VOV4.Bahnar - Pơ ma hơ dăh tơ̆ jơ hop akŏm tơ roi tơ băt jăl khei mă 3 păng tơ roi găh trong tơ lĕch jang pơ trŭt pơm tơ lĕch tĕch mơ dro sa dôm khei hơ tuch sơ năm 2021 păng trong vă jang truh sơ năm 2022 pơ gơ̆r pơ gê ‘năr 5/10 tơ̆ Hà Nội, Phŏ kơ dră Anih tơm vei lăng găh choh jang sa păng hơ tŏk tơ iung tơ ring tơ rang Phùng Đức Tiến tơ băt, vei rong kon tơ rong păng ka hơ dang jing 2 tơ drong jang rơ kăh vă anih jang choh jang sa pơ vei jang tŏk sơ năm ‘nâu. 9 khei âu ki anih jang găh choh jang sa hơ nơ̆ng sơ kơ̆t hơ dăh jĭ jrăng tơ jră dŏng kơ mŭk drăm, pơ vei jang tŏk 2,74%, kơ sô̆ tĕch tơ lĕch tơ mam đơ̆ng choh jang sa, ‘long, ka hơ dang jô̆ pơ hlom đei 35,5 ti đô la Mi, tŏk 17,7%. Vă vei sơ đơ̆ng pơ truh phe ƀa, tơ mam sa dôm khei hơ tuch sơ năm, mă loi ‘noh jĭ Tết Nguyên đán Nhâm dần 2022 păng pơ yua ăn tĕch tơ lĕch tơ̆ teh đak đe, anih jang găh choh jang sa hlôi băt hơ dăh 4 grŭp trong jang. Kiơ̆ kơ ‘noh, akŏm athei pơm tơ lĕch, tĕch mơ dro mă lăp hăm tơ drong tŏ ‘mi kial, đei ƀôh jĭ Covid 19 tơ̆ rim dêh char, pơ lei tơm; hơ met pơ ‘lơ̆ng dôm tơ drong pơ găn tŭn pran dôm tơ drong jang pơ trŭt mơ dro sa apŭng plĕnh teh, pơm tơ drong hiôk ăn tĕch mơ dro lơ̆m teh đak păng pơ trŭt tĕch tơ lĕch tơ̆ teh đak đe. Hơ dai hăm ‘noh hơ tŏk loi dơ̆ng dôm trong jang tang găn tŏ ‘mi kial pơ răm đei yua.

Thuem: Tơ blơ̆