VOV4.Bahnar - Kơsơ̆ năr 30/7, tơ̆ pơlei tơm Buôn Ma Thuột, tang măt ăn Kơdră chĕp pơgơ̆r Dơnŏ anĭh Radiô Nơ̆r Pơma Việt Nam oei tơ̆ Tây Nguyên (VOV-Tây Nguyên) pơgơ̆r pôk ăn 2.200 blăh hơbĕn jang pơgang, 500 pơnĭl tang găn tơprăh păng lơ tơmam drăm ăn Dơnŏ anĭh tơm Dăr lăng hơlen jĭ jăn dêh char Dak Lăk (CDC Dak Lăk), vă tơgum khŭl ƀok thây pơgang dêh char Dak Lăk đei dơ̆ng tơmam drăm vă tang găn jĭ Covid-19.

Ƀok Ngô Quang Khương - Kơ iĕng Kơdră chĕp pơgơ̆r VOV-Tây Nguyên tơbăt, hăm ‘mĕh vă yak hơdoi hăm khŭl ƀok thây pơgang dêh char Dak Lăk vang tơ jră tang găn jĭ hơbŭh Covid-19, hơnĭh au hlôi dơ̆ng pang tang măt krao hơvơn rim khŭl jang, rim bơngai vang tơgŭm djru tơmam drăm jang pơgang: Hơbĕn ao jang pơgang, pơnĭl tang găn tơprăh păng tơmam drăm kăl anai. Đơ̆ng rŏng 3 năr krao hơvơn, hlôi đei 10 khŭl jang, rim bơngai vang chă tơgŭm 2.200 blăh hơbĕn ao jang pơgang, 500 măt pơnĭl tang găn tơprăh păng lơ tơam drăm kăl anai, hăm akŏp kon jên vă jê̆ 170.000.000 hlak jên.

Tơblơ̆ nơ̆r: Amazưt

Ấn Độ - Trung Quốc pơgơ̆r pơma đam khŭl linh ‘măng mă 12

VOV4.Bahnar  - Ấn Độ păng Trung Quốc pơgơ̆r ‘măng pơma đam mă 12 ‘măng xek tơlang pơma đam khŭl linh găh Kơdră chĕp pơgơ̆r Quân đoàn tơ̆ tơring sơlam tĕh đak lơ̆m năr au, năr 31/7. Đơ̆ng rŏng hlŏh 3 khei jô̆ đơ̆ng ‘măng hop akŏm tơ jê̆ hlŏh, ƀar păh hơnơ̆ng tơ ƀơ̆p mŭh măt vă pơma dơnŭh găh tơdrong kơdun lĭnh lĕch vĕh đơ̆ng rim tơring tơgar dĭh băl kơtang kơ ƀar tĕh đak tơ̆ tơring Hơlĕch La-đác (Ladakh). Kiơ̆ đơ̆ng Khŭl lĭnh tĕh đak Ấn Độ, ‘măng mă 12 pơma đam găh Kơdră chĕp pơgơ̆r quân đoàn ƀar păh Ấn Độ păng Trung Quốc đei pơgơ̆r tơ̆ hơnĭh tơƀư̆h tơ̆ trong Gak dăr lăng (LAC) păh Trung Quốc, Khŭl lĭnh ƀar păh gô pơma dơnŭh găh tơdrong kơdŭn lĭnh lĕch vĕh đơ̆ng tơring Hot Springs păng Gogra. Hơdrol kơ ‘nŏh, lơ̆m khei 2 au ki, đơ̆ng rŏng lơ ‘măng pơma đam khŭl jang tơbôl păng khŭl lĭnh, Ấn Độ păng Trung Quốc hlôi iŏk đei drơ̆ng mĭnh nơ̆r kơdŭn khul lĭnh lĕch vĕh đơ̆ng jĭh Păh Tu păng Pơbăh dơnau Pangong, hơnĭh hlôi đei tơblăh dĭh băl kơtang.Mălei, tơdrong kơdŭn khul lĭnh au tim mă xek tơlang keh đang tơdrong tơgar dĭh băl tơring sơlam tĕh đak kơ ƀar păh mư̆h oei đei rim tơring tơgar dĭh băl anai tơ̆ Hơlĕch Ladakh.

Tơblơ̆ nơ̆r: Amazưt