Dŭm boh durian dôk mâo khăt mơ̆ng đang pla mjing prŏng 3,6 ha mơ̆ng Hồ Thị Huệ, ti alŭ 19/5, să Krông Pač, čar Dak Lak. Yan anei, gŏ sang ñu hrui pĕ êbeh 90 ton durian. Jih jang boh mnga mâo anôk bruă duh mkra siñê hrui blei hŏng ênoh 68.000 prăk/kg. Huệ brei thâo, hnơ̆ng ênoh anei dưi bi mklă hlăm klei bi lông blei mkŏ mjing ti krĭng pla mjing mtam.

“Hmei čang hmăng dŭm klei bi lông anei srăng lŏ dơ̆ng mđĭ kyar čiăng ba mnơ̆ng dhơ̆ng mnuih ƀuôn sang dưi ba čhĭ klă mngač leh anăn  djŏ hĭn.”

Mbĭt hŏng đang pla mjing Huệ, 9 gŏ sang mkăn ti să Krông Pač, čar Dak Lak mâo ênhă êbeh 14 ha, mâo ruah hgŭm hlăm klei bi lông blei. Anei jing dŭm đang Durian Dona mâo hră mơar, mrô krĭng pla mjing leh anăn hâo hưn kơ hdră mkra mkra mjing, kdrăp mnơ̆ng bi liê, bi mklă phŭn agha, doh êƀăt mnơ̆ng ƀơ̆ng leh anăn klei găl duh kơ bruă ba čhĭ kơ ala tač êngao.

Êlâo kơ čuăn ênoh, anôk bruă duh mkra dưi mkŏ čiăng nao ti grăp đang ksiêm dlăng. Mơ̆ng hnơ̆ng mphŭn 55.000 prăk/kg, leh dua tuôr mplĕ hră, ênoh djŏ blei dưi bi mklă jing 68.000 prăk/kg.  Ênoh hră kuôl kă giăm 24 êklai prăk, lu hĭn ênoh mphŭn kčưm hlăm brô 4,5 êklai prăk. Đinh Thị Hoa, Khua Knơ̆ng bruă ba čhĭ mnơ̆ng dhơ̆ng lŏ hma kơ ala tač êngao Nguyên Thuận brei thâo:

“Knơ̆ng bruă hmei nao ksiêm dlăng leh grăp đang   pla mjing leh anăn ƀuh  jing 10 đang pla mjing mơ̆ng 10 gŏ êsei ƀĭng ngă lŏ hma mâo djăp hnơ̆ng čuăn leh anăn djăp hnơ̆ng mâo hlue si Knơ̆ng bruă čiăng.  Tĭng kơ bruă sang čư̆ êa alŭ wăl ăt đru leh knơ̆ng bruă dưi hgŭm, mjing klei găl kơ anôk bruă duh mkra leh anăn phung ngă lŏ hma dưi mkŏ mbĭt.”

Klei năng mđing jing klei bi lông blei amâo dôk ti hnơ̆ng 68.000 prăk/kg, ƀiădah bruă hâo hưn kơ krĭng pla mjing dưi ba hlăm hdră mnia blei. Anôk bruă duh mkra dưi bi mklă hŏng ênoh mrô kơ hnơ̆ng, hdră mkra mjing, hnơ̆ng jăk leh anăn klei dưi ngă djăp hnơ̆ng čuăn anôk ba čhĭ; phung  pla mâo thiăm  tur knơ̆ng bi mklă ênoh yuôm mnơ̆ng dhơ̆ng. Anei jing hdră  ngă djŏ guôp hŏng klei mĭn bruă duh mkra lŏ hma: bi mlih mơ̆ng klei čhĭ hnơ̆ng mnơ̆ng dhơ̆ng jing čhĭ hnơ̆ng jăk, ênoh mrô leh anăn klei bi mklă phŭn agha. Lại Đức Đại, Khua Knơ̆ng bruă sang čư̆ êa să Krông Pač, lač anei jing sa knhuang lông ngă hlăm hdră mkŏ mjing mnơ̆ng dhơ̆ng, mđĭ klei mkŏ plah wah phung mkra mjing leh anăn anôk ba čhĭ.

“Phung ngă lŏ hma srăng dưi čhĭ amâo djŏ mnơ̆ng dhơ̆ng ôh ƀiădah dưi čhĭ ênoh yuôm hŏng boh tŭ diñu năng dưi dưn. Hmei ăt čang hmăng mkŏ plah wah anôk ba čhĭ leh anăn phung mkra mjing hŏng klei pral hĭn, tŭ dưn hĭn, ba klei ư ai kơ dŭm tĭng čhĭ leh anăn phung blei.”

Mơ̆ng boh sĭt anei, klei bi lông blei srăng jing sa hdră mđĭ bruă mnia blei, boh nik dŭm đang mâo hnơ̆ng êdah kdlưn, boh bi knar, hră mơar klă mngač leh anăn ngă djŏ klei čiăng ba čhĭ kơ ala tač êngao. Yuôm bhăn hĭn, ñu mjing klei mđing, hưn mđah hnơ̆ng jăk leh anăn đru kơ anôk ba čhĭ thâo klă kơ dŭm krĭng pla mjing jăk. Đặng Thị Thủy,  K’iăng Khua Knơ̆ng bruă lŏ hma leh anăn Wăl hdĭp mda čar Dak Lak lač hdră ngă anei mjing thiăm boh kdrŭt kơ phung mkra mjing mđing uêñ hĭn kơ hnơ̆ng jăk leh anăn bi hgŭm hdră ngă bruă.

Hdră ngă mbruă leh anăn klă sĭt čiăng kơ phung ngă lŏ hma hơ̆k mơak leh anăn mjing klei êdah kdlưn hlăm klei mĭn, mơ̆ng bruă mkra mjing lŏ hma mơ̆ng đưm snăn srăng bi mlih jing ngă bruă duh mkra lŏ hma, kčah ênoh yuôm mnơ̆ng dhơ̆ng jing mrô sa.”

Sa klei bi lông blei ka dưi bi mlih ôh hdră ba čhĭ mơ̆ng jih bruă mnơ̆ng dhơ̆ng. Ƀiădah tơdah lŏ dơ̆ng bi leh, bruă bi mklă hnơ̆ng jăk, hnơ̆ng lu leh anăn hdră mkra mjing srăng jing tur knơ̆ng kơ bruă mnia blei tŭ dưn, boh nik hŏng dŭm krĭng pla mjing, hnơ̆ng bh jăk, ngă djŏ klei čuăn anôk mnia blei.