VOV4.Bahnar - Năr ‘nâu (07/07), vă jê̆ 1 triu ‘nu hŏk tro lơ̆m tĕh đak mât lơ̆m năr thi mă blŭng kơ ‘măng thi tốt nghiệp THPT 2021 đơt 1, hăm 2 môn thi ‘nŏh Ngữ văn păng Toán. Til pơ gê, 7h30 pơ nĭt hŏk tro pơm ƀai thi môn Ngữ văn, kiơ̆ trong chih kơ dih, jơ pơm ƀai 120 pơ nĭt. Tơ̆ kơ sơ̆ thi môn Toán, kiơ̆ trong trắc nghiệm, jơ pơm ƀai 90 pơ nĭt. Adrol kơ ‘nŏh kơ sơ̆ brei, đe ŏh hŏk tro hlôi truh tơ̆ dôm anih thi vă pơm hla ar mât thi, hơ met ming dôm tơ drong ưh kơ lăp (tơ dăh đei), mơ̆ng roi tơ băt găh tơ drong hơ găt thi, jơ năr thi.

Yoa tơ drong jĭ Covid-19 oei tôch hơ mơt kơ na rim anih thi adoi pơ hrăm jang kiơ̆ ‘lơ̆ng dôm trong tang găn jĭ, hơ met tôm pơ gang, tơ mam vă tang găn jĭ nhen: che gom, đak pơ gang pơ lôch pơ rang jĭ, đak ôp ti păng chih pơ klĕm lơ chư chih găh tơ drong tang găn jĭ... Vă tơ drong thi gơ̆h pơ gơ̆r sơ đơ̆ng ‘lơ̆ng, Phŏ Kơ dră tơm vei lăng pơ tho pơ hrăm Nguyễn Hữu Độ - Kơ dră Anih pơ gơ̆r jang kơ tĕh đak găh ‘măng thi tốt nghiệp THPT sơ năm 2021 tơ tă: dôm anih thi athei roi tơ băt ăn kăn ƀô̆, thây kô lăng thi, hŏk tro hơ tŏk đon tơ năp, pơm kiơ̆ ‘lơ̆ng dôm tơ drong hơ găt lơ̆m dôm năr thi vă huei đei tơ drong glăi kiơ.

Test hrĕnh pơ rang jĭ SARS-CoV-2 ăn hŏk tro tơ̆ Dak Lak

Lơ̆m 2 năr ‘năr 5 păng 6/7, Anih vei lăng jang pơ gang Dak Lak hlôi pơ gơ̆r hơ len lăng hrĕnh yŏng jĭ SARS-CoV-2 ăn kơ 150 ‘nu ‘noh jĭ thây kô lăng thi, dăr lăng, bơ ngai pơ vih pơ văn ăn ‘măng thi păng hơ len lăng hrĕnh ăn kơ hloh 500 ‘nu hŏk tro vang thi tốt nghiệp THPT tơ̆ hơ nih thi Hnam trưng THPT Lắk, Thị trấn Liên Sơn, apŭng Lắk. ‘Nâu jĭ apŭng đei bơ ngai jĭ Covid 19 đei chă ƀôh ƀơm truh hơ nih jĭ pơ lei tơm Hồ Chí Minh păng tŏk bŏk ăn oei hơ drô̆ hơ met jĭ. Truh jơ năr âu đĭ đăng dôm pham hơ len lăng adoi ăn ư̆h kơ ƀôh đei jĭ. Mă lei vă vei sơ đơ̆ng ‘măng thi pơ gơ̆r sơ đơ̆ng tang găn jĭ Anih vei lăng jang pơ gang Dak Lak pơ jao kơ Hnam pơ gang apŭng  Lắk jang hơ dai tơ lĕch jang kiơ̆ vei sơ đơ̆ng ‘lơ̆ng tơ drong jang tang găn jĭ COVID-19 lơ̆m prăt jơ năr pơ gơ̆r thi tốt nghiệp THPT lơ̆m tơ ring.

            Dơ̆ng hăm Thuem: Tơ blơ̆