gô đei nơ̆r pơ ting băl, tơ kêng tơ hlâu, găn lê̆ tơ drong bơ̆ jang. Hăm tơ drong vang yak hơ doi đơ̆ng dôm khul kơ dră tơ ring păng đon adrin, ‘lơ̆ng đơ̆ng anih tĕch mơ dro, dôm tơ drong tơ hlăk mưh chưk pơ ‘ngoăih tĕh đei sek tơ lang ‘lơ̆ng. Tơ drong jang đei bơ̆ jang ming man hiôk sơ đơ̆ng păng pơm tơ lĕch unh điên lơ̆m khei 11 sơ năm 2019.

Ƀok Hiệp pơ ma: “Dơ nŏ anih vei lăng kon pơ lei apŭng pơ jing Khul jang tơ gŭm hrŭ jên chưk pơ ‘ngoăih tĕh vă tơ gŭm ăn anih tĕch mơ dro. Lơ̆m khei ‘năr pơ gơ̆r jang, anih jang vang jang hơ doi hăm Anih vei lăng tĕh kơ dêh char, apŭng tơ lĕch trong hrŭ ‘mong jên tĕh. Đĭ đăng kơ sô̆ hrŭ ‘mong đei pơ klĕm tôch rơ đăh. Dơ nŏ anih vei lăng kon pơ lei dôm xăh lăng kiơ̆ sô̆ unh hnam đei hrŭ ‘mong tĕh, kơ sô̆ tĕh đei ƀơm truh păng tơ mam drăm kơ pal tĕh ‘nŏh dôm yơ đang kơ ‘nŏh tơ roi ăn anih jang kơ pal kĭ păng đang kơ ‘nŏh lăng kiơ̆ hla ar chih âu vă kla jên tĕh ăn kon pơ lei.”

Đơ̆ng rŏng kơ tơ drong jơ nei đơ̆ng tơ drong jang pơm unh điên hăm kial Tây Nguyên, Ea Hleo tơ lĕch dơ̆ng 1,2 tơ drong jang nai, tih hlŏh 14 ‘măng tơ drong jang blŭng a. ‘Nŏh jĭ tơ drong jang Hnam kơ măy unh điên kial Ea Nam, yoa Grŭp jang Trung Nam tơ mât jên jang.

Kiơ̆ ƀok Nguyễn Văn Hà – Kơ dră vei lăng kon pơ lei apŭng Ea H’leo, tơ drong nol hăm tơ drong jang ‘nao âu tôch tih yoa athei sek tơ lang hăm lơ tơ drong lăp lơ̆m 11 khei đĕch, đei lơ̆m khei ‘năr đei jĭ Covid-19 dơ̆ng. Hăm lơ tơ drong mơ mat tat, mă loi jĭ tơ drong hrŭ ‘mong jên tĕh păng tơ drong hơ găt khei ‘năr ming man, anih tơ mât jên jang ƀâp lăp năm jrŏk trong, ‘mĕh năm răt kơ dih tĕh kon pơ lei, nhen hlôi đei tơ̆ lơ tơ drong jang pơm unh điên hăm kial tơ̆ dôm tơ ring nai. Gơ nơm vang jang kơ chăng, jang tơ năp đơ̆ng dôm khul kơ dră tơ ring, khul grŭp tơ pôl hlôi tơ gŭm ăn anih jang hơ met pơ ‘lơ̆ng mơ mat tat, tơ hlăk tăk. ‘Nâu jĭ tơ drong mă lơ tơ drong jang nai đa tơ ƀâp, dang ei oei tơ ƀâp mơ mat tat vă sek tơ lang pơ ‘lơ̆ng.

Dôm tơ drong jang pơm unh điên hăm kial gô hơ nhăk iŏk yoa lơ ăn jên mong kơ tĕh đak

Ƀok Nguyễn Văn Hà tơ roi, vă tơ drong jang gơ̆h đei jơ nei, kăl đei anih tơ mât jên jang mă tơ păt, khul kơ dră tơ ring pơ ma năm hơ doi hăm jang hloi, jang kiơ̆ trong rơ đăh rơ đong, pơm kiơ̆ nơ̆r pơ kăp. Hăm apŭng Ea H’Leo, ‘nŏh jĭ tơ drong pơih blŭng vă hơ nơ̆ng sơng iŏk, tơ lĕch jang dôm tơ drong jang nai dơ̆ng, năm truh tơ drong iŏk yoa đĭ tơ drong ‘lơ̆ng găh unh điên kial truh 3.000MW tơ̆ tơ ring.

Ƀok Nguyễn Văn Hà pơ ma: “Jăl mă blŭng, lơ kon pơ lei tơ jră, đe sư ưh chu. Nhôn gơ nơm kơ đe kră pơ lei, ƀok pơ gơ̆r pơ lei, bí thư chi ƀô̆ dăh mă dôm bơ ngai đei đe lui yom vang jang hơ doi hăm kăn ƀô̆ xăh, kơ dră chĕp kơ̆l apŭng jur pơ ma nuh, tơ blang tơ ƀôh ăn kon pơ lei tơ drong yơ đei yoa, tơ drong yơ ưh đơ̆ng trong jang tih kơ dêh char, apŭng. Mưh tơ blang đang, kon pơ lei hlôh vao păng lăp đon chu pơm kiơ̆ trong jang. Tơ̆ apŭng Ea H’leo đơ̆ng sơ̆ truh dang ei tam đei tơ drong tơ gar băl đơ̆ng kon pơ lei hăm anih jang pơm unh điên hăm kial. ‘Nŏh jĭ tơ drong adrin đơ̆ng nhôn, tơ drong ‘nâu tơ gop ăn tơ drong jơ nei đơ̆ng dôm tơ drong jang pơm unh điên hăm kial tơ̆ tơ ring.”

Hrei ‘nâu, Ea H’Leo hlôi jing um ai kơ 1 tơ ring pơm unh điên kial tơm tơ̆ Tây Nguyên hăm vă jê̆ 100 tŏ jrăng, pơm tơ lĕch dang 1 ti 300 triu KWh unh điên 1 sơ năm. Kŭm hăm tơ gop kơ hrĕng ti hlak jên 1 sơ năm ăn jên mong kơ tĕh đak tơ̆ tơ ring, pơ truh dơ̆ng unh điên ăn tĕh đak, ‘nŏh dôm tơ drong jang oei pơm đei hlŏh 60km trong bê tông pơ yoa ăn tơ drong arih xa păng jang xa kơ kon pơ lei, tơ gŭm man 13 tŏ hnam hŏk hôp, jŏh ayŏ kơ dŏ xoang păng hnam ăn bơ ngai tơ nuh… Tơ drong jơ nei đơ̆ng dôm tơ drong jang pơm unh điên hăm kial tơ̆ Ea H’Leo ‘nŏh gơ nơm đơ̆ng jên jang kơ jăp, đon jang tơ năp, hơ nơ̆ng pơ ma ‘nŏh bơ̆ jang hloi, pơm ‘lơ̆ng ăn tơ drong jang păng tơ drong đei yoa đơ̆ng rim pang.

Dơ̆ng: Tơ blơ̆