Dŭm thŭn êlâo, Briu Chéo, mnuih djuê ana Ktu, ti să krĭng čư̆ čhiăng Bến Giằng, ƀuôn prŏng Đà Nẵng (kdriêk Nam Giang, čar Quảng Nam hđăp) lu jing ngă lŏ hma, mă bruă mưn djăp mta ƀiădah klei hdĭp ăt ƀun nanao. Briu Chéo čan leh knơ̆ng prăk êbeh 200 êklăk prăk, mâo bruă sang čư̆ êa alŭ wăl đru ana mjeh, êđai mjeh, Briu Chéo pŏk mlar war rông čiăng rông êmô, ŭn, pla ana boh kroh. Ară anei war rông mơ̆ng Briu Chéo mâo giăm 200 drei êmô, ŭn rông hŏng êđai mjeh djuê ana pô leh anăn đang boh kroh…War rông mơ̆ng Briu Chéo mâo lu mnuih hriê čhưn dlăng tui hriăm. Hlei gŏ sang dôk hlăm alŭ, ƀuôn dleh dlan,  Briu Chéo mprăp đru.  

“Gŏ sang kâo dưi čan prăk mnga hdjul kyua anăn duh bi liê mđĭ kyar bruă duh mkra đru kơ gŏ sang hơĭt kjăp leh anăn đĭ kyar hĭn, klei hdĭp gŏ sang trei mđao hĭn êlâo. Anăp anei čang hmăng bruă sang čư̆ êa alŭ wăl mjing klei găl đru kơ prăk čan, kriê dlăng hdră mnêč mnơ̆ng rông hlăm bruă mđĭ kyar bruă duh mkra. Mnuih ƀuôn sang alŭ wăl, hlei gŏ sang čiăng kâo bi êdah hdră ngă bruă kơ diñu mâo klei găl mđĭ kyar bruă duh mkra leh anăn mjing klei găl đru kơ mnuih ƀuôn sang mâo thiăm bruă mă”.

Amai Bhnướch Thị Blăc, djuê ana Kơtu ti să A Vương, ƀuôn prŏng Đà Nẵng (kdriêk Tây Giang, čar Quảng Nam hđăp) kkiêng hlăm gŏ sang dleh dlan. Hruê dôk ung mô̆, amai bi trông hŏng ung pô pŏk anôk čhĭ mnơ̆ng yua aguah tlam mkăp kơ mnuih ƀuôn sang hlăm alŭ. Kyua mkiêt mkriêm ƀiă prăk, amai lŏ čan prăk knơ̆ng prăk, duh bi liê rông mnơ̆ng leh anăn pla ana boh kroh. Truh ară anei, amai Blăc pla êbeh 2 héc ta ana boh krueč mmih Vinh, hŏng 800 phŭn leh anăn boh kruê dŭng mâo hnư hrui wĭt dŭm pluh êklăk prăk/yan. Ba yua lăn đang hma leh anăn mnơ̆ng ƀơ̆ng ti anôk, amai Blăc ngă war rông ŭn, mnŭ leh anăn duh bi liê pla dliê kyâo prŏng.

Gŏ sang amai Blăk tlaih leh mơ̆ng gŏ sang ƀun ƀin leh anăn mâo mnơ̆ng dhơ̆ng, mnơ̆ng pioh, rŭ mdơ̆ng sang prŏng siam, blei êdeh ô tô nao mă bruă. Amai Bhnướch Thị Blăk lŏ mjing bruă mă kơ lu mnuih mă bruă ƀun ti alŭ wăl, mâo hnư hrui wĭt hĭt kjăp. Leh tĭng tla prăk bi liê, grăp thŭn gŏ sang amai Bhnướch Thị Blăk mâo prăk mnga mơ̆ng hdră duh mkra giăm 200 êklăk prăk.

“Êlâo dih, gŏ sang dleh dlan, mơ̆ng leh mâo Knơ̆ng prăk đru ba yang ƀuôn đru brei čan prăk gŏ sang pŏk mlar thiăm dŭm gru hmô msĕ si pla boh kruĕ mmih leh anăn pla ana kyâo bi êyui leh anăn rông mnơ̆ng, mơ̆ng anăn klei hdĭp gŏ sang đĭ kyar. Ară anei klei hdĭp hơĭt kjăp hnư hrui wĭt ăt hơĭt mơh. Mgi dih ung mô̆ mĭn tĭng lŏ čan thiăm prăk pioh mđĭ kyar gru hmô prŏng hĭn”.

Čiăng mjing klei găl kơ mnuih ƀuôn sang mđĭ kyar bruă duh mkra, mđĭ hnư hrui wĭt, bruă sang čư̆ êa să A Vương đru ana mjeh, mnơ̆ng rông, đru kơ mnuih ƀuôn sang mđĭ kyar bruă duh mkra. Lưu Văn Khương, K'iăng khua anôk bruă sang čư̆ êa să knông lăn A Vương, ƀuôn prŏng Đà Nẵng brei thâo, alŭ wăl bi mklă nanao bruă bi hrŏ ƀun jing bruă klam kđi čar, pŏk ngă kjăp dŭm hdră êlan đru mơ̆ng Gưl dlông, ƀuôn prŏng čiăng mtrŭt mjhar, đru kơ mnuih ƀuôn sang hluê ngă bruă msir klei ư̆ êpa, bi hrŏ klei ƀun knap.

“Lu gŏ êsei jhŏng čan prăk čiăng pŏk mlar bruă pla mjing, mâo lu gŏ êsei jing gŏ êsei pla mjing mbruă. Msĕ si gŏ êsei amai Blăc, gŏ êsei ayŏng Khánh leh anăn dŭm gŏ êsei ti dŭm alŭ mkăn. Alŭ wăl mjing klei găl jih ai tiê kčĕ hŏng knơ̆ng prăk knŭk kna, knơ̆ng prăk bruă lŏ hma mđĭ ênoh prăk brei čan čiăng kơ mnuih ƀuôn sang mâo ênoh prăk rơ̆ng kơ bruă đru mđĭ kyar bruă pla mjing”.

Ƀuôn prŏng Đà Nẵng ară anei mâo êbeh 50.000 ƀĭng ngă lŏ hma thâo mbruă, hlăm anăn mâo lu gru mngač jing mnuih djuê ana Ktu. Grăp thŭn, Êpul hgŭm ƀĭng ngă lŏ hma ƀuôn prŏng Đà Nẵng bi hgŭm hŏng dŭm dhar bruă, alŭ wăl, Knơ̆ng prăk đru kơ mnuih ƀuôn sang čan prăk mnga hdjul, mkăp mjeh mnơ̆ng pla, mnơ̆ng rông, đru kơ ƀĭng hgŭm mđĭ kyar bruă duh mkra. Lu gŏ êsei mnuih djuê ana Ktu jhŏng duh bi liê mđĭ kyar bruă duh mkra gŏ êsei, đru mkŏ mkra krĭng ƀuôn sang mrâo./.