VOV4.Bahnar - Xơnăm 2021, vă tơroi tơbăt hơtŏk hlôh vao găh xơnong pơyua ăn đe hơ ioh, vei vêr đe hơ ioh lơ̆m khei năr pơrang jĭ hơbuh; atŭm hăm noh tơgŭm ăn đe hơ ioh ƀơm răm đơ̆ng pơrang jĭ Covid-19, Khei pơm jang kơyuơ đe hơ ioh xơnăm âu akŏm lơ̆m hơnăn: “Atŭm jơhngơ̆m vei xơđơ̆ng pơm kiơ̆ xơnong pơyua ăn đe hơ ioh, vei vêr đe hơ ioh lơ̆m khei năr pơrang jĭ hơbuh hli”. Hăm hơnăn âu, tơ̆ tơring Tây Nguyên atŭm hăm jâ̆p teh đak tŏk bŏk đei lơ tơdrong jang kăp gĭt hăm đe hơ ioh.  

Minh lơ̆m dôm tơdrong jang kăp gĭt mă blŭng tơ̆ Đăk Lăk noh Anih mong jên Vei vêr hơ ioh dêh char âu hlôi chă năm apong, axong tơmam păng pơtho găh trong tang găn păng tơjră pơrang jĭ Covid-19 ăn đe hơ ioh tơ̆ Anih oei Akŏm tơpôl hnam chua Bửu Thắng (plei tơm Buôn Ma Thuột). Ƀok Lâm Đình Nhiên, Kơdră Anih mong jên Vei vêr hơ ioh dêh char Đăk Lăk ăn tơbăt, tŏk bŏk oei tơlĕch tơgŭm man 44 tŏ hnam 'mêm kơ eng; năm apong hơlêm rim unh hnam đei kon hơ ioh ƀơm rơka hơbur, unh hnam đei hơ ioh lôch glơ̆k tơ̆ đak tơ̆ dôm apŭng Chư̆ Mgar, Krông Pach, Chư̆ Kuin păng Krông Bông. Tơgŭm tơmam xa bek, tơmam yua kăl păng vei lăng jơhngơ̆m jăn, khăm hơlen băt jĭ plei nuih păng dôm tơdrong jĭ nai hăm hơ ioh: “Anih mong jên gô akŏm hơvơn dôm anih jang tơpôl, anih jang mŭk drăm păng anih jang kơ teh đak vă đei tơdrong tơgŭm dôm bơngai đei tơdrong jĭ hlăm nhen jĭ plei nuih; năm apong đe hơ ioh rơka hơbur, xar bar tơ̆ đak. Păng mă kăl noh 'năr âu tơgŭm đei 30 trĭu hlj ăn đe hơ ioh pơti pơtĕk tơ̆ Anih rong 'me tơpôl hnam chua Bửu Thắng vă tơgŭm minh păh chă răt tơmam xa, tơmam kăl lơ̆m khei năr pơrang jĭ hơbuh hli păng pơtho ăn đe hơ ioh băt chă tang găn păng tơjră pơrang jĭ Covid-19".

Tơ̆ Trung ương, Anih mong jên Vei vêr đe hơ ioh  Việt Nam păng Anih tơm Axong jang – Linh jĭ rơka păng Tơpôl  hlôi tơchơ̆t tơgŭm 'măng xŏng xa ăn hloh 4 rơbâu 'nu hơ ioh F0 păng F1 athei oei tơklăh kiơ̆ pơkăp vă tang găn păng tơjră pơrang jĭ Covid-19. Kiơ̆ kơ noh, hơ ioh tŏk bŏk oei hơmet, oei tơklăh y tê̆ gô đei tơgŭm jên xŏng xa rim năr hăm jên tơgŭm 80.000 hlj ăn minh 'nu hơ ioh, đei iŏk yua truh đĭ xơnăm âu.

Pơrang jĭ Covid-19 hlôi, tŏk bŏk păng pơtoi pơrăm truh tơdrong erih, jơhngơ̆m jăn păng tơdrong pơyua hăm đe hơ ioh. Kiơ̆ hơlen, lơ̆m kơsô̆ 30 dêh char đei bơngai ƀơm jĭ Covid 19, đei 18 dêh char tơroi đei hơ ioh lơ̆m grŭp F0 păng F1. Lơ̆m noh, Bắc Giang tŏk bŏk đei kơsô̆ hơ ioh athei oei tơklăh lơ hloh hăm kơ rơbâu 'nu. Yă Nguyễn Thị Nga, Phŏ Kơdră Anih jang găh đe Hơ ioh, Anih tơm Axong jang – Linh jĭ rơka păng Tơpôl ăn tơbăt, anih jang tŏk bŏk oei hơvơn tơdrong tơgŭm đơ̆ng dôm anih jang, tơ 'ngla bơngai lơ̆m păng 'nguaih kơ teh đak vă đe hơ ioh Việt Nam yak hloh khei năr tơnap tap âu, tơgŭm ăn đe hơ ioh đei tơdrong erih ang hơdăh hloh: “Lơ̆m dôm năr kơ âu, nhôn tơrĕk kăp gĭt găh tơdrong hơlen chih akŏm kơsô̆ hơ ioh ƀơm jĭ Covid 19 duh nhen đe hơ ioh athei tơklăh oei pha nhen pơkăp lơ̆m khul F1. Pơkăl rim tơring tơlĕch chă tơgŭm găh tơmam xa bek, tơmam xa duh nhen tơdrong kăl kơ đe hơ ioh, mă kăl noh găh đon bơnôh răm ưh adrô̆ hăm mĕ ƀă kơ đe hơ ioh mă kơdih po đe hơ ioh adoi ƀơm răm kơtang mơ̆n”.

