VOV4.Bahnar - Jei lơ̆m ‘măng pơgơ̆r tơ̆ tĕh đak Mi, Kơdră chĕp pơgơ̆r Tĕh đak Nguyễn Xuân Phúc hlôi đei nơ̆r pơma pơtrŭh ăn Hop akŏm Joăt je Liên hợp quốc găh tơdrong jang phe ƀa kơ yuơ Tổng Thư ký Liên hợp quốc Antonio Guteres chĕp kơ̆l. Kơdră chĕp pơgơ̆r Tĕh đak Nguyễn Xuân Phúc hlôi pơma tơlĕch mĭnh ƀar trong vei lăng sơđơ̆ng phe ƀa tơ̆ hơnăp tơdrong tơplĭh tŏ ‘mi kial păng jĭ hơbuh Covid-19 păng tơbăt, Việt Nam ‘mĕh vă jing hơnĭh tơm tơchăr pơjing phe ƀa, tơmam drăm sa tơ̆ tơring. Lơ̆m nơ̆r pơma, Kơdră chĕp pơgơ̆r Tĕh đak Nguyễn Xuân Phúc pơma hơdăh, jang hơdoi ƀar păh rim tĕh đak, rim khul jang hơdoi lơ̆m tơdrong jang phe ƀa tơmam drăm sa kăl kơ yuơ đei iŏk yua ăn kon pơlei. Tơ̆ Việt Nam, sơđơ̆ng phe ƀa ‘nŏh jing tơdrong tơm ăn xut xa pơngot rơvĕt tơjur dơnŭh, atŏk tơdrong erĭh sa sơđơ̆ng ăn kon pơlei păng jing rơvơn vă atŏk tơ iung chŏh jang sa Việt Nam ‘lơ̆ng hơ iă, kơ jăp ‘lơ̆ng. Vă atŏk tơ iung kơ jăp ‘lơ̆ng tơdrong jang phe ƀa, Kơdră chĕp pơgơ̆r Tĕh đak Nguyễn Xuân Phúc akhan, kăl pơ̆ih să jang hơdoi apŭng plĕnh teh lơ̆m chă tơchĕng, tơdra hơdrol, pơjing trong jang tơbăt hơmơt đei răm đơ̆ng tŏ ‘mi kial, pơrang jĭ pơrăm; vei lăng kơ jăp ‘lơ̆ng rơgŏh găh đak păng bri brăh; vei lăng đak rơgŏh klŏh klĕch tơring anai, mŭk drăm đak dơsĭ.

Tơblơ̆ nơ̆r: Amazưt