VOV4.Bahnar - Kơsơ̆ năr brei, năr 21/5, Jơnŭm vei lăng Pôk rơ̆ih tĕh đak hlôi pơgơ̆r hop akŏm tơbăt hăm khŭl chĭh kơtơ̆ng ang, tơroi tơbăt dơ̆ng mĭnh ƀar tơdrong găh bơ̆ jang hơmet ăn năr pôk rơ̆ih Kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei jăl jang 2021 - 2026.Tơ̆ hop akŏm tơbăt, tang măt ăn Jơnŭm vei lăng Pôk rơ̆ih tĕh đak tơbăt, trŭh dang ei rim tơdrong jang hơmet ăn năr pôk rơ̆ih hlôi keh đang, sơđơ̆ng ƀlep nơ̆r pơkăp, hơmet đang ăn năr pôk rơ̆ih. Tơ̆ 16 dêh char, pơlei tơm lơ̆m tĕh đak hlôi pơgơ̆r tăh hla hrôih tơ̆ mĭnh ƀar hơnĭh, bơ̆ jang pôk rơ̆ih jei pơgơ̆r sơđơ̆ng ƀlep hăm khôi luơ̆t. Tang măt ăn Jơnum vei lăng Pôk rơ̆ih Tĕh đak jei tơbăt, pơ đĭ lơ̆m tĕh đak đei hlŏh 69 trĭu ‘nu bơngai tăh hla tơ̆ 85.000 hơnĭh tăh hla. Hrei au rim trong jang vei lăng sơđơ̆ng jơnei năr pôk rơ̆ih, sơđơ̆ng tơdrong pơm tơm kơ dĭh kơ bơngai tăh hla, mă kăl tơ̆ rim tơring tŏk bŏk tơ ƀơ̆p tơnap tap kơ yuơ tŏ ‘mi kial, jĭ jăn pơrăm, đei lơ bơngai măh pơm kiơ̆ oei hơtăih dĭh băl jei hlôi hơmet ăn tôch ‘lơ̆ng hơ iă.

Tơblơ̆ nơ̆r: Amazưt