Anôk bruă mtrŭt mđĭ bruă lŏ hma ala čar brei thâo, Hdră mtrŭn 36 mơ̆ng Knŭk kna ba mdah hruê 31/7 bi hrŏ leh klei ngă hră mơar mkăp mrô knăl krĭng pla mjing, mrô knăl anôk đŭng hruh. Bruă mkăp lehanăn kriê dlăng mrô knăl dưi hluê ngă hlăm êlan mạng, hluê hdră êpul êya, mnuih čŏng hưn, čŏng đua klam, mguôp hŏng klei ksiêm dlăng lehanăn tui duah phŭn agha. Leh giăm 2 mlan pŏk ngă, kluôm ala mkăp mrâo 787 mrô knăl krĭng pla mjing.

Ti Gia Lai,  Nguyễn Thị Tố Chân, kiăng khua knơ̆ng bruă lŏ hma leh anăn wăl hdĭp mda brei thâo, kluôm čar mkăp brei leh 43 mrô krĭng pla mjing, mđĭ ênoh mrô krĭng pla mjing kluôm čar truh 424 mrô.

“Bruă hrui mă klei čih pioh klei hâo hưn kơ drei ƀuh klei dlăng kluôm jing klei čiăng mơ̆ng mnuih ƀuôn sang jing mâo. Ƀiădah klei thâo săng mơ̆ng mnuih ƀuôn sang ka sa hnơ̆ng ôh, kyuanăn brei lŏ dơ̆ng hâo hưn, mtrŭt mjhar, mtô mblang čiăng kơ arăng thâo săng bruă tŭ mă sa mrô krĭng pla mjing jing tŭ mă sa anôk čiăng bi mklă ênoh yuôm mnơ̆ng dhơ̆ng pô. Leh klei thâo săng mnuih ƀuôn sang dưi mđĭ snăn srăng bi leh bruă tui duah phŭn agha. Mơ̆ng anăn, dŭm êpul hgŭm bruă, anôk bruă duh mkra mkŏ mjing klei bi hgŭm hlăm ênoh čih pioh mơ̆ng mnuih ƀuôn sang.”

Khă gơ̆ klei ngă hră mơar mkăp mrô krĭng pla mjing jăk găl hĭn, pô bi ala anôk bruă duh mkra leh anăn êpul hgŭm bruă lač rơ̆ng kơ mrô grăp yan mrâo jing bruă brei mđing. Čiăng dưi ngă klei anăn, mnuih pla mjing brei čih hră mơar ngă bruă, ksiêm dlăng mnơ̆ng yua mkra mjing, hưn mthâo hră mơar; anôk đŭng hruh brei rơ̆ng dŭm klei găl leh hưn mdah. Anei jing dŭm klei hâo hưn čiăng tui duah phŭn agha leh anăn ksiêm dlăng hnơ̆ng tŭ jăk mnơ̆ng dhơ̆ng lŏ hma. Dŭm anôk bruă ăt akâo mkŏ mjing klei bhiăn čiăng kơ êpul mtrŭt mđĭ bruă lŏ hma êpul êya nao hgŭm mkăp hdră mnêč, đru kơ ƀĭng ngă lŏ hma hluê ngă leh anăn rơ̆ng dŭm klei čiăng kơ mrô.

Lê Quốc Thanh, Khua anôk bruă mtrŭt mđĭ bruă lŏ hma ala čar brei thâo, wưng kơ anăp hdră mtrŭt mđĭ bruă lŏ hma êpul êya srăng mđĭ ktang ktrâo lač kơ mnuih ƀuôn sang mkŏ mjing bruă duh mkra pla mjing, mtô mjuăt phung knuă druh nah gŭ, bi hgŭm anôk bruă duh mkra hŏng êpul hgŭm bruă leh anăn ƀĭng ngă lŏ hma; mbĭt anăn bi kluôm dŭm klei kpăk gun mâo čiăng akâo ruh mgaih.

"Êpul mtrŭt mđĭ bruă lŏ hma êpul êya brei hrăm mbĭt hŏng mnuih ƀuôn sang, nao mbĭt hŏng mnuih ƀuôn sang. Dưi mơh bi mlih hdră ngă bruă, năng ai jing ti đang boh durian, đang kphê, đang kruĕ hruĕ, êjai mnuih ƀuôn sang dôk ngă bruă, snăn êpul nao đru kơ mnuih ƀuôn sang ngă mtam dŭm klei ngă hră mơar hlăm kdrăp điện tử leh anăn dŭm bruă mnuih ƀuôn sang dôk tuôm".