VOV4.Bahnar - Đơ̆ng rŏng kơ hop akŏm mă 10 Kuô̆k hô̆i jăl XIV truh dang ei, Khul kơ dră chĕp kơ̆l Anĭh Trung ương Mặt trận Tổ quốc Việt Nam jang hơ doi hăm Anĭh chĕp kơ̆l pơ gơ̆r Kuô̆k hô̆i chih akŏm đei 2.278 nơ̆r pơ ma, apĭnh đơ̆ng bơ ngai tăh hla păng kon pơ lei lơ̆m tĕh đak gơih ăn hop akŏm mă 11 Kuô̆k hô̆i jăl XIV.

Kiơ̆ Kơ dră Anĭh Trung ương Mặt trận Tổ quốc Việt Nam Trần Thanh Mẫn, bơ ngai tăh hla păng kon pơ lei hơ nơ̆ng tơ ƀôh đon pơ ngơ̆t tơ̆ hơ năp tơ drong tơ plih krê hơ mơt đơ̆ng jĭ COVID-19, dôm tơ drong ƀơm ưh ‘lơ̆ng đơ̆ng jĭ truh tơ drong jang xa, tĕch mơ dro păng tơ drong arih xa kơ kon pơ lei, mă loi ‘nŏh tơ̆ dôm tơ ring đei jĭ; krê pơ ngơ̆t tơ̆ hơ năp tơ drong bơ ngai mât lĕch glăi lơ̆m tĕh đak Việt Nam păng chih tơ roi găh jơ hngâm jăn ưh kơ trŏ.

Athei Kuô̆k hô̆i, Khul kơ dră tĕh đak, dôm anĭh tơm, anĭh jang kơ pal, tơ ring tơ rang hơ nơ̆ng jang ‘lơ̆ng tơ drong jang tơ iung ming păng hơ tŏk mŭk drăm, vei sơ đơ̆ng tơ drong arih xa tơ pôl ƀât mă jĭ COVID-19 oei tơ pŏh tôch hơ mơt hrei ‘nâu; hơ met pơ ‘lơ̆ng dôm tơ drong ưh kơ lăp găh pơ tho pơ hrăm, jang pơ gang, jŏh ayŏ kơ dŏ xoang-tơ pôl; vei lăng tĕh păng vei lăng cham char păng bơ̆ jang đei yoa hlŏh dơ̆ng tơ drong tang găn xa pơ jĭp, pơ huach kư̆ kă…

Dơ̆ng: Tơ blơ̆