Mlan 8 mrâo êgao, êpul 4 sang mkra mjing pui kmlă êran hŏng ai angĭn Čư̆ Nĕ 1, Čư̆ Nĕ 2, Krông Ƀŭk 1 leh anăn Krông Ƀŭk 2, hnơ̆ng mâo 200 MW, ti să Krông Ƀŭk leh anăn Čư̆ Pơ̆ng, čar Dak Lak, bi leh bruă ngă pui kmlă dŭm tua bin knhal tuč. Leh mŭt ngă bruă, dŭm hdră bruă amâo djŏ knŏng thiăm mbŏ pui kmlă doh ƀiădah lŏ mjing thiăm hnư hrui wĭt năng yap kơ alŭ wăl. Trần Quốc Tuấn, Khua anôk bruă sang čư̆ êa să Krông Ƀŭk, brei thâo dŭm hdră bruă dưi đru mguôp kơ ngăn prăk alŭ wăl êbeh 115 êklai prăk grăp thŭn, mbĭt anăn mjing bruă mă leh anăn pŏk klei găl mđĭ kyar mrâo.

“Hdră bruă đru mguôp leh kơ alŭ wăl kơ ênoh hrui wĭt lu êdi mkă hŏng dŭm hdră bruă ti dŭm mta bruă mkăn hlăm alŭ wăl. Anôk ala mđĭ kyar mơ̆ng dŭm hdră bruă pui kmlă êran hŏng ai angĭn ti Krông Ƀŭk adôk prŏng êdi. Hmei adôk 4-5 hdră bruă dôk dưi čuăl mkă čiăng iêo jak klei duh bi liê čiăng mjing hnư hrui wĭt đru mguôp mđĭ kyar truh 2 ênoh mrô kơ să.”

Anei ăt jing klei găl prŏng mơ̆ng Dak Lak hlăm hdră mđĭ kyar bruă pui kmlă êran hŏng ai angĭn. Hluê si hdră kčah wưng thŭn 2025-2035, čar mâo 125 hdră bruă pui kmlă êran hŏng ai angĭn, hlăm anăn 57 hdră bruă pui kmlă êran hŏng ai angĭn, hnơ̆ng pui kmlă giăm 4.000 MW. Ƀiădah, truh ară anei, Dak Lak knŏng tŭ ư hdră êlan duh bi liê leh anăn tŭ ư phung duh bi liê kơ 19 hdră bruă pui kmlă êran hŏng ai angĭn, hnơ̆ng pui kmlă giăm 1.128 MW; hlăm anăn mâo 11 hdră bruă pui kmlă êran hŏng ai angĭn, hnơ̆ng pui kmlă giăm 590 MW. Klei kbưi prŏng plah wah klei găl leh anăn ênoh hdră bruă dưi pŏk ngă brei ƀuh dŭm "anôk kpăk" brei lŏ msir mgaih. Hlăm anăn, hră mơar duh bi liê, ruh mgaih anôk ala, anôk bruă nah gŭ lehanăn klei dưi ruh mgaih hnơ̆ng dưi ba yua ăt jing dŭm bruă mâo phung duh bi liê mđing dlăng. Kơ klei anei, Nguyễn Thị Thu An, Khua knơ̆ng bruă tuh tia mnia blei čar Dak Lak, brei thâo:

"Hluê si klei gĭt gai mơ̆ng Knơ̆ng bruă sang čư̆ êa čar Dak Lak, wưng hmei dôk gĭr bi hrŏ klei ngă hră mơar duh bi liê trŭn adôk 50 - 60% hruê mmông mkă hŏng êlâo. Bruă đru kčĕ "êlan mtah" srăng msir mgaih pral klei ngă hră mơar duh bi liê, đru kčĕ gưl bruă sang čư̆ êa duh bi liê hŏng dŭm hdră bruă pui kmlă êran hŏng ai angĭn."

Hluê si Đào Mỹ, kiăng khua bruă sang čư̆ êa čar Dak Lak, dŭm krĭng mâo klei găl srăng dưi mđing tal êlâo mtrŭt mđĭ, iêo jak klei duh bi liê, hŏng mta kñăm mjing klei găl čiăng kơ dŭm hdră bruă dưi pŏk ngă pral tơdah mkăp djăp ênŭm klei čiăng.

“Dŭm anôk mâo klei găl, hmei srăng mtrŭt mđĭ klei iêo mthưr, mtrŭt mjhar klei duh bi liê čiăng kơ pô duh bi liê ngă. Si srăng ngă tơdah pô duh bi liê hriê ksiêm dlăng, tơdah rơ̆ng dŭm klei găl duh bi liê snăn dưi pŏk ngă mtam, amâo dưi lŏ tuôm hŏng klei dleh dlan ôh.”

Pui kmlă êran hŏng ai angĭn srăng jing sa hlăm dŭm boh kdrŭt yuôm bhăn čiăng kơ Dak Lak mtrŭt mđĭ hdră bi mlih mtah, đĭ kyar pral leh anăn đĭ kyar hơĭt kjăp./.