VOV4.Bahnar - Hăm hơ năn “Tơ klep kơ măy kơ mo\k, kiơ\ tom tơ drong jang kach mang kơ măy kơ mo\k 4.0”, tơ drong tơ [o#h găh kơ măy kơ mo\k ‘nao sơ năm 2019 (TechDemo Gia Lai) gô pơ gơ\r đơ\ng ‘năr 24 - 26/11 tru\h, tơ\ pơ lei tơm Pleiku, de#h char Gia Lai. Tơ drong jang yua đơ\ng an^h tơm jang khoa ho\k păng kơ măy kơ mo\k păng an^h jang vei lăng kon pơ lei de#h char Gia Lai jang hơ dai pơ gơ\r.

Kiơ\ tơ che\ng hơ drol, TechDemo Gia Lai sơ năm ‘nâu gô tơ [o#h, pơ dă dôm kơ măy kơ mo\k ‘nao, hơ gei đơ\ng rim an^h jang mơ dro sa, khu\l jang, kơ d^h, hăm dang 450 kơ deng tơ mam, ako\m lơ\m 7 tơ drong jang nhen: Pơm tơ le\ch, vei lăng tơ mam đơ\ng cho\h jang sa – bri ‘long; kơ măy pơm tơ le\ch, tơ gu\m, kơ măy kơ mo\k kơ tơ\ng ang, kơ măy kơ mo\k điên tư, IoT; Kơ măy kơ mo\k u\nh hơ yu\h ‘nao, u\nh hơ yu\h pơm ming, kơ măy kơ mo\k vei lăng cham char…

J^ 1 lơ\m dôm tơ drong kăl sơng đei tơ drong bơ ngơ\t tru\h đơ\ng tơ pôl khoa ho\k kơ măy kơ mo\k, TechDemo sơ năm ‘nâu oei đei rim tơ drong jang nai ‘no\h: Hop ako\m găh bơ\ jang tơ mơ\t yua, pơ tho kơ măy kơ mo\k tơ ring – Hop ako\m rim an^h tơ mơ\t yua hơ gei khoa ho\k kơ măy kơ\ mo\k tơ ring; hop ako\m an^h jang mơ dro sa hăm tơ pl^h ‘nao kơ măy kơ mo\k, hop ako\m pơ tru\t pơ jao kơ măy kơ mo\k păng tơ mơ\t jên jang; ku\m hăm ‘no\h j^ rim tơ drong jang tơ roi tơ [o#h kơ măy kơ mo\k, tơ roi tơ [o#h hơ met ming ki thuơ\t, tơ pl^h ‘nao kơ măy kơ mo\k, tơ klep te\ch mơ dro kơ măy kơ mo\k, tơ klep jên hu – kơ măy kơ mo\k…

Thuem: Tơ blơ\