VOV4.Bahnar - ‘Năr 3/8, Kơ dră tơm vei lăng Công an Việt Nam Tô Lâm đei jơ pơ ma đam trư̆k tuyê̆n hăm Phó Thủ tướng – Kơ dră tơm vei lăng Công an tĕh đak Campuchia Samdech Krolahom Sar Kheng.

Ƀok Kơ dră Tô Lâm păng ma đam hăm Kơ dră chĕp kơ̆l khul linh vei lăng sơ đơ̆ng Campuchia

Kơ dră tơm vei lăng Công an Việt Nam Tô Lâm pơ ma hơ dăh, mă đơ̆ng tơ drong lơ̆m apŭng plenh tĕh păng tơ̆ tơ ring oei tôch krê, ưh gơ̆h băt hơ drol, kŭm hăm ‘nŏh jĭ tơ drong tơ sŭl tơ săl đơ̆ng jĭ COVID-19, mă lei tơ drong pơ vei jang hơ doi đơ̆ng Việt Nam păng Campuchia đei kơ dră chĕp kơ̆l 2 tĕh đak tôch năng kăl. Dôm tơ drong pơ ma nuh, roi tơ băt ăn băl kiơ̆ trong jang tơ bôl đei vei kơ jăp; jang hơ doi găh khul linh vei sơ đơ̆ng kơ 2 tĕh đak đei hơ met roi kơ jăp.

Găh trong jang hơ doi tơ̆ hơ năp kơnh, ƀok Kơ dră Tô Lâm păng ƀok Samdech Krolahom Sar Kheng pơ ma hơ dăh 2 păh hơ nơ̆ng pơm hơ tŏk tơ drong pơ vei “Tĕh đak jê̆ băl ‘lơ̆ng hơ iă, boăl juăt đơ̆ng sơ̆, jang hơ doi tôm tơ drong kơ jăp ‘lơ̆ng”, hơ tŏk tơ drong tơ gŭm băl lơ̆m rim khul grŭp tơ̆ apŭng plenh tĕh păng lơ̆m tơ ring ASEAN.

Dơ̆ng: Tơ blơ̆