Dang ei Anih mong jên Vei vêr đe hơ ioh Việt Nam pơtoi hơvơn, tơgŭm dôm tơmam drăm kăl, tơmam y tê̆ nhen: che gom ƀŏ găn xơmach, đak toh, mi tôm, hơbăn ao 'nâu nia hia ăn đe hơ ioh mă ƀơm F0, F1, F2 tơ̆ dêh char Điện Biên. Atŭm hăm noh, tenh kuăng tơlĕch hơvơn, tơgŭm đe hơ ioh tơ̆ dôm dêh char hơbuh pơrang jĭ nhen Bắc Giang, Bắc Ninh.

Pơm kiơ̆ Khei pơm jang kơyuơ đe hơ ioh xơnăm 2021, minh ƀar anih jang hlôi đei hla bar pơgơ̆r tơlĕch jang lơ̆m Khei pơm jang kơyuơ đe hơ ioh. Anih jang găh Kơsô̆ măt bơngai, Unh hnam păng Hơ ioh  - Anih tơm Linh teh đak, Anih tơm Joh ayŏ Tơplŏng kơdâu păng Tơmang pơhiơ̆; Anih tơm Tơroi Tơbăt jang atŭm hăm Jơnŭm vei xơđơ̆ng tơroi tơbăt Việt Nam păng minh ƀar anih jang tơm đei tơrĕk pơgơ̆r tơdrong pơlong “Hŏk tro hăm Xơđơ̆ng tơroi tơbăt”; Trung ương Đoan Hơdruh Tơdăm Cộng sản Hồ Chí Minh pơgơ̆r Tơdrong akŏm he. Yă Nguyễn Thị Nga ăn tơbăt: “Anih tơm jang găh đe Hơ ioh, Anih tơm Axong jang Linh jĭ rơka păng Tơpôl duh đei tơdrong tơgŭm jang hadoi hăm dôm anih jang apŭng plenh teh tơ̆ Việt Nam duh nhen dôm anih jang lơ̆m tơpôl. Lơ̆m khei pơm jang kơyuơ đe hơ ioh gô pơgơ̆r lơ tơdrong pơma đam mă gĭt kăl noh dôm tơdrong pơma đam trư̆k tuyê̆n vă tơroi kơ dôm tơdrong pơkăp găh khôi luơ̆t teh đak, trong pơkăp jang duh nhen dôm tơdrong hlôh vao kăp gĭt ăn unh hnam, ăn đe hơ ioh duh nhen jơnŭm tơpôl vă bơ̆n atŭm jơhngơ̆m vei xơđơ̆ng pơm kiơ̆ ƀlep xơnong kơdih kơ đe hơ ioh, mă hăt noh mưh hơ ioh ƀơm răm đơ̆ng pơrang jĭ Covid 19”

Anih tơm jang găh đe hơ ioh duh hlôi đei hla bar pơgơ̆r Anih Axong jang – Linh jĭ rơka păng Tơpôl dôm dêh char, plei tơm hơtŏk pran tơdrong tơroi tơbăt lơ̆m tơpôl, aloa pơre găh tơdrong hlôh vao lơ̆m tang găn păng tơjră pơrăm đe hơ ioh; tang găn păng tơjră xar bar hơbur hăm hơ ioh; vei vêr đe hơ ioh lơ̆m cham char internet, tơroi tơbăt găh Anih tơm điê̆n thoăi kơ teh đak găh vei vêr đe hơ ioh (111) truh hăm unh hnam, tơpôl păng đe hơ ioh. Rim tơring hơtŏk dôm trong jang tang găn păng tơjră jĭ COVID-19 ăn hơ ioh păng vei xơđơ̆ng đe hơ ioh lơ̆m khei năr  pơm kiơ̆ pơkăp tơklăh oei ataih băl lơ̆m tơpôl păng dôm anih oei pha minh ƀôt; iŏk yua Jên mong tơgŭm đe hơ ioh tơ̆ dêh char (mưh đei) dăh mă jên mong đơ̆ng Anih mong jên Vei vêr đe hơ ioh Việt Nam păng jên mong nai vă tơgŭm tơmam xa bek, tơmam yua kăl, pơgang păng dôm tơmam drăm y tê̆ axong ăn đe hơ ioh hăm trong pơkăp ưh đei lê̆ vă minh 'nu hơ ioh yơ oei tơjrâ̆m tơnap tap mă ưh đei tơgŭm tơtom.

Lan chih păng pơre nơ̆r