VOV4.Bahnar  – Vă tơnăp tang găn păng tơjră pơrang jĭ Covid -19, năr 26/4, Khul kơpal kơ Anih jang Hơlen pơrang jĭ Tây Nguyên hlôi năm apong păng bơ̆ jang hăm dôm anih linh vei xơlam teh găh tơdrong tang găn păng tơjră pơrang jĭ Covid-19 lơ̆m tơring xơlam teh kơ apŭng Ea Súp, dêh char Đăk Lăk.

Apŭng Ea Súp đei pơhlom 27km jăl trong xơlam tơkuh hăm teh đak Campuchia, tơ̆ âu đei 4 Anih linh vei xơlam teh tŏk bŏk oei chă hơlen, vei lăng trong xơlam teh. Năm apong păng bơ̆ jang hăm dôm anih linh vei xơlam teh tơ̆ Ea Súp, ƀok Viên Chinh Chiến, Kơdră Anih tơm jang Hơlen pơrang jĭ Tây Nguyên bơnê kơ tơdrong pơgơ̆r jang lơ̆m tang găn păng tơjră pơrang jĭ Covid -19 đơ̆ng kang ƀô̆, khul linh vei xơlam teh.

 Ƀok akhan, pơrang jĭ Covid -19 tŏk bŏk oei lang xă hli hlơt lơ̆m kơpal teh, tơrĕk hloh noh găh Campuchia, teh đak đei atŭm trong xơlam teh hăm Việt Nam, khul jang tơjră pơrang jĭ tơ̆ tơring athei jang kơjăp, hơtŏk kơchăng, vă tang găn tơtom dôm bơngai mơ̆t lĕch glăi găn xơlam teh.

Lan chih păng pơre nơ̆r