Klei bi trông mâo klei hgŭm mơ̆ng phung bi ala dŭm anôk bruă kriê dlăng gưl dlông, alŭ wăl, êpul mtrŭt mđĭ bruă lŏ hma, mbĭt hŏng dŭm êpul hgŭm bruă, anôk bruă duh mkra pla mjing, mkra mjing, đŭng hruh leh anăn ba čhĭ mnơ̆ng dhơ̆ng lŏ hma. Phung bi ala mđing bi trông kơ dŭm klei čiăng mrâo hlăm hdră kriê dlăng, rơ̆ng kơ mrô krĭng pla mjing, mrô anôk đŭng hruh; mbĭt anăn bi trông kơ dŭm klei dleh dlan hlăm hdră mkŏ mjing bruă pla mjing, ksiêm dlăng kdrăp mnơ̆ng lŏ hma, tui duah phŭn agha leh anăn bi hgŭm plah wah krĭng pla mjing hŏng anôk đŭng hruh, anôk bruă duh mkra ba čhĭ mnơ̆ng dhơ̆ng.

Mơ̆ng boh sĭt bruă pla mjing, Nguyễn Thanh Sơn, Khua kiă kriê Êpul hgŭm bruă lŏ hma Dă Mri brei thâo, Êpul hgŭm bruă mâo 180 čô hgŭm, hŏng giăm 450 ha durian. Klei dleh dlan prŏng ară anei jing hdră pla mjing plah wah dŭm gŏ êsei ka sa hnơ̆ng, êjai anăn anôk mnia mblei ƀrư̆ hruê ƀrư̆ mđing amâo djŏ knŏng kơ mnơ̆ng dhơ̆ng knhal tuč ôh ƀiădah wăt hnơ̆ng čuăn, hdră pla mjing leh anăn klei dưi tui duah phŭn agha mơ̆ng krĭng pla mjing.

“Boh sĭt mơ̆ng ƀĭng ngă lŏ hma drei jing pla mjing grăp čô mdê mdê, amâo mâo pô msĕ ôh. Klei dôk bi mđing ti anei jing si ngă mkŏ mjing bruă pla mjing. Êpul hgŭm bruă hmei mâo leh hdră êlan, mjuăt bi hriăm, klei bi kƀĭn trông, klei lông ngă; mta kñăm knhal tuč jing mkŏ mjing bruă pla mjing hluê hdră doh hơĭt kjăp”.

Boh sĭt mơ̆ng Êpul hgŭm bruă Dă Mri ăt bi êdah klei čiăng ƀrư̆ hruê ƀrư̆ prŏng hlăm bruă krơ̆ng kjăp mrô knăl hlăm kluôm čar Lâm Đồng. Truh kơ ară anei, Lâm Đồng mâo 1.611 mrô knăl krĭng pla mjing, hlăm anăn 1.094 mrô knăl mkăp kơ bruă ba čhĭ kơ ala tač êngao mâo leh klei tŭ yap mơ̆ng ala čar blei mnia; mbĭt hŏng 547 mrô knăl anôk đŭng hruh. năng mđing, mâo truh 173 mrô knăl krĭng pla mjing hŏng êbeh 3.600 ha leh anăn 61 mrô knăl anôk đŭng hruh mâo leh klei brei mdei amâo dah hrui mă.

Dŭm ênoh mrô anei brei ƀuh, êjai hră mơar mkăp mrô ƀrư̆ hruê ƀrư̆ dưi bi hrŏ klei ngă hră mơar, mbha gưl leh anăn mrô, mta phŭn kriê dlăng brei mlih ktang kơ bruă rơ̆ng klei găl leh mkăp, mđĭ ktang ksiêm dlăng leh anăn mđĭ bruă klam mơ̆ng grăp pô hlăm hdră mkra mjing.

Lê Quốc Thanh, Khua anôk bruă mtrŭt mđĭ bruă lŏ hma ala čar mñă klă, mrô krĭng pla mrâo knŏng jing klei găl tal êlâo; boh tŭ yuôm klă sĭt dôk ti hdră pla mjing, hnơ̆ng čuăn ba yua, mnơ̆ng yua leh anăn jih jang klei čih pioh djŏ tuôm hŏng hdră pla mjing.

“Mrô krĭng pla mjing ka lač kơ ya mta klei ôh, ñu mrâo knŏng jing klei găl. Bi ƀĭng ngă lŏ hma pla mjing hŏng ya hdră, ya klei čuăn ba yua, ya hdră ba yua, ya mnơ̆ng yua snăn jih jang klei čih mơ̆ng mrô anăn kơh lač kơ hnơ̆ng tŭ jăk mnơ̆ng dhơ̆ng".

Mơ̆ng dŭm boh klei mâo, klei kƀĭn trông kčĕ mtrŭt mđĭ klei bi hgŭm plah wah ƀĭng ngă lŏ hma, êpul hgŭm bruă, anôk bruă đŭng hruh leh anăn anôk bruă duh mkra ba čhĭ kơ ala tač êngao; mtrŭt mđĭ hdră ba yua kdrăp mrô hlăm bruă kriê dlăng klei hâo hưn, tui duah phŭn agha, hưn brei răng kơ klei amâo jăk; mbĭt anăn mđĭ hnơ̆ng tŭ jăk krĭng pla mjing čiăng mkăp djŏ hŏng klei čiăng ƀrư̆ hruê ƀrư̆ đĭ mơ̆ng dŭm anôk blei.