Gưl durian Dona êbeh 14ha mơ̆ng 10 gŏ sang ti alŭ 19/5, să Krông Pač mâo hnơ̆ng mĭn tĭng hlăm brô 350 tôn dưi ba bi lông blei hŏng ênoh phŭn 55.000 prăk sa kg. nao hlăm klei bi lông blei mâo 10 knơ̆ng bruă hrui blei leh anăn ba čhĭ boh mnga. Knơ̆ng bruă duh mkra mnia mblei bruă lŏ hma Nguyên Thuận (ƀuôn prŏng Hồ Chí Minh) jing knơ̆ng bruă dưi hlăm klei bi lông blei hŏng ênoh 68 êbâo prăk/kg, knar hŏng ênoh kuôl kă hlăm brô 23,8 êklai prăk. Mai Đình Thọ, Êpul hgŭm bruă lŏ hma doh Krông Pač, čar Dak Lak brei thâo, bruă bi lông blei amâo djŏ knŏng đru mđĭ ênoh durian ƀiădah lŏ boh mjing boh kdrŭt kơ phung pla mjing duh bi liê  mđĭ hnơ̆ng jăk mnơ̆ng dhơ̆ng.

“ Hŏng klei bi lông blei anei, pô dưi ăt mâo klei ktưn hưn kyua dưi ruah dŭm đang pla mjing jăk hĭn čiăng ba čhĭ kơ tuê. Leh anăn, phung blei ba yua ăt mâo klei bi êdah jăk mơh, amâo djŏ knŏng mđĭ boh tŭ dưn bruă duh mkra ƀiădah lŏ mđĭ ai klei ktưn hưn kơ phung pla durian”.

Klei bi lông blei đang durian jing sa hlăm dŭm mta mrâo mơ̆ng knăm mơak Durian Dak Lak thŭn 2026, đru mkŏ mjing anăn knăl durian mơ̆ng čar hluê êlan klă mngač leh anăn mđĭ ai bi ktưn ti anôk mnia mblei. Hluê si êpul mkŏ mjing, mơ̆ng ară anei truh hruê 20/8 srăng lŏ dơ̆ng mkŏ mjing thiăm 2 gưl bi lông blei. Mĭn tĭng hlăm brô 200ha durian, hnơ̆ng mâo hlăm brô 4.600 tôn, bi mâo djăp klei čuăn leh anăn mâo mrô krĭng pla mjing srăng dưi ba bi lông blei, mkŏ mjing anôk ba čhĭ klă anăp plah wah knơ̆ng bruă leh anăn krĭng pla mjing.

Lại Đức Đại, Khua Bruă sang čư̆ êa să Krông Pač brei thâo, boh tŭ gưl bi lông blei tal êlâo êgao klei hmăng hmưi mơ̆ng êpul mkŏ mjing, mkŏ mjing tur knơ̆ng bruă alŭ wăl lŏ bi leh gru hmô bi lông blei leh anăn mđĭ ênoh durian.

“Klei bi lông blei thŭn anei êgao kơ klei čang hmăng mơ̆ng Anôk mkŏ mjing. Mâo klei gĭt gai mơ̆ng Knơ̆ng bruă sang čư̆ êa čar hlăm hdră mkŏ mjing klei mkra mjing hŏng bruă mnơ̆ng dhơ̆ng durian, hmei bi mklă mkŏ mjing klei bi lông jing sa bruă ngă čiăng kơ grăp knhuang bi mklă anăn knăl durian Krông Pač leh anăn wăt Dak Lak hlăm anôk ba čhĭ. Ƀĭng ngă lŏ hma srăng amâo djŏ knŏng čhĭ mnơ̆ng dhơ̆ng ôh ƀiădah čhĭ ênoh yuôm hŏng dŭm boh tŭ dưn diñu năng dưi dưn.”

Čar Dak Lak ară anei mâo hlăm brô 45.000ha durian. Thŭn 2025, hnơ̆ng hrui blei mâo êbeh 390.000 ton, ba prăk hrui wĭt êbeh 1,1 êklai USD. Thŭn anei, hnơ̆ng hrui pĕ mĭn tĭng mâo êbeh 500 êbâo ton. Hlue si Knơ̆ng bruă lŏ hma leh anăn Wăl hdĭp mda čar Dak Lak, boh tŭ gưl bi lông tal êlâo jing tur knơ̆ng kơ alŭ wăl lŏ dơ̆ng bi leh gru hmô, pŏk mlar hnơ̆ng bi lông hlăm dŭm yan durian kơ anăp./.