Lu klei blŭ hlăm klei kƀĭn trông lač, bi mlih mtah leh anăn hlue ngă hdră êlan ESG ară anei jing klei čiăng êdi, mgô̆ čiăng kơ knơ̆ng bruă krơ̆ng kjăp hră akâo blei, pŏk mlar wăl anôk mnia mblei leh anăn mđĭ ai dưi bi ktưn. Čiăng dưi ngă klei anei, anôk bruă duh mkra brei bi hrŏ êwa čhŏ, kriê dlăng klă mngač, ba yua tŭ dưn mnơ̆ng dhơ̆ng, mkra mđĭ klei găl mă bruă knuă lehanăn bi mklă klei čih pioh...

Hluê si phung thơ̆ng kơ bruă, anôk bruă duh mkra brei dlăng klei bi mlih mtah jing sa hdră duh bi liê kơ hdră mđĭ kyar hơĭt kjăp, amâo dưi dlăng anei jing ênoh bi liê bluh mâo, Ară anei, Anôk bruă dưi mphŭn mơ̆ng dŭm hdră msir mâo ênoh ƀiă, ba wĭt boh tŭ dưn lu msĕ si mkiêt mkriêm pui kmlă, kriê dlăng êa djah, bi mlih mrô mkra mjing leh anăn mđĭ hnơ̆ng jăk kriê dlăng.

Nguyễn Thành Long, pô thơ̆ng kơ bruă kriê dlăng hdră bi hgŭm ESG lač snei, dŭm alŭ wăl brei mâo dŭm wăl tuh tia mkra mjing wăl mnơ̆ng hdĭp hŏng anôk bruă pui kmlă doh, êa jua lehanăn msir mghaih djah djâo mđrăm mbĭt, mjing tur knơ̆ng čiăng kơ anôk duh mkra hluê ngă ESG tŭ dưn leh anăn bi hrŏ ênoh bi liê mlih mrâo.

“Hjăn hŏng mnơ̆ng dhơ̆ng ba čhĭ kơ Ơ Rôp, mâo 6 êpul phŭn dôk hmăi djŏ klă anăp jing msei, simăng, ksueh, hbâo brŭ ... Ară anei mâo leh ênoh cacbon klă klơ̆ng leh anăn brei mkă êwa čhŏ mnơ̆ng dhơ̆ng, tui duah anôk bi knăl kơ cacbon hlăm grăp mta mnơ̆ng dhơ̆ng, grăp hnư hrui wĭt. Dŭm anôk bruă duh mkra čiăng mprăp hnưm čiăng amâo lui ôh".

 Phạm Anh Tuấn, Khua Knơ̆ng bruă sang čư̆ êa čar Gia Lai bi mklă: wưng thŭn 2026-2030, alŭ wăl bi mklă srăng mtrŭt mđĭ hdră bi mlih mrô, bi mlih mtah, mđĭ kyar bruă tuh tia mkra mjing, pui kmlă doh leh anăn bruă lŏ hma ba yua kdrăp mrâo.

Ară anei, čar mâo lu klei găl čiăng mđĭ kyar bruă duh mkra mtah hŏng klei găl prŏng kơ êa pui êwa čuh doh, klei găl đĭ kyar kdrăp mrâo kluôm dhuôm. Khua anôk bruă sang čư̆ êa čar Gia Lai ƀuăn rơ̆ng bruă knŭk kna srăng bi mlih ktang mơ̆ng klei mĭn kriê dlăng jing ngă bruă, hrăm mbĭt hŏng anôk bruă duh mkra pŏk ngă dŭm hdră bruă.

“Čar Gia Lai srăng mâo hdră êlan hrăm mbĭt hŏng anôk bruă duh mkra hlăm klei bi mlih mtah. Knŭk kna srăng đru kơ dŭm bruă klă klơ̆ng hŏng dŭm hdră êlan. Ƀiădah yuôm bhăn hĭn jing klei thâo săng mơ̆ng phung khua kiă kriê bruă sang čư̆ êa, anôk duh mkra brei ƀuh anei jing klei brei bi mlih čiăng dưi mâo. Čar srăng lŏ dơ̆ng gĭt gai, kjăp pŏk ngă klei bi mlih mtah ti čar hŏng ai tiê pral hĭn, ktang phĭt hĭn leh anăn tŭ dưn hĭn".