Anôk đru kčĕ jing anôk mnuih ƀuôn sang ngă lŏ hma, êpul hgŭm bruă, anôk bruă duh mkra leh anăn phung mkra mjing dưi bi trông, nao hgŭm hŏng dŭm hdră mnêč mrâo, kdrăp mrâo leh anăn hdră mlih mrô. Mta phŭn đru kčĕ mđing kơ dŭm boh klei klă klơ̆ng hlăm bruă pla mjing msĕ si hdră mnêč pla mjing, gang mkhư̆ klei hluăt ƀơ̆ng mnơ̆ng ngă, bi mklă mrô, tui duah phŭn agha, mkŏ anôk mnia mblei leh anăn ba čhĭ mnơ̆ng dhơ̆ng lŏ hma. Nguyễn Công Vương, bi ala kơ sa anôk bruă duh mkra nao hgŭm hlăm hdră, brei thâo, bruă ba anôk bruă duh mkra kdrăp mrâo truh giăm hĭn hŏng mnuih pla mjing srăng mjing klei găl čiăng kơ dŭm hdră msir mrâo dưi ksiêm dlăng leh anăn ba yua djŏ guôp hŏng boh sĭt.

 "Anôk bruă duh mkra srăng hrăm mbĭt hŏng Anôk mtrŭt mjhar bruă lŏ hma pŏk ngă dŭm gru hmô ba yua bruă lŏ hma kdrăp mrâo nao hlăm boh sĭt. Mơ̆ng dŭm gru hmô mâo klei bi mguôp plah wah anôk bruă duh mkra leh anăn Anôk mtrŭt mjhar bruă lŏ hma, bruă ba yua kdrăp mrâo srăng dưi bi lar leh anăn nao hlăm bruă pla mjing pral hĭn."

Mbĭt hŏng Anôk bruă đru kčĕ, 4 Êpul đru kčĕ hdră mnêč leh anăn hdră bruă mtrŭt mđĭ bruă lŏ hma dưi mkŏ mjing, mđing truh jing êpul đru kčĕ thơ̆ng, tŭ mă klei čiăng mơ̆ng anôk bruă leh anăn mkŏ mnuih ƀuôn sang ngă lŏ hma, êpul hgŭm bruă, anôk bruă duh mkra hŏng dŭm hdră mnêč, kdrăp mrâo djŏ guôp.

Đặng Thị Thủy, K'iăng khua knơ̆ng bruă lŏ hma leh anăn wăl hdĭp mda čar Dak Lak lač, bruă mkŏ mjing Anôk bruă đru kčĕ leh anăn dŭm Êpul đru kčĕ srăng mkŏ mjing sa êlan mkŏ dua tĭng plah wah anôk bruă mtrŭt mđĭ bruă lŏ hma hŏng mnuih pla mjing; mơ̆ng anăn hmao thâo klei dleh dlan, klei čiăng klă sĭt čiăng đru kčĕ, đru. Aduôn Thủy mñă klă, bruă mtrŭt mđĭ bruă lŏ hma ară anei amâo djŏ knŏng mdei ti hdră ba jao hdră mnêč ƀiădah brei mguôp hŏng kdrăp mrâo, anôk mnia mblei leh anăn mkŏ mjing bruă mkra mjing.

Mta kñăm mơ̆ng hmei jing čiăng kơ Anôk bruă đru kčĕ anei jing sa anôk jĕ giăm hŏng mnuih ngă lŏ hma, knơ̆ng bruă leh anăn êpul hgŭm bruă; đru kơ mnuih ngă lŏ hma mâo klei thâo săng kơ hdră mnêč mrâo mrang, mbĭt anăn dưi bi mguôp hŏng anôk ba čhĭ. Amâo djŏ knŏng jing bi mlih hdră mnêč msĕ si sui hŏng anei ôh, anei srăng jing anôk bi mguôp plah wah 4 tĭng, msir mghaih dŭm bruă klă sĭt kbiă hriê mơ̆ng klei čiăng ngă bruă, mơ̆ng anăn mkŏ mjing dŭm hdră bi hgŭm pla mjing, leh anăn lŏ dơ̆ng bi lar, mđĭ lar dŭm gru hmô."