VOV4.Bahnar – Kơyuơ răm đơ̆ng ‘mi kial kơsô̆  5 ăh blŭng khei  9âu ki, tơ̆ apŭng M’Drăk, dêh char Đăk Lăk, hlôi đei tơdrong păk ‘long bri pơm kơtĕch trong tơlei unh hơyuh 22KV, pơm hiong unh hơyuh lang xă tơ̆ dôm apŭng Ea Kar păng M’Drăk. Kiơ̆ anih jang unh hơyuh tơ̆ tơring, hăm hloh 750km trong tơlei unh hơyuh dăng găn lơ tơring pơtăm ‘long bri, lơ̆m pơyan ‘mi kial, ‘long bri păk tơgơ̆ pơrăm găh unh hơyuh tih tên tơpă. Anih jang unh hơyuh ‘meh vă bơngai pơtăm bri athei pơm kiơ̆ pơkăp, jang atŭm tơnăp hloh dơ̆ng vă vei xơđơ̆ng trong tơlei unh hơyuh, tang găn răm truh tơdrong erih kon bơngai păng mŭk drăm.

Ăh tong anê̆ khei 9, unh hnam ‘nhŏng Vương Văn Hoàn, tơ̆ thôn 7, xăh Cư San, koh yua hloh 4 ha keo lai. Xư ăn tơbăt, kơyuơ bri keo đei trong tơlei unh hơyuh găn ga, noh adrol kơ koh yua, unh hnam athei tơroi ăn kang ƀô̆ jang unh hơyuh truh pơtho koh ‘long vă vei xơđơ̆ng ‘lơ̆ng: “Tơ̆ mir pơgar noh tơtă pơtăm ‘long keo đĕch. Mă blŭng duh pơtăm tơjê̆ trong tơlei unh. Đơ̆ng rŏng kơ noh kơtơ̆ng chă tơroi tơbăt đơ̆ng anih jang unh hơyuh noh nhôn duh kơdih chă choh chong koh ot pơih xă rơhơi ăn trong tơlei unh hơyuh vă vei xơđơ̆ng ăn tơdrong erih kơ unh hnam”.

Kiơ̆ kơ ƀok Thào Seo Lử, Kơdră thôn 7, xăh Cư San, tơ̆ tơring ataih yaih, ataih đơ̆ng apŭng hloh 50km, đei yua unh hơyuh teh đak jing tơdrong xô̆ xôn tih hăm kon pơlei.

Kơyuơ noh, tơdrong vei xơđơ̆ng ăn trong tơlei unh kơdâu găn duh jing xơnong jang kơ kon pơlei: “Đơ̆ng xơnăm 2007 đei dui unh hơyuh vih tơ̆ âu noh kon pơlei xô̆ xôn dêh, bơnê kơ Đảng, Teh đak păng găh unh hơyuh. Tơdrong erih mŭk drăm nhôn tơ̆ âu gơnơm lơ̆m pơtăm ‘long keo. Ăh pơyan ‘mi kial noh nhôn adoi tơbăt hăm kon pơlei nĕ pơhơi hăm ‘long keo hăp păk tơgơ̆ hơkua tơ̆ trong tơlei unh noh răm truh tơdrong erih kon pơlei”.

Jâ̆p xăh Cư San đei 4.800 unh hnam, mă lơ noh kon pơlei Mông păng Dao đơ̆ng dôm dêh char găh tu truh oei. Ƀok Phạm Đăng Đảng, Kơdră Anih vei lăng kon pơlei xăh Cư San ăn tơbăt, teh xă mă lei kông krang teh ưh giơ̆ng noh mŭk drăm đơ̆ng bri jing tơm, trŏ ƀlep hăm trong choh jang kơ kon pơlei kon kông. Pơtăm bri keo ưh huach jơhngơ̆m vei lăng, adrô̆ axong jên răt hơdrĕch mă blŭng.

