Yan hjan 2026 ti Gia Lai lŏ truh leh, dŭm hnoh êâ khuôt ară anei mâo leh êa đoh, dŭm ênao êa kčưm kdơ̆ng êâ. Ƀiădah, klei uêñ mĭn luč klei êđăp ênang hlăm yan hjan hlĭm ăt đĭ grăp hruê. Ti alŭ wăl Yŭ čar Gia Lai, lu ênao êa msĕ si Tân Sơn, Ia Mlah, Biển Hồ B, Ia Dréh amâodah Ia Ring, Ia Năng… mâo leh klei êa hram hlăm guê, kbiă êa, jhat dŏ kđăl, kđang bêtông anôk mđoh êa leh anăn klưh hroh knơ̆ng êa. Klă sĭt brei ƀuh lu ênao êa dưi rŭ mjing mơ̆ng êbeh 10 thŭn êlâo, găn lu thŭn ba yua đa đa ka dưi duh bi liê năng hŏng klei čiăng. Đa đa knơ̆ng knơ̆ng êa lăn dơr, bi hrŏ klei dưi dơ̆ng êa, lu anôk jhat rai hmăi kơ klei bi êran leh anăn ksiêm dlăng hlăm yan hjan hlĭm. Rơ Châm Tin, k’iăng khua Bruă sang čư̆ êa să Ia Grai akâo.

 "Čiăng rơ̆ng kơ knơ̆ng kdơ̆ng ea hlăm wưng kơ anăp hmăng hmưi dŭm anôk thơ̆ng kơ bruă mơ̆ng čar hriê ksiêm dlăng ênao êa, leh anăn mâo tur knơ̆ng mñă kơ dŭm anôk mâo klei dưi đru brei ngăn prăk, mkra mđĭ, rơ̆ng kơ klei êđăp ênang leh anăn đru mâo djăp klei čiăng mnuih ƀuôn sang”.

Amâo djŏ knŏng alŭ wăl Yŭ mơ̆ng čar, lu knơ̆ng kdơ̆ng êa ti alŭ wăl Ngŏ Gia Lai ăt jhat rai. Hlue si knơ̆ng bruă ba yua knơ̆ng kdơ̆ng êa Bình Định, hlăm ênoh 63 knơ̆ng êa anôk bruă kriê dlăng, mâo 9 anôk jhat rai kjham čiăng mkra mđĭ mjêč. Bùi Phi Hùng, k’iăng khua knơ̆ng bruă brei thâo:

"Dŭm hdră bruă duh bi liê lu čiăng dưi ngă hră anăn duh bi liê bruă knŭk kna čiăng kơ čar amâodah gưl dlông dăp ngăn prăk ngă bruă. Êjai leh mkra mđĭ srăng lŏ jao kơ anôk bruă kiă kriê. Knơ̆ng bruă ară anei knŏng dưi msir dŭm anôk jhat điêt msĕ si ƀăng mđuĕ êa, amâodah bi hluh êlan mnuôr êa jêñ jêñ đuč.”

Hluê si knơ̆ng bruă lŏ hma leh anăn wăl hdĭp mda čar Gia Lai lu knơ̆ng êa dưi rŭ mdơ̆ng mơ̆ng sui ară anei amâo lŏ dưi yua ôh hlăm boh klei yan adiê amâo mâo jăk. Bruă duh bi liê mkra mđĭ amâo djŏ knŏng mđĭ thŭn ba yua ƀiădah lŏ rơ̆ng klei êđăp ênang kơ mnuih ƀuôn sang ti anăp klei hjan hlĭm dleh ksiêm dlăng. Čar Gia Lai mâo leh hdră êlan mđĭ kyar knơ̆ng kdơ̆ng êa leh anăn êa doh krĭng ƀuôn sang wưng thŭn 2026 – 2030, tă hdră truh thŭn 2035.

Hlăm anăn, alŭ wăl hưn mdah hŏng gưl dlông đru ngă lu phŭn čiăng mkra mđĭ dŭm knơ̆ng kdơ̆ng êa jhat rai kjham ti alŭ wăl. Cao Thanh Thương, khua knơ̆ng bruă lŏ hma leh anăn wăl hdĭp mda čar Gia Lai brei thâo:

 "Tal êlâo srăng duh bi liê bruă mkŏ mkra knơ̆ng kdơ̆ng êa. Wưng kơ anăp, čar Gia Lai ksiêm dlăng,hưn mdah knơ̆ng kdơ̆ng êa kơ alŭ wăl yŭ Gia Lai čiăng mâo hĭn klei găl mđĭ kyar bruă lŏ hma. Gia Lai ăt akâo kơ knŭk kna leh anăn dŭm phŭn, dhar bruă uêñ mĭn đru duh bi liê knơ̆ng kdơ̆ng êa hriăm mbĭt, djăp ênŭm klei čiăng đĭ kyar hlăm wưng mrâo.”

Bruă duh bi liê knơ̆ng kdơ̆ng êa ti Gia Lai amâo djŏ knŏng klei čuăn kơ bruă mkŏ mkra ƀiădah lŏ jing hdră êlan yuôm bhăn čiăng răng mgang asei mlei, ngăn drăp mnuih ƀuôn sang. Anei jing klei čiăng êdi brei čar Gia Lai čŏng pô bi mdrơ̆ng hŏng klei truh yan adiê hlăm wưng mrâo./.