VOV4.Bahnar - Pơ gê (04/5), tơ̆ cham gre păr Watay, anih tơm Vientiane, pơm lêh pơ jao tơ mam đơ̆ng Đảng, tĕh đak păng kon pơ lei Việt Nam tơ gŭm ăn Đảng, tĕh đak păng kon pơ lei Lào tơ jră hăm tơ drong jĭ Covid-19.

Pơ ma lơ̆m jơ pơm lêh, Phŏ Kơ dră tơm jang tơ bôl Tô Anh Dũng akhan, Việt Nam ling lang năm hơ doi hăm Lào lơ̆m tơ drong tơ găn jĭ Covid-19. Lui ngĕh hăm tơ drong chĕp kơ̆l pơ gơ̆r tôch rơ gei păng pran kơ jăp đơ̆ng Đảng, tĕh đak kŭm hăm đon adrin đơ̆ng rim anih jang kơ pal păng đĭ đăng kon pơ lei, tĕh đak Lào hrôih yak hlŏh đơ̆ng jĭ Covid-19, jang tơ iung ming dơ̆ng mŭk drăm, tơ pôl păng hơ nơ̆ng jang tŏk pran kơ jăp.

Phó Thủ tướng, Lào Kikeo Khaykhamphithun kŭm pơ ma hơ dăh, Việt Nam jĭ tĕh đak mă blŭng tơ gŭm jên, ăn khul bơ ngai juăt jang, gơih tơ mam pơ gang tơ gŭm ăn Lào tơ jră hăm tơ drong jĭ tơ pŏh ‘măng mă âu. Tơ drong ‘nâu sư tơ ƀôh hơ dăh tơ drong pơ vei gĭt kăl, ‘lơ̆ng hơ iă păng jang hơ doi tôm tơ drong đơ̆ng Lào - Việt Nam, Việt Nam - Lào.

Dơ̆ng: Tơ blơ̆