Đơ̆ng rŏng 4 - 5 xơnăm, rim ha keo đei yua đơ̆ng 60 truh 80 trĭu hlj. Kơyuơ noh, ăh pơtăm keo, kon pơlei hơnơ̆ng iŏk teh, phŏ noh pơtăm hloi teh ăh jih trong tơlei unh hơyuh: “Lơ̆m khei năr âu ki noh anih jang unh hơyuh hăm tơring hlôi jang hadoi tơnăp lơ̆m tơdrong tơroi pơtho ăn kon pơlei băt, mă lei duh oei minh ƀar tơring noh tam mă đei jang tơnăp kiơ̆ pơkăp kơ anih jang unh hơyuh. Kơlih mưh pơm thoi noh hơgăt teh kơ kon pơlei ƀơm pơvei lơ. Noh jơnŭm pơgơ̆r tơring atŭm hăm anih jang unh hơyuh pơtoi tơroi tơbăt ăn kon pơlei pơm thoi yơ vă vei xơđơ̆ng mŭk drăm kơ kon pơlei păng vei xơđơ̆ng trong tơlei unh hơyuh”.

Ƀok Nguyễn Công Hướng, Phŏ Kơdră Anih jang Unh hơyuh Ea Kar ăn tơbăt, kiơ̆ tơchơ̆t, kon pơlei gơh pơtăm ‘long ataih đơ̆ng trong tơlei unh noh 3m. Mă lei, kơyuơ tơm keo lai tŏk kơjung hloh 15m, hli păk tơgơ̆ pơm kơtĕch tơlei unh hơyuh, noh athei pơtăm ataih đơ̆ng trong tơlei unh lơ̆m 20m pơtơm gơh vei xơđơ̆ng. Dang ei anih jang unh hơyuh Ea Kar tŏk bŏk oei vei lăng hloh 750 km trong tơlei unh hơyuh pơtoi ataih kơ 2 apŭng Ea Kar păng apŭng M’Drak, mă hăt noh kiơ̆ dôm tơring groi kông đei bri pơtăm. Ăh pơyan ‘mi kial, tơdrong răm găh tơlei unh hơyuh kơyuơ ‘long bri păk tơgơ̆ hơnơ̆ng kơ đei.

Năr 11/9 âu ki, kơyuơ răm đơ̆ng ‘mi kial kơsô̆ 5, ‘mi kial tih hlôi pơm teh hơlih, ‘long bri păk tơgơ̆ pơm kơtĕch trong tơlei unh 22KV lơ̆m jăl pơkăp 471F18 đơ̆ng Ea Kar păng M’Drắk, pơm hiong unh hơyuh hăm 11.600 unh hnam. Dôm anih ƀơm răm lơ̆m tơring kông hang hli hlơt, tơnap ăn tơdrong hơmet ming. Kơyuơ noh, vă vei xơđơ̆ng ăn trong tơlei unh hơyuh lơ̆m pơyan ‘mi kial, anih jang unh hơyuh kăl jang hadoi đơ̆ng kon pơlei: “Hăm trong tơlei unh đei dăng găn lơ tơring bri pơtăm noh tơnap ăn kơ nhôn chă vei lăng păng ming hơmet unh hơyuh. Noh lơ̆m khei năr truh Anih jang Unh hơyuh Ea Kar pơtoi đei lơ trong jang hadoi, nhen pơtoi jang atŭm hăm jơnŭm pơgơ̆r tơring chă tơroi tơbăt vă kon pơlei hlôh vao păng drơ̆ng nơ̆r vang jang hăm anih jang unh hơyuh, jang tơnăp hloh tơdrong vei xơđơ̆ng trong tơlei unh duh nhen lơ̆m tơdrong yua unh xơđơ̆ng, mă kăl noh lơ̆m pơyan ‘mi kial”.

Unh hơyuh jing kăp gĭt ‘măn ăn tơdrong hơtŏk mŭk drăm tơpôl. Kơyuơ noh, kon pơlei athei pơm kiơ̆ trŏ ƀlep pơkăp vei xơđơ̆ng trong tơlei unh hơyuh, ưh adrô̆ vei xơđơ̆ng tơdrong erih kơdih po păng unh hnam, mă oei tơgop vei vêr trong tơlei unh hơyuh xơđơ̆ng ăn tơdrong erih jang xa.

Lan chih păng pơre nơ̆r