Tui pathau khan oh ka ginup abih di Mentri Lao động-Thương binh saong Xã hội, meng akok thun tal ini dalam negar drei hu labaih 1 trieu urang oh hu bruk ngak. Karei jang dom sang bac đại học, dom labik pato megru bruk ngak tuk halei jeng jia lac duah hu bruk ngak chip ka sinh viên hadei di tuk bac tamat, rilo labik daok mbaok tangin sanya haong anek saih ka chất lượng pato pakai saong duah bruk ngak ka sinh viên bac di dom labik pato megru bruk ngak, ngak brei salih jalan sahaneng di anek saih saong amaik ame di anek saih hu khang kadang.

Gah công an bahrau khởi tố vụ án pachot blah mek drap ar rah tabiak di Công ty Địa ốc Alibaba, saong cap kreik urang pal akaok di công ty ni. Urang ngak suan, njauk jabat karja langyah tui adat hukum, min bruk khat lahik biak trak tuk hu yaok ribau urang lac menuac njauk lah pasoh di Alibaba. Tapa nan, bruk njauk batabiak nan lac trách nhiệm di dom jabat khik ramik karja daok pak halei tuk piah ka Alibaba ngak yau nan, pachot tuai damuai dalam tuk suai lavik yau nan

Tỉnh Bình Thuận urak ini hu 35 bangsa, dalam nan hu 34 bangsa takik. Meda lac, bhap bini bangsa takik dalam tỉnh bhian daok di dom xã bhum ceik, bhum glaong, labik dang praong gah an ninh, quốc phòng. Dalam bhap bini bangsa takik, urang hu angan je hu labik dang biak praong dalam bruk pathau khan, jak ba bhap bini ngak tui dom sarak di Đảng, hukum di karja, abih drei hu mbaok tame bruk cakrok patagok kinh tế - xã hội, khik ramik, paglaong pren khang di bruk jum pataom bangsa, khik caga quyền ngak po taneh ia.

TPHCM hu 10 muyim prong kayua dom jabat karja khik iek, khai thác. Dom muyim ini rilo meng daok di pasak bal raya. Muyim bhian hu mong lac sa dalam dom labik du lịch, labik rivang iek di tuai damuai jeng yau bhap bani bal raya. Yau nan min, anak meta hu mboh, oh njuak lac muyim halei jeng pachreih hu rilo manuac urang mai mong iek, hu dom muyim mboh biak joa lange, hu biak rilo makna ba tal bruk ini. Kadha vak di Minh Hạnh, urang vak di rayo sap ndom VN daok di bal raya HCM hu ndom tal bruk ini: ​

Dalam inem krung ilamo Việt Nam, inem mek ilamo Cam brei mboh cambaih dalam bruk padang ngak, dalam sarak, adat cambat tanarakun, alat ragam, ilamo daoh tamia, bruk ngak gaok glah lan am, menyim ngak jih dalah… Dalam nan, harei Katê ndung bak adat cambat , ilamu bhap bani, brei mboh rai diuk, bruk ngak mbang ngak huak yaok harei di bhap bani, labik pataom khik dom yaom ilamo di bhap bani Cam. Ini lac tukvak piah urang Cam meng gruak labik mai veik puk palei piah taom mbaok adei sa-ai dalam sang, taom gaok ayut sahabat, gauk gar but pajaih. Harei Katê thun ini rah tabiak meng harei 27 tal harei 29/9/2019. Daa mikva saong taong abih guak pang kadha vak brei thau ka bruk nan:

Mai tal dom palei Cam Ahier di tỉnh Bình Thuận dalam dom harei ini, bruk chreih chai bui sambai kuhria caga uan raok Katê 2019 ngan haong rilo bruk ilamo, thể thao ndung bak ilamo di bhap Cam daok hu mikva pasram piah duh ka harei Kate. Na Uy – urang pambuak bruk haong rayo sap ndom VN daok di tỉnh Bình Thuận hu kadha vak khan brei thau ka bruk kuhria caga uan raok harei Katê:

Jiak 340 darak pasa meng kan di TPHCM hu labik dang prong dalam bruk pablei salih, pabak pandap panda ka urang blei mbang. Min anak bruk tagok khang di dom gah pablei rai tui jalan bahrau song yaok ribau cửa hàng tiện lợi, siêu thị song pasak pablei salih, nan ye urang blei di dom drak pasa meng kan trun dok 60-65% duh song dahlau deih. Kayua yau nan ye, bruk salih jalan pablei salih dịch vụ, cơ sở hạ tầng dok lac bruk hu ba tabiak piah cakrok patagok siam lagaih bruk pablei salih di darak pasa meng kan. Lệ Hằng, urang vak di rayo sap ndom VN di ban raya.HCM hu kadha vak ndom tal bruk ni:

Tijuk pluh pak thun dahlau, harei 23/9/1945, thực dân Pháp patuh phao taong tame Sài Gòn, peih tabiak bruk mesruh metak meblah mek taneh ia drei mbang ka 2. Yau nan, tok dalam 21 harei hadei di tuk Chủ tịch Hồ Chí Minh puac harak Tuyên ngôn Độc lập di harei 02/9/1945, menek tabiak taneh ia Việt Nam Dân chủ Cộng hòa, bhap bini Nam Bộ njauk pan phao veik dang tagok mesruh.

Ndom tal Cách mạng bilan 8 saong Nam bộ kháng chiến di gah meraong, lac oh klaak tapa hu angan di Giáo sư Trần Văn Giàu (6/9/1911 - 16/12/2010). Ong là Chủ tịch Ủy ban kháng chiến Nam kỳ akaok meti, lac suan yava di Nam bộ dom harei kháng chiến. Lingiu di nan, ong daok lac sa urang sử học hu dom pho sử quý giá caik veik ka rai hadei..