VOV4.Bahnar - Hăm tơ drong joăt joe mĭnh jơ hngơ̆m, ‘mêm mơ mnat băl đơ̆ng hơ drĕch hơ drŭng, lăp đơ̆ng rŏng nơ̆r krao hơ vơn đơ̆ng Kơ dră teh đak păng Khŭl kơ dră Anih jang Trung ương Mặt trận tổ quốc Việt Nam, lơ anih jang, khŭl jang, kơ dih hlôi hơ tŏk hơ năp jang, mơ̆ng kiơ̆ tơ drong păng kĕ jang đơ̆ng kơ dih, vang tơ gop tơ gŭm Jên mong tang găn jĭ Covid-19. ‘Nâu jĭ kon jên tôch kơ tih tên vă vang hơ dai hăm Khŭl kơ dră teh đak tơ gŭm ăn khŭl y ƀak si, bôn bơ ngai kơ tă jang tơ drong jang hơ met, bơ̆ jang tơ̆ dôm hơ nih ăn oei hơ drô̆ kŭm nhen pơm jên pơ gơ̆r ƀet  vaccine ăn kon pơ lei lơ̆m teh đak.

Lăm sơng iŏk dôm bơ ngai đei jơ hngơ̆m đon ‘lơ̆ng gĭt kăl tơ gŭm tang găn jĭ Covid-19 tơ̆ Anih jang Trung ương Mặt trận tổ quốc Việt Nam dôm năr âu ling lang pơ̆ih ‘măng sơng dôm khŭl grŭp, bơ ngai, rim anih jang mơ dro sa, bơ ngai đei jơ hngơ̆m đon ‘mêm mơ nat năm vang tơ gŭm hăm Khŭl kơ dră teh đak tang găn jĭ Covid-19.

        Hơ nhăk kơ sô jên 131 triệu hlak jên đơ̆ng Khŭl bơ ngai Việt Nam tơ̆ Ma Cao (Trung Quốc) brŏk tơ̆ teh đak tơ gŭm tang găn jĭ Covid-19, yă Nguyễn Thị Hương akhan; kon pơ lei oei tơ̆ teh đak đe hơ nơ̆ng răp hơ len lăng tơ drong jĭ hơ buh tơ̆ lơ̆m teh đak, ‘mĕh vă dôm tơ drong vang tơ gop truh hăm khŭl y ƀak si, dôm bơ ngai kơ tă jang tơ drong jang hơ met, vă tơ gop tang găn jĭ Covid:

 “Nhôn hlôi hơ dai hăm Kơ dră vei lăng anih jang tang măt Việt Nam păng Khŭl jang vei lăng kon pơ lei Việt Nam tơ̆ Ma Cao vă pơ gơ̆r dôm ‘măng hop akŏm rim kon pơ lei păng vang krao hơ vơn. Kon pơ lei kŭm tôch kơ lăp đon jang kiơ̆, yua kơ hơ drĕch hơ drŭng bơ̆n, năm tơ̆ yơ ‘noh kŭm lăng găh pơ lei pơ la. Yua thoi noh, kơ na nhôn hlôi krao hơ vơn păng tôch kơ đei yua.”

Jang kiơ̆ nơ̆r krao hơ vơn đơ̆ng Kơ dră teh đak Nguyễn Xuân Phúc: teh đak tôch kơ kăl tơ drong kơ chăng vang tơ gop jơ hngơ̆m đơ̆ng rim kon pơ lei”. Dôm năr âu ki lơ anih jang hlôi tơ lĕch jang bơ ngai jang teh đak 1 ‘nu 1 năr jên khei tơ gŭm tang găn jĭ. Tơ̆ Anih tơm Nội vụ, lăp đơ̆ng rŏng tơ lĕch jang hlôi đei kơ sô̆ jên hloh 430 triệu, pơ đĭ kơ sô̆ jên âu hlôi đei gơ̆ih truh Jên mong tang găn jĭ Covid-19 vă vang tơ gop jơ hngơ̆m jang kiơ̆ rim trong jang tang găn jĭ. Chánh văn phòng Anih tơm Nội vụ, ƀok Vũ Đăng Minh tơ băt:

 “100% kang ƀô̆ bơ ngai jang kơ Anih tơm Nội vụ hlôi vang jang kiơ̆. Kang ƀô̆ bơ ngai jang Anih tơm ‘mĕh vă bơ̆n đei trong jang tang găn jĭ ‘lơ̆ng hloh vă vei lăng ‘lơ̆ng tơ drong. Pơm liơ tang găn jĭ jăh sơ đơ̆ng tơ drong arih sa vă hơ tŏk tơ iung teh đak. Mă lei gĭt kăl kơ sô̆ jên mă đơ̆ng tŏ sĕt, mă lei hơ drol hloh bơ ngơ̆t truh tơ mơ̆t jên jang, trong jang tơ gŭm tơ tom ăn rim kang ƀô̆ jang pơ gang tang găn jĭ. Yua kơ ‘năr tŏ đe sư tôch gleh lăp”.

