Hluê si Knơ̆ng bruă tuh tia mnia mblei Dak Lak, hlăm 9 mlan êgao, ênoh prăk bi mnia mblei hŏng ala tač êngao mơ̆ng čar đăo tĭng mâo 2,3 êklai USD, đĭ êbeh 6% mkă hŏng wưng anei thŭn êlâo. Knŏng boh durian mâo êbeh 262 êklăk USD, đĭ êbeh 61 êklăk USD mkă hŏng kluôm thŭn 2025. Hlăm hdră, anôk bruă duh mkra hưn mdah klei dleh dlan hlăm bruă mkăp mrô knăl krĭng pla mjing leh anăn bruă hrui blei ka kjăp hŏng klei čiăng tui duah phŭn agha. Huỳnh Văn Kiều, Khua knơ̆ng bruă Mnia mblei mnơ̆ng lŏ hma Hoa Kiều, brei thâo:

"Mnuih ƀuôn sang ară anei dôk tuôm hŏng klei dleh dlan hlăm bruă ngă mrô krĭng pla mjing êjai hrui blei boh durian hŏng phung mâo mrô krĭng pla mjing leh anăn phung ka mâo ôh mrô krĭng pla mjing ăt amâo mâo bi kpleh ôh kơ ênoh. Kyuanăn yơh srăng amâo mâo bi knar ôh hlăm bruă ba čhĭ kơ ala tač êngao, kyua mrô krĭng pla mjing djŏ tuôm kơ anôk pla mjing, phŭn agha boh durian".

Êngao kơ klei gun kpăk kơ mrô krĭng pla mjing, kdrăp kriê pioh leh anăn mkra mjing ti Dak Lak ăt adôk kƀah. Klei bi hgŭm plah wah krĭng pla mjing, êpul hgŭm bruă, anôk đŭng hruh leh anăn anôk bruă ba čhĭ kơ ala tač êngao ka kjăp; boh durian lu jing ba čhĭ hŏng boh mtah. Čiăng msir mghaih klei dleh dlan, phung bi ala akâo bi kjăp klei bi hgŭm, mđĭ boh tŭ dưn kriê dlăng mrô krĭng pla mjing leh anăn ksiêm dlăng hnơ̆ng tŭ jăk; mđĭ klei bi hgŭm klă anăp hŏng anôk bruă hrui blei čiăng ƀrư̆ ƀrư̆ bi lu jơr anôk ba čhĭ.

Nao hlăm hdră kphê phung duh mkra, Đỗ Hữu Huy, Khua knơ̆ng bruă sang čư̆ êa čar Dak Lak mtă kơ dŭm knơ̆ng, dhar bruă tŭ mă klei akâo, đru kơ phung duh mkra mđĭ kyar bruă pla mjing durian hơĭt kjăp.

“Čar jih ai tiê uêñ mĭn kơ bruă mkra mjing êlam. Thŭn anei čar bi klă pŏk ngă dŭm wăl tuh tia mkra mjing, sang mnia phŭn ti dŭm wăl tuh tia mkra mjing. Hlăm wưng kơ anăp brei mâo klei hrăm mbĭt mơ̆ng Êpul hgŭm boh durian hlăm bruă hrui blei boh durian, mkra mjing amâodah ƀhu krô ba čhĭ kơ ala tač êngao amâodah jing mkra mjing dŭm mta mnơ̆ng êlam hĭn, ƀiădah drei pla mjing leh anăn ba čhĭ msĕ snăn amâo mâo ênoh yuôm đĭ ôh”./.