Dŭm hruê anei, ti lu đang boh durian ti să Čư̆ Prŏng, čar Gia Lai, mnuih ƀuôn sang mưn mnuih pĕ lui hĕ dŭm ana djiê leh. Ti alŭ Hoàng Yên, lu đang boh durian êlâo dih mtah mda, ară anei knŏng adôk dŭm phŭn kyâo krô, kƀah adhan. Leh lu blư̆ duah hdră dŏng mdrao ƀiădah amâo mâo klei tŭ dưn, Trịnh Ngọc Oanh, alŭ Hoàng Yên rŭ hĕ jih đang boh leh dlăng kriê wiê ênăk 4 thŭn. Gŏ sang ayŏng Oanh mâo 162 phŭn boh durian, mŭt hlăm thŭn tal 4 leh anăn mprăp kơ gưl hrui pĕ tal êlâo. Ƀiădah, knŏng leh sa wưng, ana bi kñĭ hla leh anăn djiê.

“War sang kâo 4 thŭn leh amâo mâo mboh ôh, thŭn anei dơ̆ng mboh djiê jih leh. Hơưi êdi, ai mă bruă leh prăk kăk. Ară anei tŭ snăn yơh, khăt hĕ yơh.”

 Amâo djŏ knŏng gŏ sang Oanh, lu gŏ sang mkăn ti alŭ Hoàng Yên ăt lĕ hlăm klei msĕ snăn. Mâo gŏ sang luič dŭm pluh phŭn, mâo gŏ sang luič dŭm êtuh phŭn. Mơ̆ng sa đang boh durian mtah mda, đang boh mơ̆ng ayŏng Lê Văn Thành ti să Čư̆ Prông ară anei knŏng adôk dŭm phŭn ana kyâo mtah. Hla luh giăm jih, adhan krô krô, lu ana kyâo djiê leh. Gŏ sang ayŏng Thành mbĭt hŏng phung ayŏng adei pla giăm 300 phŭn ana boh durian, truh kơ ară anei hlăm brô 6 thŭn. Thŭn dih, đang boh mâo hrui pĕ hlăm brô 17 ton boh, hŏng ênoh čhĭ 57.000 prăk hlăm sa kg. Ƀiădah, mŭt hlăm yan thŭn anei, ana boh mtŭk mtŭl mâo mnơ̆ng ngă leh anăn djiê lu. Khădah ka thâo klă ôh phŭn agha ba klei mnơ̆ng ngă, ayŏng Thành brei thâo hlăm ana mâo dŭm anôk jŭ. Leh kơ anăn, hla dliu krô, luh jih leh anăn ana djiê ƀrư̆ ƀrư̆.

“Thŭn dih mâo djiê ƀiădah djiê ƀiă, thŭn anei djiê lu snăn mnuih ƀuôn sang bi rŭ lŏ wĭt pla. Mnuih ƀuôn sang ênguôt, amâo čiăng kbiă kơ hma ôh. Dŭm thŭn siă suôr ƀiădah ară anei djiê jih, ênguôt snăk.”

 Ngô Anh Tuấn, pô thơ̆ng kơ bruă Knơ̆ng bruă lŏ hma - wăl hdĭp mda să Čư̆ Prŏng, čar Gia Lai, hâo hưn, klei boh durian djiê lu ară anei kƀĭn lu ti alŭ Hoàng Yên leh anăn ƀuôn Bạt. Ênhă luic̆ liê dưi ksiêm yap êbeh 10 ha. Hluê si klei ksiêm dlăng tal êlâo, dhar bruă djŏ tuôm bi mklă boh durian djiê năng ai djŏ tuôm hŏng mta mmao jhat. Dŭm klei bi êdah hlăm ana msĕ hŏng klei tiêu djŏ mmao jhat ngă djiê pral, djiê êmưt. Klă klơ̆ng, lu ênhă luč liê dôk ti dŭm krĭng lăn dap, klei dưi mđuê êa amâo jăk. Êjai adiê hjan sui, êa kdơ̆ng hlăm đang war, mjing klei găl kơ mmao jhat đĭ lêc̆ leh anăn đĭ lar. Ngô Anh Tuấn brei thâo:

“Đa đa dŭm đang djiê jing dŭm đang mâo lăn dap, êa amâo dưi mđuê̆. Čiăng ñĕ kơ klei đĭ lar, alŭ wăl mtrŭt mjhar dŭm gŏ êsei mâo ana djiê khăt ana, bi mdoh đang war; dŭm đang ka djiê snăn klei ƀăng mđuê̆ êa, amâo lui ana djiê ôh.”

Ară anei knơ̆ng bruă djŏ tuôm să Čư̆ Prŏng, čar Gia Lai lŏ dơ̆ng ksiêm dlăng ênhă durian mâo klei luic̆ liê, ktrâo lač kơ mnuih ƀuôn sang msir mghaih dŭm đang war mâo klei hmăi leh anăn pral mđoh mđuê êa. Klei durian djiê sa wa leh wưng hjan sui amâo djŏ knŏng ngă luč liê klă anăp kơ mnuih pla mjing, ƀiădah lŏ bi êdah dŭm klei truh tơdah mđĭ kyar mta ana anei ti dŭm krĭng lăn amâo djŏ guôp./.