VOV4.Bahnar - Tơ̆ hơnăp tơdrong jĭ hơbŭh Covid-19 tơpŏh hli hlơt, kơsơ̆ năr 31/5, Dơnŏ anĭh vei lăng kon pơlei dêh char Lâm Đồng hlôi chĭh pơtrŭh hla bơar kăl găh tơdrong hơnơ̆ng jang kiơ̆ kơtang rim trong jang tang găn jĭ.

Lâm Đồng tŏk bŏk atŏk kơtang bơ̆ jang tang găn jĭ tơ̆ rim hơnĭh gak trong mơ̆t lơ̆m dêh char

Dơnŏ anĭh vei lăng kon pơlei Lâm Đồng athei rim hơnĭh bơ̆ jang, khŭl jang chĭnh trĭ tơpôl, Dơnŏ anĭh vei lăng kon pơlei rim apŭng, pơlei tơm lơ̆m dêh char tơlĕch jang kiơ̆ kơtang trong jang tang găn jĭ Covid-19. Lơ̆m au athei đĭ đăng dôm bơngai ‘nao brŏk vĭh đơ̆ng tơring đei jĭ hơbŭh jei pơm kiơ̆ oei hơdrô̆ atŏm lơ̆m 21 năr, jô̆ đơ̆ng 5 jơ kơsơ̆ năr 31/5. Dôm bơngai ư̆h kơ pơm kiơ̆ gô phak kăp kơ hret ‘moi kiơ̆ tơdrong tơchơ̆t. Hơdrô̆ dôm bơngai ‘nao brŏk đơ̆ng tơring pơvang tang găn, ăn oei hơtăih dĭh băl tơ̆ pơlei tơm Hồ Chí Minh păng rim dêh char  Bắc Giang, Bắc Ninh... đơ̆ng năr 18/5 trŭh dang ei, kăl pơm kiơ̆ tơroi tơbăt akau jăn ăn khŭl jang pơgang, dăr lăng hơlen akau jăn tơ̆ ŭnh hnam păng pơkăp ư̆h kơ lĕch đơ̆ng hnam năm tơ̆ nai lơ̆m 14 năr.

Rim bơngai năm tơ̆ Lâm Đồng jei pơm kiơ̆ tơroi tơbăt jơhngơ̆m jăn ăn ƀok thây pơgang

Atŭm hăm ‘nŏh, Dơnŏ anĭh vei lăng kon pơlei dêh char Lâm Đồng pơrô̆ athei pơdơ̆h chơ tơmoi đơ̆ng pơlei tơm Hồ Chí Minh brŏk tơ̆ Lâm Đồng. Pơdơ̆h hloi tơdrong pơgơ̆r pơkong, et sa au to; tơdrong năm hơpong đe nê̆ kau ‘nŏh ư̆h kơ oei akŏm 30 ‘nu bơngai păng pơm kiơ̆ kơ jăp tơdrong tơchơ̆t 5K. Lơ̆m khei năr au, dêh char Lâm Đồng ư̆h kơ kĭ tơchơ̆t ăn kang ƀô̆ păng bơngai jang lĕch đơ̆ng dêh char au năm tơ̆ dêh char anai.

Tơblơ̆ nơ̆r: Amazưt