VOV4.Bahnar - Sơng iŏk nơ̆r krao hơvơn đơ̆ng Đại tướng Phan Văn Giang,  Yŏng Khŭl Ƀô̆ đô̆i vei lăng sơlam tĕh đak Việt Nam, ƀok Lloyd Austin, Yŏng khŭl lĭnh Mi hlôi iung năm tơmang Việt Nam đơ̆ng năr 28 trŭh năr 29/7. Kiơ̆ đơ̆ng bơngai pơma tơlĕch nơ̆r ăn Dơnŏ anĭh tơm jang Tơbôl Việt Nam, yă Lê Thị Thu Hằng, ‘măng năm tơmang Việt Nam đơ̆ng Yŏng Khul lĭnh Mi hơnơ̆ng tơgop atŏk kơtang tơgoăt tơgoăl dĭh băl, lui ngêh dih băl ƀar păh kon pơlei păng khul lĭnh ƀar tĕh đak, tơlĕch jang kiơ̆ rim tơdrong jang hơdoi lơ̆m vei lăng sơđơ̆ng tĕh đak hlôi đei kĭ pơkăp ƀar păh Khŭl lĭnh păng drơ̆ng mĭnh nơ̆r đơ̆ng Kơdră kơpal kơ ƀar tĕh đak, tơgop lơ̆m trong jang hơdoi tôm tong kơ Việt Nam-Mi. Lăp hơdrol ƀok Lloyd Austin truh tơ̆ Việt Nam, Mi hlôi pơjao keh đang 3 trĭu kơliêu vaccine Moderna ăn kơ Việt Nam ‘moi kiơ̆ trong jang COVAX. Ƀok Lloyd Austin, 67 sơnăm, jĭ yŏng 4 sao hlôi đei bơ̆ jang lơ̆m khŭl lĭnh Mi. Ƀok bơngai Mi găm mă blŭng pơm Yŏng Khŭl lĭnh Mi lơ̆m chăl sơnăm tĕh đak Mi. Ƀok đei pôk tơmơ̆t lơ̆m năr 22/1/2021, lăp 2 năr đơ̆ng rŏng ƀok Joe Biden đei tŏk pơm Ƀok kơdră tơm Mi.

Tơblơ̆ nơ̆r: Amazưt