VOV4.Bahnar - Hăm dôm tơ drong iŏk đei tôch ‘lơ̆ng mưh ƀet pơ long năng, lơ tơ drong hơ mĕng vắc xin Nano Covac tang găn jĭ Covid 19 mă blŭng đơ̆ng Việt Nam gô đei asong iŏk yoa lơ̆m khei 9 sơ năm ‘nâu. Vắc xin Nano Covax Yoa Hnam hŏk Quân y tơ chĕng hơ len hlôi đei hơ len năng 2 ‘măng.

 Adrol kơ ‘nŏh, jăl mă 1 đei ƀet pơ long năng lơ̆m khei 12/2020 hăm 560 ‘nu bơ ngai apinh ƀet vă hơ len năng tơ drong sơ đơ̆ng tơ̆ bơ ngai, jăl 2 đơ̆ng khei 2 sơ năm ‘nâu ƀet pơ long năng tơ̆ 554 ‘nu bơ ngai vă hơ nơ̆ng hơ len năng tơ drong sơ đơ̆ng păng tơ drong sĭt kơ tang vă tang găn virus Sars Covi 2. Pơ đĭ 2 ‘măng hơ len năng đei ƀôh sơ đơ̆ng ‘lơ̆ng ngăl.

Lơ̆m khei 6 ‘nâu ƀet pơ long năng jăl 3 vắc xin Nano Covax hăm 13.000 ‘nu bơ ngai đei ƀet păng iŏk yoa kơ liêu tŏ sĕt hlŏh ‘nŏh 25mcrogam. Tơ drong tơm đơ̆ng ‘măng ƀet pơ long jăl 3 vă hơ len năng dơ̆ng tơ drong sơ đơ̆ng, sĭt kơ tang đơ̆ng vắc xin lơ̆m tơ pôl hlôi đei bơ ngai jĭ.

Hrei ‘nâu, Hnam hŏk quân y păng dôm anih đei ƀơm truh oei hăt hơ len năng rim tơ drong ƀet pơ long hrĕnh. Đĭ đăng rim tơ drong athei pơm kiơ̆ mă ‘lơ̆ng nơ̆r athei tôch kơ hret, kiơ̆ tơ drong hơ găt đơ̆ng apŭng plenh tĕh. Vă kiơ̆ đơ̆ng noh, Anih tơm vei lăng jang pơ gang iŏk đei tôm tơ drong kăl gơ̆h asong iŏk yoa hloi vắc xin Nano Covax tơ̆ tĕh đak bơ̆n.

Dơ̆ng: Tơ blơ̆