Knơ̆ng kdơ̆ng êa Ia Mơr mâo ênoh duh bi liê giăm 3.000 êklai prăk, hnơ̆ng êa giăm 180 êklăk m3, dưi mkŏ mjing čiăng mkăp êa krih kơ hlăm brô 12.500ha lăn pla mjing lehanăn êa yua kơ hlăm brô 50.000 čô mnuih ti 2 čar Gia Lai lehanăn Dak Lak. Să knông lăn Ia Rvê, čar Dak Lak ksiêm dlăng leh hlăm brô 1.100 ha ti dŭm alŭ 6, 7, 8, 9 leh anăn 11 čiăng ba mdah pŏk mlar krĭng krih êa wưng tal 2 mơ̆ng hdră bruă Knơ̆ng kdơ̆ng êa Ia Mơr.

Hlăm klei ksiêm dlăng boh sĭt, Lương Nguyễn Minh Triết, Khua bruă Đảng čar Dak Lak mñă klă, duh bi liê bruă mkŏ mkra knơ̆ng kdơ̆ng êa ti krĭng knông lăn mâo boh tŭ yuôm bhăn hlăm hdră mđĭ kyar bruă duh mkra, bi hrŏ ƀun hơĭt kjăp, bi hơĭt mnuih ƀuôn sang leh anăn bi kjăp bruă lĭng kahan, răng mgang klei êđăp ênang. Kyua anăn, dŭm knơ̆ng, dhar bruă djŏ tuôm brei bi hgŭm hŏng anôk bruă gưl dlông mkŏ mjing hdră êlan duh bi liê êlan mnuôr mđoh êa kơ 1.100 ha leh ksiêm dlăng, rơ̆ng klei hưn mdah, klă mngač, amâo bi kpleh hŏng dŭm hdră mkăn. Kơ wưng sui, hdră mkăp êa jua brei tĭng kơ klei čiăng mơ̆ng jih 12 alŭ hlăm să.