VOV4.Bahnar - Pơgê năr 24/11, tơ̆ Tokyo, lơ̆m ‘măng iung năm tơmang Nhật Bản, Thủ tướng Phạm Minh Chính vang năm tơ ƀơ̆p, bơ̆ jang hăm rim Kơdră chĕp pơgơ̆r Grŭp jang tĭh kơ Nhật Bản lơ̆m bơ̆ jang tơplĭh kơsô̆. Tơ̆ jơ ƀơ̆p, Thủ tướng Phạm Minh Chính tơbăt: Âu ki, jĭ hơbŭh Covid-19 hlôi pơtrŭt kơtang tơlĕch jang kiơ̆ tơplĭh kơsô̆ tơ̆ Việt Nam. Lơ̆m 20 sơnăm, măt bơngai kon pơlei chă pơm hla bơar ‘moi kiơ̆ lơ̆m trư̆k tuyên ‘nao lăp jơnei 12%, mă lei lơ̆m 1 jăl jang mư̆h jĭ hơbuh Covid-19 pơrăm, măt bơngai au hlôi đei tŏk trŭh 24%. Việt Nam đei 80% hŏk tro, sinh viên hŏk trư̆k tuyên, lơ hlŏh jô̆ hơtŏ lơ̆m apŭng plĕnh tĕh hlŏh 60%. Khŭl kơdră tĕh đak Việt Nam hlôi đei lơ trong tơchơ̆t, trong bơ̆ jang pơtrŭt atŏk tơ iung hơnĭh mong răk, hơdrin đei mơ̆t lơ̆m khŭl 50 tĕh đak jang kiơ̆ kmăi kmŏk lơ̆m sơnăm 2025, dơ̆ng lơ̆m khŭl 30 lơ̆m sơnăm 2030. Iung pơma tơ̆ jơ bơ̆ jang, Thủ tướng pơma hơdăh, tơdrong tơplĭh kơsô̆ ư̆h khan lăp tơdrong ba trong đơ̆ng Khŭl kơdră tĕh đak mă lei đei tơdrong vang iung jang đơ̆ng kon pơlei păng hơnĭh mơdro sa, iŏk kon bơngai ‘nŏh tơm hlŏh, pơm tơngla, rim trong tơchơ̆t bơ̆ jang kăl lăng trŭh kon pơlei păng hơnĭh mơdro sa, kon pơlei păng hơnĭh mơdro sa vang iung jang lơ̆m bơ̆ jang tơplĭh kơsô̆. Găh mĭnh ƀar tơdrong hơdăh mă rim bơngai tang măt lăng trŭh, Thủ tướng tơbăt, trong bơ̆ jang đơ̆ng Việt Nam ‘nŏh hơmet pơ ‘lơ̆ng tĕnh koăng lơ̆m tơdrong jang jên hu, hơnĭh mong jên vă rim tơdrong jang au pơm jŭk yŭk trong hơlau lơ̆m bơ̆ jang tơplĭh kơsô̆.

Tơblơ̆ nơ̆r: Amazưt