Pơ jao kơ sô̆ jên 300 triệu hlak jên tơ gŭm kiơ̆ Anih jang Trung ương Mặt trận Tổ quốc Việt Nam, Phŏ kơ dră dơ nơm Anih Rađiô nơ̆r pơ ma Việt Nam Vũ Hải Quang tơ băt rim kang ƀô̆, bơ ngai jang, bơ ngai chih kơ tơ̆ng ang, bơ ngai chih hơ met ming, nghệ sỹ kơ Anih Rađiô nơ̆r pơ ma Việt Nam tơ gŭm kơ sô̆ jên 300 triệu hlak jên hăm ‘mĕh vă tơ gop dơ̆ng jên vă hơ dai hăm Đảng, teh đak, khŭl kơ dră teh đak tang găn tơ drong tơ poh lanh đơ̆ng jĭ hơ buh lơ̆m tơ pôl. Hơ dai hăm tơ drong tơ gop, khei ‘năr âu ki, Anih Rađiô nơ̆r pơ ma Việt Nam khei ‘năr âu ki hlôi hơ drin tơ roi tơ băt tang găn jĭ hơ buh:

 “Hăm hơ năp jang ‘noh jĭ 1 anih jang tơ roi tơ băt tih kơ Đảng, kơ khŭl kơ dră teh đak, nhôn kŭm ‘măn lơ jơ tơ roi dôm tơ drong kơ tơ̆ng ang păng rim tơ drong jang lơ̆m tơ drong tang găn jĭ Covid. Hơ nơ̆ng ăn bơ ngai chih kơ tơ̆ng ang oei lơ̆m tơ ring đei jĭ, tơ roi tơ băt dôm tơ drong jơ nei lơ̆m tơ drong pơ gơ̆r đơ̆ng Đảng păng khŭl kơ dră teh đak. Tơ drong jang kiơ̆ tơ drong jang hơ dai tang găn jĭ hai păng hơ tŏk tơ iung mŭk drăm hai; pôk pơ ư bơ ngai jang ‘lơ̆ng kŭm nhen dôm khŭl linh jang tơ̆ anih jang tơm tôch kơ gleh hrat păng đei hloi tơ drong plang hơ kâu”.

Ƀơ̆t kơ plăh mơ mat tat hloh ‘noh jĭ ‘măng mă kơ rim ‘nu kon pơ lei tơ ƀôh jơ hngơ̆m đon tơ goăt tơ goăl, vang hơ dai bơ̆ jang păng jang tơ năp yua kơ teh đak, yua kơ kon pơ lei. Lơ anih jang mơ dro sa păng rim bơ ngai hlôi hơ tŏk ‘lơ̆ng jơ hngơ̆m đon tơ goăt tơ goăl, ‘mêm mơ nat băl, “ ‘mêm kơ đe nhen ‘mêm kơ dih kâu”, “ hla ‘lơ̆ng bơ̆ng hla hiăh”. Tang măt rim anih jang mơ dro sa, anih mong jên păng rim bơ ngai vang tơ gŭm: “Ĭnh tơ chĕng akhan, tơ drong tơ gŭm đơ̆ng kơ dih, ‘noh jĭ đơ̆ng jơ hngơ̆m đon. Đơ̆ng jơ hngơ̆m đon hlôi mơ̆t hrơm lơ̆m đon tơ chĕng đơ̆ng rim kon pơ lei Việt. Hơ năp jang ‘noh ‘ngoăih kơ tơ drong kơ chăng kơ dih, kơ dih chă tơ gŭm, dôm bơ ngai lăng ƀôh hơ năp jang athei vang tơ gŭm hăm khŭl kơ dră teh đak, kŭm hăm tơ pôl.”

        Pơ ma hơ dăh gô yua ƀlep tơ drong, tơ păt, rơ đăh păng đei iŏk yua kon jên mă anih jang mơ dro sa,bơ ngai đei jơ hngơ̆m đon ‘lơ̆ng tơ gŭm jên mong tang găn jĭ Covid-19, Phŏ kơ dră Anih jang Trung ương Mặt trận tổ quốc Việt Nam Trương Thị Ngọc Ánh tơ băt: ‘Nâu jĭ 1 kon jên tôch kơ tih tên vă răt vaccine ƀet ăn kon pơ lei lơ̆m teh đak, vă tơ gŭm ăn khŭl jang pơ gang, y ƀak si, dôm bơ ngai kơ tă jang tơ drong jang hơ met dăh mă bơ̆ jang tơ̆ dôm hơ nih ăn oei hơ drô̆ kŭm nhen pơm kon jên tơ gŭm răt bơ̆n tơ mam, kơ măy kơ mŏk pơ gang pơ yua ăn tơ drong jang tang găn jĭ Covid-19:

 “Hăm kon jên krao hơ vơn đei đơ̆ng Trung ương, nhôn jang hơ dai hăm Anih pơ gơ̆r jang teh đak tang găn jĭ Covid-19 vă vei sơ đơ̆ng tơ drong jang vei lăng, iŏk yua jên tơ gŭm đơ̆ng rim anih jang mơ dro sa, rim bơ ngai đei jơ hngơ̆m đon ‘mêm mơ nat, vei sơ đơ̆ng ƀlep tơ drong, athei iŏk yua jơ nei jên krao hơ vơn đei.”

"Jơ hngơ̆m pran đơ̆ng tơ goăt tơ goăl, lăp đon, đĭ đăng kon pơ lei tơ jră jĭ hơ buh” – dôm bơ ngai tang măt ăn anih jang mơ dro sa, khŭl jang, rim bơ ngai năm tơ gŭm tơ̆ Anih jang Trung ương Mặt trận tổ quốc Việt Nam dôm năr âu ‘noh jĭ tơ ƀôh kơ năl ‘nâu ư̆h kơ sĭ jing 1 nơ̆r pơ ma, mă jing 1 tơ drong tơ pă ‘lơ̆ng hơ iă găh jơ hngơ̆m đon tơ goăt tơ goăl, 1 tơ drong joăt kăp gĭt đơ̆ng hơ drĕch hơ drŭng. Jơ hngơ̆m đon ‘noh roi lơ̆m mơ mat tat, roi hơ dăh đon nŭih păng hơ drin đơ̆ng kon bơ ngai Việt Nam.

Lại Hoa - VOV1: Chih

Thuem: Tơ blơ̆