Mơ̆ng dŭm gŏ êsei pla, truh kơ ară anei ênhă pla durian ti să Rờ Kơi, čar Quảng Ngãi ƀrư̆ ƀrư̆ pŏk mlar hŏng hlăm brô 355 ha. Mbĭt hŏng pŏk mlar ênhă, să dôk mkŏ hŏng anôk bruă duh mkra, mkŏ mjing mrô krĭng pla mjing leh anăn duah anôk hrui blei hơĭt kjăp. Anei dưi dlăng jing mta yuôm bhăn čiăng kơ ana durian đĭ kyar hơĭt kjăp. Nguyễn Minh Thuận, Khua anôk bruă sang čư̆ êa să Rờ Kơi, čar Quảng Ngãi brei thâo, ti anăp alŭ wăl bi mguôp hŏng anôk bruă duh mkra đru bi hơĭt anôk hrui blei kphê leh anăn durian:

"Čiăng čŏng pô mâo anôk ba čhĭ kơ mnơ̆ng dhơ̆ng mơ̆ng ƀĭng ngă lŏ hma, alŭ wăl dôk bi mguôp hŏng dŭm anôk bruă duh mkra čiăng hrui blei êjai, bi hơĭt anôk ba čhĭ kơ dŭm mta mnơ̆ng dhơ̆ng msĕ si kphê leh anăn durian. Ƀiădah, čiăng rơ̆ng kjăp leh anăn sui, ăt hmăng hmưi dŭm knơ̆ng, dhar bruă leh anăn bruă sang čư̆ êa čar Quảng Ngãi mâo hdră êlan prŏng, iêo jak duh bi liê dŭm sang măi hrui blei, mkra mjing mnơ̆ng dhơ̆ng lŏ hma, boh nik dŭm mta boh kroh hlăm alŭ wăl krĭng Yŭ, čiăng rơ̆ng kơ mnuih ƀuôn sang hơĭt anôk ba čhĭ êjai hrui pĕ boh mnga."

Durian hlăk jing sa hlăm dŭm ana pla mjing mâo ênoh yuôm ti krĭng Yŭ čar Quảng Ngãi. Čar Quảng Ngãi ară anei mâo hlăm brô 4.150 héc ta boh durian, hlăm anăn êbeh 1.000 héc ta mboh leh. Truh kơ ară anei, kluôm čar mâo 23 mrô krĭng pla mjing boh durian ba čhĭ kơ ala tač êngao, kluôm ênhă giăm 392 héc ta. Mrô krĭng pla mjing đru ksiêm dlăng hdră mkra mjing, mnơ̆ng dhơ̆ng lŏ hma, mnơ̆ng dhơ̆ng hdĭp, hnơ̆ng êa drao răng mgang mnơ̆ng pla mjing leh anăn tui duah phŭn agha mnơ̆ng dhơ̆ng, mkăp djŏ hŏng klei čiăng mơ̆ng anôk ba čhĭ. Nguyễn Hoài Tâm, Khua anôk bruă pla mjing, răng mgang mnơ̆ng pla mjing leh anăn kriê dlăng hnơ̆ng tŭ jăk čar Quảng Ngãi brei thâo, mta kñăm amâo djŏ mđĭ ênhă hŏng djăp ênoh ôh ƀiădah mnơ̆ng dhơ̆ng mkra mjing brei mâo anôk ba čhĭ.

"Ênhă durian ară anei lu jing ti dŭm să nah Yŭ msĕ si: Mô Rai, Rờ Kơi, Ia Tơi, Bờ Y, dŭm să anei jing dŭm să krĭng knông lăn. Klei anăn brei ƀuh yan adiê, lăn ala ti anei djŏ guôp hŏng ana durian. Ƀiădah, anei jing ana pla mjing mâo ênoh duh bi liê lu, klei thâo kriê dlăng leh anăn êa jua hơĭt kjăp, snăn mnuih ƀuôn sang brei thâo klă hdră mnêč kơh dưi mđĭ kyar kjăp".