Ti ƀuôn hgŭm Đam Rông 1, čar Lâm Đồng, Phạm Văn Hội jing sa hlăm phung ngă lŏ hma tal êlâo pla mjing ana mắc ca lehanăn hlŏng mkra mjing. Mơ̆ng klei čhĭ boh mtah, djŏ tuôm hŏng klei phung ghan mnia kpĭ ênoh, snăn ñu duah êlan duh kơ masin bi ktlah asăr, mprăp kdrăp bi mthu, lehanăn mkŏ mjing anăn knăl  "Mắc ca Hội Dung". Asăr mắc ca mâo bi mthu djăp ênoh čuăn OCOP 3 mtŭ, mbĭt anăn bi hgŭm hŏng phung kăp hrui blei boh mơ̆ng dŭm gŏ sang mnuih ƀuôn sang, ciăng mâo djăp mnơ̆ng pioh mkra mjing, dưi ba čhĭ mnơ̆ng leh mkra mjing truh kơ dŭm anôk mnia mblei prŏng msĕ si Hà Nội lehanăn ɃP. HCM. Tui si Hội, čiăng kơ mnơ̆ng pô mkra mjing dưi čhĭ hlăm djăp anôk, snăn mđing tal êlâo hĭn jing kơ hnơ̆ng jăk bruă pô mkra mjing, dơ̆ng mơ̆ng bruă dlăng kriê hlăm đang hma mtam jing tal êlâo hĭn, hlŏng truh kơ mnuih blei yua:

"Mkra mjing bi jăk dơ̆ng mơ̆ng đang hma mtam hlŏng truh kơ klei mă bruă knhal tuič-truh ti kngan mnuih blei yua. Klei tal êlâo hmei mđing jing hnơ̆ng jăk, čiăng kơ dưi ba čhĭ kbưi truh hlăm djăp anôk”.

Mơ̆ng hdră Hội mă bruă, jing mkra mjing kjăp jing leh hdră êlan mă bruă djŏ, mâo leh lu phung duh mkra, êpul hgŭm bruă, lehanăn dŭm anôk mkra mjing hlăm čar Lâm Đồng hrŏng ruah mđĭ boh tŭ boh mnga mnơ̆ng pla mjing. Ară anei kluôm čar, mâo leh êbeh 500 anôk mkra tal êlâo, đŭng hruh hŏng ênoh dưi mkra êbeh 1,53 êklăk tôn sa thŭn, mjing leh atur kơ boh mnga hlăm alŭ wăl dưi djŏ hŏng boh tŭ ênuk ară anei, lehanăn pŏk mlar anôk čhĭ mnia truh wăt kơ ala tač êngao.

Tui si Nguyễn Thị Thùy Minh, pô sa anôk mkra mjing boh mnga ti ƀuôn hgŭm Lâm Viên – Đà Lạt, klei mkra mjing bi jăk hĭn, hlăk jing hdră êlan mă bruă, pioh pŏk mlar anôk čhĭ mnia, bi hơĭt bruă knuă hlăm alŭ wăl. Amâo čih yap ôh kơ boh mnga kƀah amâodah êbeh êbiêr, ƀiădah hlăm klei dôk mkra mjing anăn jing mđing kơ hnơ̆ng jăkm, dưi kriê pioh sui, lehanăn dưi mjing lu bruă knuă hlăm alŭ wăl, lehanăn mtrŭt mđĭ bruă bi hgŭm klei mkr amjing mơ̆ng akŏ hlŏng truh kơ knhal tuič.

 "Hlăm yan hrui êmiêt, lu mnuih pla mjing amâo hmao lŏ pĕ. Kyuanăn tăp năng boh mnga truh kơ brŭ, jhat. Mơ̆ng anăn hmei ruah hdră êlan kơ bruă mkra kdrăp bi mthu, pioh dưi sui hrue hĭn, lehanăn mnơ̆ng mkra mjing srăng lu mta hĭn mơh.”

Boh sĭt brei ƀuh, ăt sa mta boh mnga mâo ba wĭt, ƀiădah leh mkra mjing srăng dưi mđĭ hĭn boh tŭ boh mnga pô mâo, ti anôk čhĭ mnia, lehanăn mnuih pla mjing čŏng kjăp hlăm klei bi mnia mblei dôk amâo mâo hơĭt ară anei. Čiăng mjing klei đĭ kyar kjăp mơ̆ng bruă mkra mjing boh mnga, snăn čar Lâm Đồng mtrŭn leh hdră mđĭ kyar bruă mkra mjing djam mtam boh kroh wưng thŭn 2026-2030. Mtă kñăm hlŏng truh kơ thŭn 2030, hnơ̆ng ênoh djam mtam boh kroh mâo mkra mjing truh hlăm brô   30% ênoh mâo jih jang, ƀrư̆ ƀrư̆ čiăng atăt bruă mkr amjing, jing bruă phŭn kơ klei mđĭ kyar bruă lŏ hma hlăm čar.

Tui si Phan Nguyễn Hoàng Tân, Khua knơ̆ng bruă lŏ hma lehanăn wăl hdĭp mda čar Lâm Đồng, klei mkra mjing kjăp jing kliăng mđĭ boh tŭ boh mnga mâo, mđĭ ai dưi bi ktưn, lehanăn pŏk mlar anôk mnia mblei čhĭ truh kơ ala tač êngao boh mnga alŭ wăl pô mâo. Phan Nguyễn Hoàng Tân lač:

"Čiăng mđĭ hnơ̆ng bi ktưn mơ̆ng bruă knuă, lehanăn tui duah anôk mnia mblei jăk, boh nik dưi čhĭ kơ ala tač êngao, snăn hmei bi mklă leh dơ̆ng mơ̆ng bruă pla mjing, brei tui tiŏ hdră êlan doh djăp ênoh čuăn. Mbĭt anăn mđĭ hnơ̆ng tŭ bruă mkr amjing boh mnga, kñăm mđĭ boh tŭ klei mnia mblei, lehanăn mđĭ hnơ̆ng klei bi ktưn mơ̆ng bruă”.

Mơ̆ng dŭm anôk duh mkr apla mjing ti hnơ̆ng gŏ sang, hlŏng truh kơ phung duh mkra, mâo duh bi liê hŏng kdrăp ênuk mrâo, mkra mjing hŏng klei jăk, mjing leh klei bi mlih prŏng hlăm hdră êlan mă bruă, wăt hlăm klei mĭn mđĭ kyar bruă lŏ hma hlăm čar Lâm Đồng. Grâwp mta mnơ̆ng mâo mkra mjing mơ̆ng boh mnga, srăng dưi čhĭ mnia yuôm hĭn, bi hrŏ hnơ̆ng luič liê leh klei hrui êmiêt boh mnga, lehanăn mđĭ ai dưi bi ktưn hŏng anôk mkăn, pŏk mlar anôk čhĭ mnia. Anei yơh jing hdră êlan yuôm bhăn pioh kơ boh mnga mơ̆ng Lâm Đồng mđĭ nanao boh tŭ, lehanăn mâo klei mđĭ kyar hŏng klei kjăp./.